Read Maasai Bible – Biblia Sinyati 1 Intepen 14 Bible Online

1 Intepen 14 - Maasai Bible – Biblia Sinyati bible

1 Intepen 14

¹Eirriwayie apa Hiram olaiguanani le Tiro olkilikuai enetii Daudi o ltarakua o laguetak loo soito sii o laguetak loo mbaoi, pee eshetaki enkaji.

²Nemusu Daudi ajo eitasheyie Olaitoriani ninye metaa olaiguanani le Israel, ore enkitoria enye neisisi oleng te nkaraki iltung'ana lenyena Israel.

³Neyam Daudi nkituaak kumok te Yerusalem, netum Daudi ilayiok kumok o ntoyie.

⁴Kuna ninche nkarn o nena kera naanoto ninye te Yerusalem: Shamua o Shobab o Natan o Solomon,

⁵o Ibar o Elishua o Elpelet

⁶o Noga o Negef o Yafia

⁷o Elishama o Bediada o Elifelet.

⁸Ore ake pee ening Lfilisti aajo etuputoki Daudi aaitaa olaiguanani te Israel pooki, nepuo Lfilisti pooki aaing'oru Daudi; nening Daudi ina nelo agilunore ninche.

⁹Neetuo apa Lfilisti nerasaki oerata le Refaim.

¹⁰Neikilikuanishore Daudi Olaitoriani ejo, “Kalo nanu aarare Lfilisti?” Nchoru iyie ninche apik atua enkaina ai? Newaliki Olaitoriani ninye ejo, “Ilepa shomo, amu kaishoru nanu ninche apik atua enkaina ino.”

¹¹Neilep ninye alo Baalperasim, nemir Daudi ninche teine; nejo Daudi, “Etusulaka Enkai ilmang'ati laainei enkaina ai, anaa oloirrag le nkare.” Ore te nkaraki ina naa keji enkarna eine wueji Baalperasim.

¹²Neing'uaa Lfilisti nkaitin enye teine neitanapisho Daudi pee epejori.

¹³Neigil ake Lfilisti aarasaki ilo erata.

¹⁴Ore ake pee eigil Daudi aikilikuanishore Enkai, nejoki Enkai ninye, “Milo iyie asujaa ninche; tamanai shomo pee ilo arasaki ninche te nkishaakinoto oo lkeek adoru ooji Balsam.

¹⁵Ore ake pee ining oltoilo le nkiyukoto te nchumata oo lkeek adoru ooji Balsam, shomo taa tarasaki ninche; amu eshomo Enkai te dukuya iyie pee eosh enjore oo lfilisti.”

¹⁶Neas Daudi anaa enaitanapa Enkai, near ninche enjore oo Lfilisti ebaiki Gibeon ometabaiki Geser.

¹⁷Nelo olning'o le Daudi aibulaa too nkuapi pooki, neyau Olaitoriani euriata enye shumata nkuapi pooki.