Read Maasai Bible – Biblia Sinyati 2 Ilaiguanak 18 Bible Online

2 Ilaiguanak 18 - Maasai Bible – Biblia Sinyati bible

2 Ilaiguanak 18

¹Ore to lari liokuni le nkitoria e Hoshea olayioni le Ela, ilo aiguanani le Israel, neiteru Hesekia olayioni le Ahas ilo aiguanani le Yuda aitoreisho.

²Oloo larin tikitam o imiet apa ninye pee eiteru aitoreisho. Neitoreisho ninye ilarin tikitam ooudo te Yerusalem. Ore apa enkarna e ng'otonye naa keji Abi entito e Sekaria.

³Neas ninye mbaa sidain too nkonyek o Laitoriani, te risioroto e nena pooki apa naataasa Daudi papaai lenye.

⁴Eiwuang'ie ninye iwuejitin neeika, neuroo ing'apeta, nedung Asherim. Nebel aitaa mbelibelat ilo asurai apa lo suyai oitobira Musa, amu ore ebaiki nena olong'i kepejoo apa iltung'ana le Israel enkorropil teine. Keji apa ine Nehushatan.

⁵Eisiliga apa ninye Olaitoriani Enkai oo Siraeli; neaku meetae oltung'ani oikununo anaa ninye too laiguanak pooki le Yuda te siadi ninye, anaa te lelo apa ootii te dukuya ninye.

⁶Eiruko apa ninye Olaitoriani, eitu epaash esujata enye, kake eibung'a nena kitanapat apa naaitanapa Olaitoriani Musa.

⁷Netii apa Olaitoriani tenebo ninye, ore pooki wueji neshomo, ninye nedupoyu. Etapong'ote ninye O laiguanani le Asiria neany eisiaai ninye.

⁸Etaara apa ninye Ilfilisti ebaiki Gasa o metabaiki ilpolosien lenyena, o ebaiki oltalet ometabaiki enkanasa nasheta isunta.

⁹Ore to lari liong'uan le nkitoria e Hesekia, laa ninye olari liopishana le nkitoria e Hosea olayioni le Ela, ilo aiguanani le Israel nelotu Shalamanesa olaiguanani le Asiria agilunore Samaria neman ninye ang'adu.

¹⁰Ore te nkiting'oto oo larin okuni neya ninye. Ore to lari le ile le nkitoria e Hesekia laa ninye olioudo le nkitoria e Hoshea, olaiguanani le Israel, neyai Samaria.

¹¹Ewa apa olaiguanani le Asiria Isiraeli eyararoto te Asiria, nelo apik ninche atua Hala, nepik embata olkeju le Gosam, o atua nkanas oo Lmedi,

¹²te nkaraki neitu ninche ening oltoilo lo Laitoriani Enkai enye, kake etogolong'akita ilo sotua, o nena sii pooki apa naaitanapishe Musa osinka lo Laitoriani, neitu ening anaa eibung.

¹³Ore to lari le tomon oong'uan le nkitoria o laiguanani Hesekia, nelotu Senakerib olaiguanani le Asiria agilunore nkanas pooki naasheta isunta e Yuda, neya ninche.

¹⁴Neirriwaki Hesekia olaiguanani le Yuda olkilikuai olaiguanani le Asiria te Lakish, ajoki, “Ataasa nanu entorroni; tapalaki nanu, naa ore pooki toki nikinteleikiki nanu naa kanap.” Ore apa entoki nayieu olaiguanani le Asiria to laiguanani le Yuda naa talanta iip uni e nkosholai, o talanta tomoni uni e saabu.

¹⁵Neisho Hesekia ninye enkosholai pooki apa nanotoki tiatua enkaji o Laitoriani, o tiatua ilchumat le nkaji o laiguanani.

¹⁶Ore apa teina kata nekinyu Hesekia saabu pooki too nkutukie oo nkajijik e nkaji o Laitoriani, o ntaloishin oo nkutukie oo nkajijik apa naatumura Hesekia olaiguanani le Yuda, neisho olaiguanani le Asiria.

¹⁷Neirriwaa olaiguanani le Asiria Tatan le Rabsari, o Rabshake eeta enjore kitok, naing'uaa Lakish pee erasaki Hesekia te Yerusalem. Ore ake pee ebau nepuonu aaitashe te mbata olchorro le shumata, otii enkoitoi oo laitobirak loo nkilani.

¹⁸Ore ake pee eipotu olaiguanani neipang'aki ninche Eliakim olayioni le Hilkia, laa ninye apa oitasheiki enkaji e nkitoo, o Shebna laa ninye apa olasirani, o Yoa olayioni le Asaf ilo aigeroni.

¹⁹Nejoki Rabshake ninche, “Entiaaki Hesekia Nji ejo olaiguanani kitok, ilo aiguanani le Asiria: ‘Kainyoo iyie ingarakino?’

²⁰Ijo doi kiaku irorei ake engolon to larrabal? Kaing'ae taata iyie ingarakino, peyie kitogolong'aka nanu?

²¹Ng'ura ajo Misiri iyie ingarakino, ilo peresi otigile, orem enkaina e pooki tung'ani oigarakino. Neijia etiu Farao olaiguanani le Misiri te pooki tung'ani oigarakino ninye.”

²²Kake tenikijoki iyie nanu, “Olaitoriani Enkai ang kingarakino iyiook” aime ilo eiwuang'ie Hesekia iwuejitin enyena neeika, ejoki Yuda, o Yerusalem, “Te dukuya ele perere lo lasar intae enteseremisho te Yerusalem?

²³Wootu taata matoning'oto o lkitok lai olaiguanani le Asiria: Kaaisho nanu iyie mbartan iip are; tenindim iyie te nkalo ino atipika ilakedok shumata ninche.

²⁴Kaji naa iyie inko tenintasheikinore obo ninye le lelo aisiaayiak ooti lo lkitok lai aa Misiri ingarakino too ngarrin oo mbartan o too mbartan?

²⁵Amaa ake sii, aijo ke nkaraki nemetii Olaitoriani pee aewuo nanu agilunore ena kop naidaikie ninye? Aatiaaka nanu Olaitoriani, shomo tigilunore ene wueji, nindaikie.”

²⁶Neitoki Eliakim olayioni le Hilkia, o Shebna o Yoa, aajoki Rabshake, “Kitoomono iyie, irorei isinkan linono te nkutuk e Aramea, amu ninye kiyiolo. Mintoki airorie iyiook te nkutuk e Yuda metoning'o iltung'ana ootii esuntai.”

²⁷Kake etiaaka Rebshake ninche, “Aatiaaka olkitok lai pee aliki kulo rorei olkitok linyi, o ntae, neme lelo tung'ana ootii esuntai, laa kenya inkik tenebo ntae neok inkulak enye?”

²⁸Neitoki Rabshake aitashe nebuaku to ltoilo sapuk, te nkutuk e Yuda, ajo, “Entoning irorei lo laiguanani kitok, olaiguanani le Asiria!

²⁹Nji ejo olaiguanani: Emincho Hesekia meteleja intae, amu meidim ninye aitajeu intae te nkaina ai.

³⁰Emincho Hesekia ejoki intae eji pee ingarakinono Olaitoriani ejo, ‘Ekesipa kekordu iyiook Olaitoriani, nemeishoori ena anasa aapik inkaik o laiguanani le Asiria.’

³¹Emining intae Hesekia, amu nji ejo olaiguanani le Asiria; Ntobira olning'o o nanu, nilotu enatii; ore pooki ng'ae te intae, nenya enkurma enye oo sabibu, nenya pooki ng'ae ilng'anayio lo lng'aboli lenye; neok pooki ng'ae enkare olchorro lenye;

³²ometaba anaa narik intae enkop naikununo anaa enkop inyi, enkop e ntapa o enaisho oo sabibu, enkop oo mukateni o nkurman oo sabibu. Enkop oo loirienito o enaisho, pee ipuopuo aapok, nimiyeye. Nimining'ining'i Hesekia teneitapong'oo intae, ajo, ‘Kekordu iyiook Olaitoriani.

³³Keetae aekata enkai oo loreren naitajeuo enkop enye te nkaina o laiguanani le Asiria?

³⁴Koree inkaitin e Hamat o Arpad? Koree inkaitin e Sefarfaim, Hena o Ifaa? Ketokordutua ninche Samaria aaitupuku tiae aina hoo nabo?

³⁵Kaa tiatua inkaitin oo nkuapi, natokordua nkuapi enye aitupuku te nkaina ai, eji metaa kekordu Olaitoriani Yerusalem aitupuku te nkaina ai?’ ”

³⁶Kake etigirate iltung'ana neitu ewaliki ninye olomoni hoo obo; amu ore apa enkitanapata o laiguanani naa, “Kejo emiwaliki ninye.”

³⁷Ore Eliakim olayioni le Hilkia laa ninye apa oitasheiki enkaji e nkitoo, o Shebna, ilo aigeroni, o Yoa olayioni le Asaf ilo asirani, nepuonu enetii Hesekia etopolosa nkilani enye, neliki ninche ninye lelo rorei le Rabshake.