Read Maasai Bible – Biblia Sinyati 2 Ilaiguanak 22 Bible Online

2 Ilaiguanak 22 - Maasai Bible – Biblia Sinyati bible

2 Ilaiguanak 22

¹Oloo larin isiet apa Yosia pee eiteru aitoreisho, neitoreisho ninye ilarin tomoni uni oobo te Yerusalem. Ore apa enkarna e ng'otonye naa keji Yedida entito e Adaia le Boskat.

²Etaasa apa ninye mbaa sidain too nkonyek o Laitoriani, neibung orrekie le Daudi papaai lenye, neitu ninye eibelekenya alo enkaina e tatene anaa enkalo e kedianye.

³Ore to lari le tomon o isiet le nkitoria o laiguanani Yosia, neirriwaa olaiguanani Shafan olayioni le Asalia, olayioni le Meshulam, laa ninye olaigeroni le nkaji o Laitoriani, nejoki,

⁴“Ilepa shomo enetii Hilkia ilo apolosani kitok, pee etum aigero esiana oo mpisai naayauaki enkaji o Laitoriani, nena naatang'amutua lelo arripok le kishomi too ltung'ana;”

⁵naa nchoo eishori lelo aitasheikinok loo laisiaayiak le nkaji o Laitoriani. Nchoo ninche meishoo lelo aisiaayiak ootii enkaji o Laitoriani, aaram ina aji.

⁶Aa taa ilaguetak loo mbaoi, o lashetak, o lashetak loo soito, neinyiang'unyieki mbaoi neturuni soito pee eitobirieki aaram ina aji.

⁷Kake meikeni nena pisai tialo ninche amu keasisho ninche te nkoitoi naisiligayu.

⁸Nejoki Hilkia ilo apolosani kitok Shafan olaigeroni, “Anoto nanu embuku oo nkitanapat tiatua enkaji o Laitoriani.” Neisho Hilkia ina buku Shafan, neisum ninye.

⁹Nelotu Shafan ilo aigeroni enetii olaiguanani, neliki olaiguanani ajoki, “Eitayutuo isinkan linono nena pisai naanotoki tiatua enkaji, newaita ninche aapik inkaik e lelo aisiaayiak ooitasheiki enkaji o Laitoriani.”

¹⁰Neitoki Shafan ilo aigeroni ajoki olaiguanani, “Aaishoo nanu Hilkia olapolosani embuku.” Neisum Shafan ina buku te dukuya olaiguanani.

¹¹Ore ake pee ening olaiguanani irorei leina buku oo nkitanapat, nepolos inkilani enyena.

¹²Neitanap olaiguanani Hilkia ilo apolosani, o Ahikam olayioni le Shafan o Akobor olayioni le Mikaia o Shafan olaigeroni o Asaiya osinka lo laiguanani ajoki,

¹³“Enchom enkilikuanishore Olaitoriani te nkaraki nanu, o te nkaraki olorere, o te nkaraki Yuda pooki, tialo rorei ootii ena buku nanotoki, amu aikitok engoro o Laitoriani nayupuyupo te nkaraki iyiook, te nkaraki neitu eibung iloo papa irorei lena buku, pee eas nena pooki naaigeroki, naaipirta iyiook.”

¹⁴Nelo Hilkia ilo apolosani o Ahikam o Akobor o Shafan o Asaya enetii Hulda ina oiboni. Ore apa ina oiboni naa enkitok e Shulam olayioni le Tikfa, olayioni le Harhas. Olaing'urani apa lo sanduku loo nkilani ilo payian le Hulda, (naa Yerusalem apa namanya ninche), ina manyisho e are ina kata pee eirorie ninche.

¹⁵Nejoki ninye ninche, “Nji ejo Olaitoriani, Enkai oo Siraeli: ‘Tiaaki ilo tung'ani likirriwua enatii,

¹⁶Nji ejo Olaitoriani, Ng'ura kayau nanu entorroni shumata ene wueji, o shumata lelo oomanya lelo rorei pooki leina buku ooisuma olaiguanani le Yuda.

¹⁷Te nkaraki naatung'uaitie ninche nanu, netapejo ninche enkorropil te nkaraki nkulie aitin, pee aatum ninche aaitagoro teina siaai pooki oo nkaik enye. Ore te nkaraki ina keyupuyup engoro ai te nkaraki ene wueji, nemeyagaa.

¹⁸Kake ore te nkaraki olaiguanani le Yuda, laa ninye likirriwua pee inkilikuanishore Olaitoriani, nji iyie shomo tiaaki ninye, Nji ejo Olaitoriani Enkai e Israel: Ore tialo lelo rorei likitoning'o,

¹⁹ore te nkaraki nairridua oltau lino, nintoborro kewan te dukuya Olaitoriani, ina kata pee ining ajo airoro inaaipirta ene wueji, o lelo oomanya, nchere keaku ninche olmuaate o ldeket, nitopolosa iyie inkilani inono ninchir te dukuya nanu. Aatoning'o sii nanu iyie, Olaitoriani ojo.

²⁰Ore naa kaaya nanu iyie aiturrurroki loo papaai lino apa ootuata, nilo aiturrurro te nkurare ino te seriani, nemedol inkonyek inono ina torroni nayau nanu ene wueji.’ ” Neyaki ninche olaiguanani ilo rorei.