Read Maasai Bible – Biblia Sinyati 2 Ilaiguanak 10 Bible Online

2 Ilaiguanak 10 - Maasai Bible – Biblia Sinyati bible

2 Ilaiguanak 10

¹Keeta apa Ahab ilayiok ntomoni naapishana te Samaria. Neiger Yehu mpala airriwaa Samaria, airriwaki ilaitoriak le nkanasa, o lpayiani, o laing'urak loo layiok le Ahab, ejo,

²“Tenebau ena palai enitii, amu iatata ilayiok lo lkitok linyi tenebo intae, niaatata ngarrin oo mbartan, o mbartan o nkanas naasheta sunta o masaa o larrabal,

³entegelu oloisul ogol te lelo ayiok lo lkitok linyi, ninchosho ninye olorika le papaai lenye, nimitutu enkaji olkitok linyi.”

⁴Kake eiruto ninche oleng, nejo, “Ng'ura eitu eigaraa ilaiguanak oaare ninye; kaji naa iyiook kinko tenikintasheikinore ninye?”

⁵Neaku ore ilo aitasheikinoni le nkaji e nkitoo, o laitasheikinoni le nkanasa, tenebo ilpayiani o laing'urak, neirriwaki Yehu olkilikuai aajoki, “Kira iyiook isinkan linono, naa eikiaas pooki nintanap iyiook. Mikintaa iyiook likae tung'ani, olaiguanani; taasa enaba anaa enidol aa sidai too nkonyek inono.”

⁶Neitoki Yehu aigeroki ninche enkae palai e are, ajoki, “Tenaa enkalo ai itii, naa tenaa eikining'ining'i nanu, entudung'oi ilukuny oo layiok lo lkitok linyi, nipuopuo aapuonu enatii taaisere te Yesreel tena rishata.” Ore apa lelo ayiok lo laiguanani pokira ntomoni naapishana, netii tenebo iltung'ana kituaak le nkanasa, laa ninche apa ooitubulu ninche.

⁷Ore ake pee ebau ina palai enetii ninche, neibung ninche lelo ayiok lo laiguanani, near metuata, iltung'ana ntomoni naapishana, nepik ilukuny enye nkikapuni, neyau ninche enetii Yehu te Yesreel.

⁸Ore ake pee elotu olkilikuai ajoki ninye, “Eyautua ninche ilukuny oo layiok lo laiguanani,” nejo ninye, “Erragie ninche too lturrurri oaare te mbata e kishomi o mekenyu.”

⁹Ore tadekenya pee eipang ninye alo boo, neitashe ajoki iltung'ana pooki, “Miatata intae entioto. Nanu apa otarresho olkitok lai, naar ninye metua; kake aing'ae natara metuata kulo pooki?

¹⁰Entayiolo naa nchere, menya enkop ororei lo Laitoriani, apa oiroro ninye oipirta olmarei le Ahab; amu etaasa Olaitoriani ina apa natejo ninye aimunye osinka lenye Eliya.”

¹¹Near Yehu metuata lelo pooki apa ootelekutua te nkaji e Ahab te Yesreel, o ltung'ana lenyena kituaak, o lchoreta lenyena yiolot, o lapolosak lenyena, ometaba anaa neishu pooki.

¹²Neitoki Yehu adumunye nelo Samaria. Ore te nkoitoi etii ninye Beteked ewueji oo lairritak loo ntare,

¹³nenang'are Yehu iltung'ana lo lmarei lenye lo laiguanani le Yuda oji Ahasia, nejoki ninche, “Irara akua?” Newaliki ninche aajoki, “Kira iyiook ilo lmarei le Ahasia, nikietuo iyiook aabaiki iltung'ana le nkaji e nkitoo, o layiok le nkitok o laiguanani.”

¹⁴Nejo ninye, “Ewaita ninche eishu.” Neyae ninche eishu, nepuo ninche aar metuata te ngumoto e Beteked, iltung'ana artam oaare neitu elekuni obo lenye.

¹⁵Ore pee edumunye Yehu alo teine, nenang'are Yehonadab olayioni le Rekab elotu anang'are ninye; neiroroki ninye, nejoki, “Ketiu oltau lino te nanu anaa enatiu olalai te iyie?” Nejo Yehonadab, “Ee” Nejoki Yehu, “Tenaa neijia nchooki enkaina ino.” Neisho ninye Yehu enkaina. Neyiataa Yehu ninye apik engarri oo mbartan.

¹⁶Nejoki ninye, “Wou tusujuaki pee idol enyuaata naata to Laitoriani.” Kaae neked ninye tenebo ninye engarri enye oo mbartan.

¹⁷Ore ake pee elotu Samaria, near metua lelo pooki apa ootelekutua lo lmarei le Ahab ootii Samaria, ometaba anaa neishu pooki, te risioroto o rorei lo Laitoriani apa otiaka Eliya.

¹⁸Neitoki Yehu aiturrur iltung'ana pooki, nejoki ninche, “Eisiaayia apa Ahab Baal penyo; kake kelo Yehu aisiaai ninye oleng.

¹⁹Ore naa taata empotokoki nanu iloibonok pooki le Baal, o laseremak lenyena pooki o lapolosak lenyena pooki; emincho eaku metii ninye olemetii, amu aata olasar kitok laitaiki Baal. Ore oltung'ani lemelotu neari metua.” Etaasa apa Yehu ina te nkalamasisho ejo pee eidaikie ilapolosak le Baal.

²⁰Neitanapisho Yehu ajo, “Entobira eumata kitok te nkaraki Baal.” Neaku eibalunye ninche.

²¹Neirriwaa Yehu ilkiliku meshomo Israel pooki, nepuonu ilaseremak pooki le Baal, neaku meetae oltung'ani leitu elotu. Nejing ninche atua enkaji e Baal, neiputayu ina aji e Baal ebaiki esuntai ometabaiki enkae suntai.

²²Nejoki Yehu ilo laa ninye oitasheiki osanduku oshumishoreki, “Iyau masaa o ntokitin enkisiaayiare te nkaraki eseremare e Baal.” Neyau ninye nena masaa,

²³nelo Yehu atua ina aji e Baal tenebo Yehonadab olayioni le Rekab; nejoki ilaseremak le Baal, “Entujurru entodol nchere metii osinka lo Laitoriani hoo obo atua intae. Kake ilaseremak le Baal ake.”

²⁴Neitoki alo atua aji aishooyo i nkishoorot neitayu ilasarri oopejori. Netipika apa Yehu iltung'ana ntomoni isiet boo, nejoki, “Ore oltung'ani obo te lelo latipika inkaik inono metuluai neiturraa enkishui enye.”

²⁵Ore ake pee eidip Yehu aishooi inkishoorot o lasar opejori, nejoki Yehu olarriponi o lkituaak, “Entijing'aki entaar metuata; emincho oltung'ani obo eimisho.” Ore ake pee eidip aatar ninche too lalema, ore ilo arriponi o lkituaak nenang'aki ninche boo, nepuo olgilata li atua te nkaji e Baal.

²⁶Neipang'unye ninche ina ng'ape apa natii enkaji e Baal, nepejoo.

²⁷Neidaikie ninche ina ng'ape e Baal, neidaikie ina aji e Baal, neitaa enkaji narotokini ometabaiki ena olong.

²⁸Neijia eikuna Yehu pee eishie Baal tiatua Israel.

²⁹Kake eitu apa eibelekenya Yehu apaash ing'ok e Yeroboam olayioni le Nebat, naa te ninche apa eitapong'oyie Isiraeli, meteserema ilasho le saabu te Betel o te Dan.

³⁰Nejoki Olaitoriani Yehu, “Ore te nkaraki nitaasa esidai too nkonyek aainei, nintaasa enkaji e Ahab te risioroto e nena pooki naatii oltau lai, ore ilayiok linono le ishoi e ong'uan, kepuo aatonie olorika le nkitoo too Siraeli.”

³¹Kake mme arriyia apa Yehu te nkibung'ata oo nkitanapat o Laitoriani. Enkai oo Siraeli, to ltau lenye pooki; eitu apa ninye epaash ing'ok e Yeroboam naa ninche eitapong'orie Isiraeli metaasa ing'ok.

³²Ore apa te nena olong'i, neiteru Olaitoriani adung'oo kulie wuejitin e nkop oo Siraeli. Etimira apa Hasael ninche eisulie tialo ilpolosien le Israel pooki.

³³Ebaiki olkeju le Yordan te nkalo o loo saen, o enkop pooki e Gilead o ene Gad o ene Ruben o ene Manase, ebaiki Aroa, te mbata o erata oji Arnon, aa taa Gilead o Bashan.

³⁴Ore apa nkulie kiaasin pooki e Yehu, o nena pooki nataasa ninye o enkidimata enye pooki, neigeroki tiatua embuku oo ntepen oo laiguanak le Israel.

³⁵Neirura Yehu etua anaa loo menye, nenukari ninye te Samaria. Neitoreisho Yehoahas olayioni lenye te rishata enye.

³⁶Ore apa enkata naitoria Yehu Isiraeli te Samaria naa ilarin tikitam o isiet.