Read Maasai Bible – Biblia Sinyati 2 Ilaiguanak 15 Bible Online

2 Ilaiguanak 15 - Maasai Bible – Biblia Sinyati bible

2 Ilaiguanak 15

¹Ore to lari le tikitam oopishana le nkitoria e Yeroboam olaiguanani le Israel, neiteru Asaria[2] olayioni le Amasia, ilo aiguanani le Yuda aitoreisho.

²Oloo larin tomon o ile apa ninye pee eiteru aitoreisho, neitoreisho ninye ilarin onom oaare te Yerusalem. Ore apa enkarna e ng'otonye naa keji Yekolia e Yerusalem.

³Neas ninye mbaa sidain too nkonyek o Laitoriani, te risioroto e nena pooki apa naataasa Amasia papaai lenye.

⁴Kake ore eyia eitu eiwuang'ieki iwuejitin neeika; neton ake epej iltung'ana enkorropil too wuejitin neeika.

⁵Neosh Olaitoriani ilo aiguanani, neaku ninye ole nkeeya oo lbolot ometabaiki ina olong apa natua ninye. Neton apa ninye te nkaji enye etekepayioki. Naa Yotam apa olayioni lo laiguanani oitasheiki enkaji e nkitoo, neitore iltung'ana leina kop.

⁶Ore apa nkulie kiaasin e Amasia, o nena pooki naataasa ninye, neigeroki tiatua embuku oo ntepen oo laiguanak le Yuda.

⁷Neirura Asaria etua anaa apa loo menye, nenukari ninye tenebo loo menye te nkanasa e Daudi, neitoreisho Yatam olayioni lenye te rishata enye.

⁸Ore to lari le tomoni uni o isiet le nkitoria e Asaria olaiguanani le Yuda, neiteru Sakaria olayioni le Yeroboam aitoreisho too Siraeli te nkop e Samaria, ilapaitin ile.

⁹Neas ninye mbaa torrok too nkonyek o Laitoriani, anaa apa enataasa papaai lenye. Eitu ninye epaash ing'ok e Yeroboam olayioni le Nebat, naa ninche eitapong'orie Isiraeli.

¹⁰Nerresh Shalum olayioni le Yabesh Sakaria, neosh ninye abatat te Ibleam, near ninye metua, neitoreisho te rishata enye.

¹¹Ore nkulie kiaasin e Sakaria neigeroki tiatua embuku oo ntepen oo laiguanak le Israel.

¹²(Ina apa enkisiligata naishoo Olaitoriani Yehu, ajoki, “Ketonie ilayiok linono olorika le nkitoo le Israel ometabaiki e ishoi e ong'uan,” nelotu aaku ina.)

¹³Eiterua apa Shalum olayioni le Yabesh aitoreisho to lari le tomoni uni o naaudo le nkitoria e Usia olaiguanani le Yuda, neitoreisho ninye olapa obo te Samaria.

¹⁴Neitoki Menaham olayioni le Gadi alotu eing'uaa Tirsa nelotu Samaria, neosh ninye Shalum olayioni le Yebesh te Samaria near ninye metua, neitoreisho ninye te rishata enye.

¹⁵Ore apa nkulie kiaasin e Shalum, ina rreshoto natarreshishe neigeroki tiatua embuku oo ntepen oo laiguanak le Israel.

¹⁶Ore apa teina kata near Manahem Tipua o pooki ootii atua, o lpolosien lenyena ebaiki Tirsa neito idia alo. Etaara apa te nkaraki neitu ninche ebolu ninye, nedanyaa nkoishua nkituaak pooki naairoishi.

¹⁷Ore to lari le tomoni uni o naaudo le nkitoria e Asaria olaiguanani le Yuda neiteru Menahen olayioni le Gadi aitoreisho te Israel, neitoreisho ilarin tomon te Samaria.

¹⁸Neas ninye mbaa torrok too nkonyek o Laitoriani; eitu ninye epaash te nkishui enye pooki ing'ok e Yeroboam olayioni le Nebat, naa ninche eitapong'orie Isiraeli metaasa ing'ok.

¹⁹Nelotu Pul olaiguanani le Asiria aarare ina kop; neisho Menahem Pul ntalantani enkalifu nabo e nkosholai, pee etum ninye ataretu ninye, meitagolo enkitoria enye.

²⁰Netasotuo apa Menahem nena pisai te Israel, aa taa, too ltung'ana pooki karsisi. Neitayu ake oltung'ani shekeli onom aisho olaiguanani le Asiria. Neaku etorrinye olaiguanani le Asiria, neitu eitoki aton teinakop.

²¹Ore apa nkulie kiaasin pooki e Manahem, nena pooki naataasa, neigeroki tiatua embuku oo ntepen oo laiguanak le Israel.

²²Neirura Mehahem etua anaa apa loo menye, neitoreisho Pekahia olayioni lenye te rishata enye.

²³Ore to lari le onom oaare le nkitoria e Asaria olaiguanani le Yuda, neiteru Pekahia olayioni le Menahem aitore Isiraeli te Samaria, neitoreisho ninye ilarin tikitam.

²⁴Neas ninye mbaa torrok too nkonyek o Laitoriani; eitu ninye epaash ing'ok e Yeroboam olayioni le Nebat naa ninche apa eitapong'orie Isiraeli.

²⁵Ore Peka ilo kitok lenye le enjore, olayioni le Remalia, nerresh ninye tenebo iltung'ana onom le Gilead ilo aiguanani, near ninye metua te Samaria, too lgilat le nkaji e nkitoo. Neitoreisho ninye te rishata enye.

²⁶Ore apa nkulie kiaasin e Pekahia, o nena pooki naataasa, neigeroki tiatua embuku oo ntepen oo laiguanak le Israel.

²⁷Ore to lari le onom o are le nkitoria e Asaria olaiguanani le Yuda, neiteru Peka olayioni le Remalia aitore Isiraeli te Samaria, neitoreisho ninye ilarin tikitam.

²⁸Neas ninye mbaa torrok too nkonyek o Laitoriani. Eitu ninye epaash ing'ok e Yeroboam olayioni le Nebat naa ninche apa eitapong'orie Isiraeli metaasa ing'ok.

²⁹Ore too nkolong'i e Peka olaiguanani le Israel nelotu Tiglat-Pilesa olaiguanani le Asiria neibung nkanas e Ijon o Abel-bet-maka o Yanoa o Kedesh o Hasor o Gilead o Galilaya, o enkop pooki e Naftali; neya iltung'ana eyararoto te Asiria.

³⁰Neitoki Hoshea, olayioni le Ela arresh Peka olayioni le Remalia, neosh ninye, near metua, neitoreisho ninye te rishata enye, to lari le tikitam le nkitoria e Yotam olayioni le Usia.

³¹Ore apa nkulie kiaasin pooki e Peka, o nena pooki naataasa ninye, neigeroki tiatua embuku oo ntepen oo laiguanak le Israel.

³²Ore to lari liare le nkitoria e Peka olayioni le Remalia, olaiguanani le Israel, neiteru Yotan olayioni le Usia ilo aiguanani le Yuda aitoreisho.

³³Oloo larin tikitam apa o imiet ninye pee eiteru aitoreisho, neitoreisho ilarin tomon o ile te Yerusalem. Ore apa enkarna e ng'otonye naa keji Yerusha entito e Sadok.

³⁴Neas ninye mbaa sidain too nkonyek o Laitorian, te risioroto e nena pooki apa naataasa papaai lenye Usia.

³⁵Ore ake eyia eitu apa eiwuang'ieki iwuejitin neeika. Eton ake epolosisho iltung'ana nepej enkorropil too wuejitin neeika. Etesheta apa ninye kishomi e shumata e nkaji o Laitoriani.

³⁶Ore apa nkulie kiasin e Yotan, o nena pooki naataasa, neigeroki tiatua embuku oo ntepen oo laiguanak le Yuda.

³⁷Ore apa te nena olong'i neiteru Olaitoriani airriwaa Resin olaiguanani le Siria o Peka olayioni le Remalia meshomo aagilunore Yuda.

³⁸Neirura Yotan etua anaa loo menye, nenukari ninye tenebo loo menye, tiatua enkanasa e Daudi papaai lenye. Neitoreisho Ahas olayioni lenye te rishata enye.