Read Maasai Bible – Biblia Sinyati 2 Ilaiguanak 6 Bible Online

2 Ilaiguanak 6 - Maasai Bible – Biblia Sinyati bible

2 Ilaiguanak 6

¹Etiaakita apa nkera oo loibonok le Nkai Elisha, “Ng'ura ajo eikitii ene wueji nikitii tiabori eutaroto ino.

²Nchoo iyiook maape Yordan neyau ake pooki ng'ae te iyiook embokishi, pee kintobir ewueji nikibikie teine.” Newaliki ajo, “Enchom.”

³Neitoki obo lenye ajoki, “Tonyorrai shomo tenebo isinkan linono.” Newalu ninye ajo, “Kalo nanu.”

⁴Neaku eshomo ninye tenebo ninche. Ore ake pee epuonu ninche Yordan nedung ilkeek.

⁵Kake ore egira obo lenye auroo olchani nedoiki entolu enye atua enkare, neishir ninye ajo, “Oi olkitok lai! Katoomonuo apa ena tolu.”

⁶Neitoki ilo tung'ani le Nkai ajo, “Eitiaji etadoiyie.” Ore ake pee eitodol Elisha ine wueji, nedung'u ninye enchata nenang'aki ine, nepor ina dukuya e ntolu enkare.

⁷Nejoki ninye, “Intayu.” Neitorioo ilo tung'ani enkaina enye neitayu.

⁸Ore apa earare olaiguanani le Siria Isiraeli, neiguana ninye o sinkan lenyena ejo, “Ore te wueji neje o eneje naun nanu ilng'oborri laainei.”

⁹Kake eirriwaka oltung'ani le Nkai olkilikuai olaiguanani loo Siraeli ajoki, “Toduaa ake migiroo ene wueji, amu etadoitie iltung'ana le Siria aapuo ine.”

¹⁰Neirriwaa olaiguanani loo Siraeli oltung'ani meshomo ine netiaaka ninye oltung'ani le Nkai. Neaku ninye oikok ninye, neitajeuo ninye kewan katitin naagiroo nabo anaa are.

¹¹Nenyamalu oltau lo laiguanani le Siria te nkaraki ena bae; neipotu isinkan lenyena nejoki ninche, “Entoduaaki aajo kalo tiatua ntae otii enkalo o laiguanani loo Siraeli?”

¹²Nejoki obo loo sinkan lenyena, “Meetae, lo kitok lai, olaiguanani kake Elisha ilo oiboni le Nkai otii atua Israel, ninye ojoki olaiguanani loo Siraeli lelo rorei liro iyie tiatua olgilata lino le rruat.”

¹³Nejo ninye, “Enchom entodol enetii ninye, pee airriwaa nanu iltung'ana meshomo aayau ninye.” Nejokini ninye, “Ng'ura etii ninye Dotan.”

¹⁴Neirriwaa ninye mbartan meshomo ine, o ngarrin oo mbartan o enjore kitok nepuonu ninche kewarie, neman enkanasa aang'adu.

¹⁵Ore ake pee einyototo osinka lo ltung'ani le Nkai tadekenya, neipang alo boo, nedol etamana duoo enjore oo mbartan o ngarrin oo mbartan enkanasa. Nejo ilo sinka, “Oi lokitok lai! Kaa iyiook kiaas?”

¹⁶Nejoki Elisha ninye, “Miureisho, amu ore lelo ootii tenebo iyiook naa eikumok aalang lelo ootii tenebo ninche.”

¹⁷Neitoki Elisha aomon nejo, “Olaitoriani, aatoomono iyie tabolo inkonyek enyena pee etum atoduaa.” Nebol Olaitoriani inkonyek eilo barnoti, nedol ninye, naa ng'ura ebore ilo doinyo mbartan o ngarrin oo mbartan e nkima naamanita Elisha.

¹⁸Ore pee epuonu iltung'ana le Siria aagilunore ninye, neomon Elisha Olaitoriani, nejo, “Toosho kulo tung'ana aatoomono, ntamodoo.” Neaku etoosho Olaitoriani aitamodok ninche te risioroto e nkomono e Elisha.

¹⁹Nejoki Elisha ninche, “Mme enkoitoi ena, neme enkanasa ena; entusujaki nanu, pee arikoki nanu intae ilo tung'ani ling'oruru.” Nerik ninye ninche Samaria.

²⁰Ore ake enabaunye ninche Samaria, nejo Elisha, “Olaitoriani, tabolo nkonyek e kulo tung'ana, pee etum aatodolisho.” Nebol Olaitoriani inkonyek enye, nedolishoyu ninche, nedol etii ninche empolos e Samaria.

²¹Ore ake pee edol olaiguanani loo Siraeli ninche, nejoki Elisha, “Papaai lai, aar ninche metuata?”

²²Aar ninche metuata, “Newal ninche ajo miaar iyie ninche metuata lelo litaarua to lalem lino o too mbaa inono? Nchoo ninche endaa o enkare, pee etum ainosa neok, nepuo enetii olkitok lenye.”

²³Neitobiraki ninye ninche osirua sapuk; ore ake pee eidip aainosa endaa neokisho, neisho ninche meshomo, nepuo ninche enetii olkitok lenye. Neitu aekata eitoki iltung'ana le Siria aapuonu aarasaki enkop e Israel.

²⁴Ore etulusoitie nena neipotu Benhadad olaiguanani le Siria enjore enye pooki, neilep alo aman ang'adu Samaria.

²⁵Netii apa olameyu kitok Samaria, ina kata pee eman ninche ninye. Etaa apa ore endukuya o sikiria naa shekeli ntomoni isiet e nkosholai emirieki, ore enkiti pirbil oo nkik e nturkuluo naa shekeli imiet e nkosholai.

²⁶Ore apa eloito olaiguanani loo Siraeli te nchumata e suntai, neishiraki ninye enkitok, ejoki, “Taretuoki, olkitok lai olaiguanani!”

²⁷Nejoki olaiguanani ninye, “Amaa teneitu kiret Olaitoriani kaji nanu aiko tenaaret? Te wueji neidong'ishoreki aashu te wueji neironyieki isabibu?”

²⁸Neitoki olaiguanani aikilikuan ninye ajoki, “Kainyoo enyamali ino?” Newaliki ninye ajoki, “Aatiaaka nanu ena kitok, ‘Iyau enkerai ino pee kinya ninye taata, ore taisere nikinya enkerai ai.’

²⁹Nikiyier iyiook enkerai ai nikinya. Ore pee ekenyu najoki nanu ninye, ‘Iyau enkerai ino, pee kitum aainosa’; neisudoo ninye enkerai enye.”

³⁰Ore ake pee ening olaiguanani irorei leina kitok, nepolos inkilani enyena ore ina kata negira ninye alo te nchumata e suntai nedol iltung'ana aajo keishopito ninye ilkuniyiani tiatua nkilani enyena.

³¹Nejo ninye, “Maaitaasa nanu Enkai ena neitulusoo, teneitu edung'ori endukuya e Elisha olayioni le Shefat ena olong.”

³²Netonita apa Elisha te nkaji enye, netonita ilpayiani tenebo ninye. Neirriwayie apa olaiguanani oltung'ani, kake ore eton eitu ebaiki ilo kilikuai Elisha, nejoki Elisha lelo payiani, “Idolidolo aajo eirriwua ele oitayu iloikop oltung'ani laalotu adung'oo endukuya? Eng'orisho, ore ake pee elotu ilo kilikuai ninkenikene kutukaji, nimbung'ubung'u enkikenet e kutukaji aaibooyo ninye. Aimening'o oltoilo loo nkejek olkitok lenye te siadi ninye?”

³³Ore eton eirorita ninye o lelo payiani, nedou olaiguanani alotu enetii ninye, nejoki, “Ore ena nyamali naa Olaitoriani eing'uaa! Kainyoo nanu pee aitoki aanyu Olaitoriani?”