Read Maasai Bible – Biblia Sinyati 1 Intepen 17 Bible Online

1 Intepen 17 - Maasai Bible – Biblia Sinyati bible

1 Intepen 17

¹Ore apa etobiko Daudi te nkaji enye, nejoki ninye Natan ilo oiboni le Nkai, “Abikito nanu tiatua enkaji oo ltarakua, kake ore osanduku lo sotua lo Laitoriani naa olng'obor etii.”

²Nejoki Natan Daudi, “Taasa ina pooki natii atua oltau lino, amu etii Enkai tenebo iyie.”

³Kake ore ina kewarie ake, nelotu ororei lo Laitoriani enetii Natan, ejo,

⁴“Shomo tiaaki osinka lai Daudi, nji ejo Olaitoriani: ‘Mikishetaki iyie enkaji nabikie.

⁵Amu eitu aekata nanu abik te nkaji ebaiki apa ina olong natorikoyie Israel ometabaiki ena olong, kake ashomo nanu arukoo ilng'oborri, naimaa emanyisho o emanyisho.

⁶Ore too wuejitin pooki nashomo nanu tenebo Isiraeli pooki, neitu airo ororei te pooki tung'ani le lelo arishak le Israel, apa laitanapa pee eirrita iltung'ana laainei, ajo: Kainyoo pee eitu intae kishetakiki enkaji oo ltarakua?’

⁷Ore naa taata nji shomo tiaaki osinka lai Daudi, ‘Nji ejo Olaitoriani loo lororani, aaitayio apa nanu te nkirrita oo ntare, te sujata oo nkerra, pee itum ataa olkitok loo ltung'ana laainei Israel;

⁸natii nanu tenebo iyie te pooki wueji nishomo, naiwuang'ie nanu ilmang'ati linono te dukuya iyie naa kaaitobiraki nanu iyie enkarna naikununo anaa nkarn e lelo kituaak le nkop.

⁹Naa kagelu nanu ewueji te nkaraki iltung'ana laainei le Israel, naun nanu ninche, pee etum ninche aatobik te wueji enye maate, nemeitokini aekata aaitanyamal; nemeitoki aekata ilarruok aaisilisil ninche anaa apa.

¹⁰Ebaiki ina kata apa nategelua ilarishak meitoria iltung'ana laainei le Israel. Naa kamir nanu ilmang'ati linyi pooki. Ore ake sii, aaibalakinye nanu iyie nchere eikishetaki Olaitoriani enkaji.

¹¹Teneiputayu inkolong'i inono pee irura aye anaa iloo papaai lino, naa kadumu nanu eishoi ino te siadi iyie, obo loo layiok linono inot, naitubulaa nanu enkitoria enye.

¹²Kaalo ninye ashetaki nanu enkaji, naa kaitubulaa nanu olorika lenye le nkitoo ntarasi.

¹³Kaaku nanu menye lenye neaku ninye enkerai ai. Maiwuang'ie nanu ina nyorrata ai nauno te ninye, anaa apa enaiwuang'ie teilo otii te dukuya iyie.

¹⁴Kake kaitasheyie nanu ninye tiatua enkaji o te nkitoria ai ntarasi, ore olorika lenye le nkitoo enye neitubulari ntarasi.’ ”

¹⁵Ore te risioroto e kulo rorei pooki o te risioroto ena duaata pooki, neirorie Natan Daudi.

¹⁶Neitoki olaiguanani Daudi alo atua aji, neton te dukuya Olaitoriani, nejo, “Kara nanu ng'ae iyie Olaitoriani Enkai, naa kainyoo enkaji ai, eji metaa kiyaua iyie naba nji?

¹⁷Naa embae kiti ena too nkonyek inono, iyie Enkai; niroro sii aimaki enkaji osinka lino te nkata sapuk nalotu, nikintoduaa iyie nanu iishoritin naapuonu, Olaitoriani Enkai!

¹⁸Naa kainyoo eitoki Daudi ajo tialo iyie inchoo meyanyituni osinka lino? Amu iyiolo iyie osinka lino.

¹⁹Ore te nkaraki osinka lino, iyie Olaitoriani o terisioroto oltau lino makewan, iyaua iyie ena kitoo pooki, nchoo metayiolouni kuna baa pooki sapuki.

²⁰Meetae likae laaijo iyie, iyie Olaitoriani, nemeetae ae Ai neme iyie te risioroto e nena pooki nikitoning'o too nkiyiaa ang.

²¹Kalo likae osho te nkop onyaanyukie iltung'ana linono Israel, laa ninche eshomo Enkai akordu pee eaku iltung'ana lenyena, pee intobiraki kewan enkarna too mbaa sapuki naaitureisho, aaraa aipang'ie iloshon te dukuya iltung'ana linono, apa litokordua ninche aitayu te Misiri.

²²Nintaa iyie iltung'ana linono te Israel metaa iltung'ana linono ntarasi, niaku iyie, iyie Olaitoriani Enkai enye.

²³Ore naa taata iyie Olaitoriani nchoo ilo rorei liroro oipirta osinka lino, neipirta enkaji enye meitubulari ntarasi, niaas anaa eniroro;

²⁴neitasheyieki enkarna ino neibalieki ntarasi, aajo, ‘Olaitoriani loo lororani Enkai e Israel, ninye Enkai oo Siraeli.’ Ore enkaji osinka lino Daudi naa keitasheyieki te dukuya iyie.

²⁵Amu iyie, Enkai ai, naitalio to sinka lino nchere ishetaki ninye Enkaji, ore te nkaraki ina etagolo osinka lino oshoke pee eomon te dukuya iyie.

²⁶Ore naa taata iyie Olaitoriani, iyie Enkai, nisiligishore iyie ena bae sidai tialo osinka lino.

²⁷Ore naa taata nchoo kintiship iyie pee imayian enkaji o sinka lino, pee elo ninye dukuya anaake ntarasi te dukuya iyie; amu ore entoki nitamayiana iyie Olaitoriani nemayiana ntarasi.”