Read Maasai Bible – Biblia Sinyati 2 Ilaiguanak 12 Bible Online

2 Ilaiguanak 12 - Maasai Bible – Biblia Sinyati bible

2 Ilaiguanak 12

¹Ore apa to lari liopishana le nkitoria e Yehu, neiteru Yehoash aitoreisho, neitoreisho ninye ilarin artam oaare te Yerusalem. Ore apa enkarna e ng'otonye naa keji Sibia e Beer-sheba.

²Neas Yehoash mbaa sidain too nkonyek o Laitoriani too nkolong'i enyena pooki, amu eiteng'ena apa olapolosani Yehoida ninye.

³Ore ake eyia eitu apa eiwuang'ieki iwuejitin neeika, metaa eshomo iltung'ana dukuya epolosisho nepej enkorropil too wuejitin neeika.

⁴Nejoki Yehoash lelo apolosak; Ore kuna pisai pooki oo ntokitin sinyat naayawuaki atua enkaji o Laitoriani, nena pisai naaikenakaki pooki ng'ae - nena pisai naaikenakaki iltung'ana pooki, o nena pisai naadumaki oltau oltung'ani meyau atua enkaji o Laitoriani,

⁵nchoo ilapolosak eya, eya ake oltung'ani te lelo ooyiolo. Naa nchoo ninche eitobir ina aji aaram te nkata ake naba anaa enadoli ewueji nerami.

⁶Kake ore to lari le tikitam ookuni le nkitoria o laiguanani Yehoash, neitu eram ilapolosak ina aji.

⁷Ore te nkaraki ina, neipotu olaiguanani Yehoash Yehoida olapolosani o kulikae apolosak nejoki ninche, “Kainyoo intae pee mintobiriri enkaji aaram? Ore naa taata mintokiki aaya mpisai te lelo liyiolorere, kake enchooi nena pisai pee eitobirieki enkaji e Nkai.”

⁸Nenyorraa lelo apolosak pee meitoki aaya kulie pisai too ltung'ana, nemeitobir ninche aaram ina aji e Nkai.

⁹Neitoki Yehoida ilo apolosani adumu osanduku, nepik enaudoto enkikenet enye, nepik ilo sanduku embata o lperere lo lasar, te nkalo e tatene, te wueji nejing'ieki enkaji o Laitoriani; ore lelo apolosak oorip kutukaji nepik atua ine nena pisai pooki naayawuaki atua enkaji o Laitoriani.

¹⁰Naa ore ake enkata nadoli aajo aikumok mpisai naatii atua ilo sanduku, nelotu olasirani lo laiguanani o lapolosani kitok, aaiken neenaa ninche too lbenia oo notoki tiatua enkaji o Laitoriani.

¹¹Neisho ninche nena pisai naaidipaki aaikena lelo aasak le siaai ooitasheiki enkaji o Laitoriani; nelaaki ninche lelo aguetak loo nkeek, o lashetak ooshetita ina aji o Laitoriani.

¹²Neisho sii ilashetak loo soito o ladung'ok loo soito. Neinyiang'u sii mbaoi o soito ooitobirieki enkaji o Laitoriani aaram.

¹³Kake eitu eishoori te nkaraki enkaji o Laitoriani ntokitin naaitobirieki, ng'irran e nkosholai o ntokitin naarieki enkima o lbakulini o sekekuani, anaa kulie masaa e saabu, aashu ine nkosholai, te nena pisai apa naayawuaki atua enkaji o Laitoriani.

¹⁴Amu eishooki apa nena pisai ilaitobirak le nkaji ooramita enkaji o Laitoriani.

¹⁵Neitu apa eikilikuani metolimu enkikenakinoto te lelo tung'ana ooishooitie nena pisai too nkaik enye, aalaaki lelo aisiaayiak, amu etaasishote apa ninche te nkoitoi naisiligayu.

¹⁶Ore mpisai o lasar le nkitarruorroto o no lasar le ng'oki, neitu eyauni atua enkaji o Laitoriani; inoo lapolosak nena.

¹⁷Ore apa teina kata nelo Hasael olaiguanani le Siria aarare Gaat, neya ninye. Kake ore ake pee eibelekenya Hasael aing'or Yerusalem,

¹⁸neya Yehoash ilo aiguanani le Yuda nena kishoorot pooki apa naaitisinya, Yehoshafat o Yoram o Ahasia, lelo aiguanak apa le Yuda, oara iloo menye. O nena kishoorot naaitisinya ninye makewan, o saabu pooki apa natii atua ilchumat le nkaji o Laitoriani o enkaji o laiguanani neirriwaki nena pooki Hasael olaiguanani le Siria. Nelo Hasael aing'uaa Yerusalem.

¹⁹Ore apa kulie kiaasin e Yoash, o nena pooki naataasa, neigeroki tiatua embuku oo ntepen oo laiguanak le Yuda.

²⁰Nedumunye isinkan lenyena aarreshisho, near Yoash metua te nkaji e Milo teina oitoi nadoyio alo Sila.

²¹Isinkan lenyena apa, Yasakar olayioni le Shimet o Yehoshad olayioni le Shomer ootanang'ie ninye enkop, neaku etua ninye nenukari tenebo loo menye tiatua enkanasa e Daudi, neitoreisho Amasia olayioni lenye te rishata enye.