Read Maasai Bible – Biblia Sinyati 1 Intepen 13 Bible Online

1 Intepen 13 - Maasai Bible – Biblia Sinyati bible

1 Intepen 13

¹Neikilikuanishore apa Daudi ilarikok loo nkalifuni, o loo maa iip o pooki arikoni.

²Nejoki Daudi ina umata oo Siraeli, “Tenidolidolo intae eishiakino, naa tenaa eyieunoto o Olaitoriani Enkai ang, mairriwaki olkilikuai lelo alashera lang apa ootung'uaiyioki te nkop e Israel o tenebo lelo apolosak ootii atua nena anas naata ndaat oo nchoo pee etum ninche aaetu tenebo enikitii.

³Naa manyaaki iyiook aayau osanduku le Nkai ene nikitii amu kitapalaitie apa too nkolong'i e Saul.”

⁴Nenyorraa ina umata pooki aas ina, amu eisidai apa ina bae too nkonyek o lorere.

⁵Neiturrur apa Daudi Israel pooki ebaiki Shihor e Misiri o meetu enejing'ieki Hamat, pee eyau osanduku le Nkai te Kiriat-Yearim.

⁶Ore Daudi o ltung'ana le Israel pooki neilep aapuo Baala, aa taa Kiriat-Yearim natii Yuda, pee epuo aayau teine osanduku le Nkai, laa ninye eipotieki Olaitoriani oton te nchumata oo Lkerubi.

⁷Nenap ninche ilo sanduku le Nkai te ngarri ng'ejuk, aaitung'uaa enkaji e Aminadab, naa Usa, o Ahio apa ooreu ina garri.

⁸Ore Daudi o Siraeli pooki neshipa te dukuya Enkai te nkidimata enye pooki, to sinkolio o to lwulul loo usin o too nkai oo sinkolioitin o too ndulen o too nkinantani dapashi o too sekekuani.

⁹Ore ake pee ebau olkurroto oidong'ishoreki le Kidon, neiteleiki Usa enkaina enye ilo sanduku, amu etarrorre apa ilo kiteng oyietita,

¹⁰neyupuyup engoro o Laitoriani tialo Usa; neosh ninye te nkaraki naitorioyie enkaina enye aibung ilo sanduku; neye ninye teine te dukuya Enkai.

¹¹Negoro Daudi te nkaraki natarasaka Olaitoriani Usa; ore ine wueji neaku keji Peres Usa; o taata.

¹²Neureyu Daudi Olaitoriani oleng ina olong, nejo ninye, “Kaji nanu aiko tenayau osanduku le Nkai enkaji ai?”

¹³Neaku eitu eya Daudi ilo sanduku ang, atua enkanasa e Daudi, kake eibakibakie aya enkaji e Obed-edom le Giti.

¹⁴Neton ilo sanduku le Nkai te nkaji e Obed-edom ilapaitin okuni, nemayian Olaitoriani enkaji e Obed-edom o pooki toki naata.