Read Maasai Bible – Biblia Sinyati 2 Ilaiguanak 19 Bible Online

2 Ilaiguanak 19 - Maasai Bible – Biblia Sinyati bible

2 Ilaiguanak 19

¹Ore ake pee ening Hesekia ina, nepolos inkilani enyena neimulumul kewan too lkuniyiani nelo atua enkaji o Laitoriani.

²Neirriwaa ninye Eliakim, laa ninye apa oitasheiki enkaji e nkitoo, o Shebna ilo aigeroni, o lapolosak kituaak ooimulumula ate too lkuniyiani, neirriwaki ninche Isaya olayioni le Amos.

³Nejoki ninche ninye, “Nji ejo Hesekia; Ore ena olong naa enkolong o sina, enkolong e nkisikong'ata naa enkolong e sulare, etoiwuoki inkera nemeeta ninche engolon nabulunye.

⁴Ebaiki netoning'o Olaitoriani Enkai ino lelo rorei pooki le Rabshake, laa ninye eirriwua olkitok lenye ilo aiguanani le Asiria meeu amor Enkai naishu. Keisikong Enkai ninye te nkaraki lelo rorei ootoning'o. Ore naa taata ilepie enkomono te nkaraki ilo pisiai otelekua.”

⁵Ore ake pee epuonu isinkan lo laiguanani Hesekia enetii Isaya,

⁶nejoki Isaya ninche, “Entiaaki olkitok linyi, ‘Nji ejo Olaitoriani: Miureishoyu te nkaraki lelo rorei litoning'o, laa ninche aatusukenyie nanu isinkan leilo aiguanani le Asiria.

⁷Ng'ura ajo kapik nanu ninye oltau lo lkirutoto paa te nening olkilikuai lai, nerrinyo alo enkop enye makewan, naisho nanu metabatatayu to lalem tiatua enkop enye makewan.’ ”

⁸Nerrinyo Rabshake neinepu olaiguanani le Asiria earare Libna; amu etoning'o ninye nchere etung'uayie olaiguanani Lakish.

⁹Ore ake pee ening olaiguanani nchere etudumunye Tihaka olaiguanani le Etiopia, alotu aarare ninche, neirriwaki ilkiliku arewaki Hesekia ejo,

¹⁰“Nji enchom entiaki Hesekia, olaiguanani le Yuda, ‘Mincho kilej ina Ai nisiligita tenikisiligie ninye iyie nchere meyae Yerusalem aapik inkaik o laiguanani le Asiria.

¹¹Ng'ura itoning'o iyie enaitaasa ilaiguanak le Asiria nkuapi pooki, eidaike ninche katukul. Paa ijo iyie eikikorduni?

¹²Amaa nena aitin oo loreren ketokordutua ninche, lelo oshon apa ooidaikie loo papa, Gosan o Haran, o Resef o ltung'ana le Eden apa ootii Telasa?

¹³Koree olaiguanani le Hamat o laiguanani le Arpad, o laiguanani le nkanasa e Sefarfaim o laiguanani le Hena, anaa olaiguanani le Ifaa?’ ”

¹⁴Neng'amaa Hesekia ina palai too nkaik e lelo kiliku, neisuma; neilep Hesekia alo enkaji o Laitoriani, neisalaash ina palai te dukuya Olaitoriani.

¹⁵Neomon Hesekia te dukuya Olaitoriani, nejo, “Olaitoriani Enkai oo Siraeli, iton iyie to lorika le nkitoo te shumata ilkerubi. Ira iyie Enkai, naa iyie ake Enkai, tiatua nkitoriat pooki e nkop. Iyie oitobira keper o enkop.

¹⁶Irrugu enkiok ino Olaitoriani toning'o, tabolo nkonyek inono, Olaitoriani toduaa, nining kulo rorei le Senakerib, ooirriwua ninye pee elotu amor Enkai naishu.

¹⁷Kesipa, Olaitoriani, nchere eitomijoono ilaiguanak le Asiria iloreren o nkuapi enye,

¹⁸nenang'aki inkaitin enye atua enkima; amu mme nkaitin apa ninche, kake esiaai oo nkaik e tung'ani oo nkeek o soito. Ore te nkaraki ina eidaikieki ninche.

¹⁹Ore naa taata Olaitoriani Enkai ang, ntajeu iyiook, aatasayia, ntung'uai iyiook enkaina enye, pee etum nkitoriat pooki e nkop aatayiolo nchere, iyie Olaitoriani, iyie ake Enkai.”

²⁰Neitoki Isaya olayioni le Amos airriwaki Hesekia olkilikuai ajoki, “Nji ejo Olaitoriani Enkai oo Siraeli: ore ina omono nikitoomono te nkaraki Senakerib olaiguanani le Asiria, atoning'o nanu.

²¹Ele rorei eiroro Olaitoriani oipirta ninye: “Kitemenayie ninye iyie, kitusurdaanya ninye iyie Yerusalem; eipirripir endukuya enye te siadi iyie; Yerusalem.

²²“Kaing'ae doi ilo litamoro nisurdaany? Kaing'ae ilo lidumaki oltoilo lino, nishumaki inkonyek inono to lwuasa? Ilo Osinya le Israel!

²³Ore te lelo kiliku linono nitamoro Olaitoriani, nitejo iyie, ‘Ore te nkumoi oo ngarrin aainei oo mbartan, ailepa nanu alo nchumat oo ldoinyo, o mashomo atua Lebanon, atuuroyie nanu iltarakua lenyena adoru aaisul, o lelo keek lenyena gelunot; atijing'a nanu atua nalo atua ina tim enye nagol.

²⁴Atuturuo ilchorroi naok inkariak enkop eeiking'a, naituny nanu too nkejek aainei nchorroi pooki nelepo e Misiri.’

²⁵“Keitu aekata iyie ining ajo aitobira apa ina te musano? Aitobira apa nanu moitie ena taata nalo aitabaya, nchere ore inkanas naasheta isunta naa ilo aitaa osototi loo suut.

²⁶Meeta apa lelo oomanya engolon, neiputukunyo neidang, etotiutuo ninche anaa nkaitubulu e ong'ata, o anaa nkujit naanana, etotiutuo anaa nkujit naabulu too nchumat oo nkajijik, te nekut olkutati eton eitu ebulu.

²⁷“Kake kayiolo nanu oltonei lino, o enkipang'ata ino o enjing'unoto ino, o ina nikigilunore iyie nanu.

²⁸Ore te nkaraki nikitigilunore iyie nanu, netabaikia enkitokoos ino nkiyiaa aainei, kapik nanu olalae lai oololo enkume ino, napik olgisoi lai enkutuk ino, naarriny nanu iyie aing'orie ina oitoi niimua.

²⁹“Naa ena nalo aaku olmonekie te intae: ore tele ari, ninyanya intae nena naabulu oopeny. Ore to lari liare ninyanya nena ake, ore to lari liokuni, niunuunu ninkesikese, niunuunu isabibu, ninyanya ilng'anayio lenye.

³⁰Ore ilo pisiai oleku le nkaji e Yuda neitoki aibung ntona, neiu ilng'anayio.

³¹Amu te Yerusalem epuku ilo pisiai, naa to ldoinyo le Sion epuku olturrur le lelo ooleku. Olom lo Laitoriani olo aas ena.

³²“Ore te nkaraki ina nji ejo Olaitoriani tialo olaiguanani le Asiria, melotu ninye ajing'u atua ena anasa, anaa eng'oroo embae tene. Melotu ataanikini ninye eeta elong'o, anaa elotu aman ang'adu.

³³Ore ina oitoi apa naimua ninye, ina ake eitoki aim errinyo, nemelotu ninye ena anasa, Olaitoriani ojo.

³⁴Amu kamitu nanu ena anasa aitajeu te nkaraki kewan ai o te nkaraki o sinka lai Daudi.”

³⁵Ore ina kewarie nelo olmalaika lo Laitoriani aar metuata iltung'ana inkalifuni iip nabo o ntomoni isiet o imiet too lng'oborri le Asiria: ore ake pee einyototo iltung'ana tadekenya, nedol etuata kulo pooki.

³⁶Nedumunye taa Senakerib olaiguanani le Asiria alo ang, nelo abik te Ninawi.

³⁷Ore eomonito ninye tiatua enkaji e Nisrok, ina ai enye, near Adramelek o Sheresa, lelo ayiok lenyena ninye to lalem, neisik aapuo enkop e Ararat. Neitoreisho Esarhadon olayioni lenye te rishata enye.