Read Maasai Bible – Biblia Sinyati 1 Intepen 15 Bible Online

1 Intepen 15 - Maasai Bible – Biblia Sinyati bible

1 Intepen 15

¹Eteshetaka apa Daudi kewan nkajijik te nkanasa e Daudi; neitobir ewueji nepiki osanduku le Nkai, neunoki olng'obor shumata ninye.

²Nejo Daudi, “Meetae hoo oltung'ani obo meteleku Ilawi ake ooidim aatanap osanduku le Nkai, amu etegelua Olaitoriani ninche metanapa osanduku lo Laitoriani, neisiai ninye ntarasi.”

³Neiturrur Daudi Israel pooki te Yerusalem, pee etum aayau osanduku lo Laitoriani ewueji enye; ine apa neitobiraki.

⁴Neiturrur Daudi tenebo ilayiok le Aron o Lawi:

⁵loo layiok le Kora o Uriel ilo kitok, tenebo lelo alashera lenyena iip o tikitam;

⁶ore too layiok le Merari, naa Asaia ilo kitok, tenebo ilalashera lenyena iip are o tikitam.

⁷Ore too layiok le Gershom, naa Yoel ilo kitok tenebo ilalashera lenyena iip o tomoni uni;

⁸ore too layiok le Elisafan, naa Shemaia ilo kitok, tenebo ilalashera lenyena iip are.

⁹Ore too layiok le Hebron naa Eliel ilo kitok, tenebo ilalashera lenyena ntomoni isiet.

¹⁰Ore too layiok le Usiel naa Aminadab ilo kitok tenebo ilalashera lenyena iip o tomon oaare.

¹¹Neitoki Daudi aipotu ilapolosak, Sadok o Abiata o Lawi o Uriel o Asaia, o Yoel o Shemaia o Eliel o Aminadab,

¹²nejoki ninche, “Irara intae ilukuny oo nkajijik oo le Lawi, entisinya naa ate, intae o lalashera linyi, pee itumutumu aayau osanduku lo Laitoriani, Enkai oo Siraeli, ine wueji naitobiraka nanu ninye.

¹³Ore te nkaraki neitu apa intae inapinapa te dukuya, etagorokine iyiook Olaitoriani Enkai ang, te nkaraki neitu iyiook kishilaa teina oitoi, nategeluaki.”

¹⁴Kaae neitisiny ate ilapolosak o Lawi, pee etum aayau osanduku lo Laitoriani Enkai e Israel.

¹⁵Nenapu Ilawi ilo sanduku le Nkai too loilila lenye too mbokishi, anaa apa enaitanapishe Musa te risioroto o rorei lo laitoriani.

¹⁶Neitoki sii Daudi aitanap lelo kituaak loo Lawi, pee egelu ilalashera lenye pee eranyisho nebuaku te oshoto oo nkinantani, too nkai oo sinkoliotin o lwululi loo usin o nkinantani, neilepie oltoilo le ng'ida.

¹⁷Neaku etegelutua apa Ilawi Heman olayioni le Yoel o lalashera lenyena, Asaf olayioni le Berekia; o layiok le Merari o lalashera lenye o Etam olayioni le Kushaia;

¹⁸ore tenebo ninche netii ilalashera lenye te ntukus e are e Sakaria o Yaasiel o shemiramot o Yehiel o Uni o Eliab o Benaia o Maaseia o Matitia o Elifele o Mikneia o larripok le kishomi, obed-edom o Yaeil.

¹⁹Ore ilaranyak Heman o Asaf o Etan naa pee eosh aaitabuaku nkinantani dapashi o suyai,

²⁰ore Sakaria o Asiel o Shemiramot o Yehiel o Uni o Eliab o Maaseia o Benaia, neosh ninche nkai oo sinkolioitin, te risioroto o ltoilo le Alamot;

²¹kake ore Matitia o Elifele o Mikneia o Obed-edom o Yerel o Asasia, nerikoo eoshoto oo lwululi loo usin, te risioroto oltoilo le Shemnit,

²²o Kenania olarikoni lo sinkolio too Lawi, ninye orikoo osinkolio, amu keyiolo apa.

²³Ore Berekia o Elkana neaku ilarripok le kutukaji ine netii osanduku.

²⁴Ore Shebania o Yoshefat o Natanel, o Amasai o Sakaria o Benaia o Eliesa, lelo apolosak, ninche oosh sekekuani te dukuya ilo sanduku le Nkai. Ore sii Obed-edom o Yehia naa ninche ilarripok le kutukaji eine netii osanduku.

²⁵Neaku eshomo apa Daudi o lpayiani o lkituaak loo nkalifuni, aayau osanduku lo sotua lo Laitoriani te nkaji e Obed-edom te ng'ida.

²⁶Naa ore amu etareto apa Enkai lelo Lawi oonapita osanduku lo sotua lo Laitoriani, etopolosa ninche iloing'ok oopishana o ilmeregeshi oopishana.

²⁷Neishopito apa Daudi olkila le kitani sidai opiyaya, naa neijia sii eikununo lelo Lawi pooki oonapita osanduku o laranyak o Kenania ilo arikoni lo sinkolio o laranyak; neishop Daudi enkila olgoo e Kitani.

²⁸Neaku eyautua iltung'ana le Israel pooki osanduku lo lning'o lo Laitoriani too mbuakunot, o to ltoilo lo mowuorak o sekekuani, o nkinantani dapashi, nebuaku aaranyisho too nkai oo sinkoliotin o lwululi loo usin.

²⁹Ore egira ilo sanduku lo sotua lo Laitoriani alotu enkanasa e Daudi, nerum Mikal entito e Saul Daudi te lusie, nedol olaiguanani Daudi eranyisho eipid aranyisho neng'ida; nemenaa ninye to ltau lenye.