Read Maasai Bible – Biblia Sinyati 1 Intepen 20 Bible Online

1 Intepen 20 - Maasai Bible – Biblia Sinyati bible

1 Intepen 20

¹Ore te nkiterunoto eilo ari, ina kata napuoyie ilaiguanak olarrabal, nerikoo Yoab enjore, nerasaki enkop oo Lamori, nelotu amuatu Aman enkang e Raba, neibelekeny ina ang agil.

²Neitayu Daudi enkopiyia e nkitoo te ndukuya o laiguanani lenye; nedol ajo entalanta e saabu enkiroishi enye; naa osoit ogol enkinyiang'a, nepiki endukuya e Daudi. Neitoki ninye aya nena yarunot eina anasa ntokitin kumok.

³Neitoki ayau iltung'ana apa ootii atua ina anasa, nepik ninche esiaai oo nkaik, too sooi sekenke o ntoluo. Neiko Daudi neijia too nkanas pooki oo Lamoni. Nerrinyo Daudi o ltung'ana pooki aapuo Yerusalem.

⁴Ore te siadi ena nedumunye olarrabal loo Lfilisti, te Gasa, near Sebekai le Hushati Sipai metua, laa oleina ishoi apa oo ltung'ana sapuki; nemiri Lfilisti.

⁵Neitoki apuku olarrabal loo Lfilisti; near Elhanan olalashe Yair Lahami metua olalashe le Goliat le Giti, ilo apa oba enchata enye e mpere anaa embokishi sapuk.

⁶Neitoki ake apuku olarrabal te Gat, teine netii oltung'ani sapuk oleng neado, neeta ilkimojik ile loo nkaik o lkimojik ile loo nkejek te pooki aina o te pooki keju, neaku tikitam oong'uan ilkimojik lenyena pooki. Naa oleishoi sii ninye e lelo tung'ana sapuki.

⁷Ore ake pee emor Isiraeli, near Yonatan olayioni le Shimea, to lelem ninye metua. Olalashe le Daudi apa Shimea.

⁸Ile ishoi apa oo ltung'ana sapuki kulo tung'ana ootii Gat, nebatata ninche aaye te nkaina e Daudi o too nkaik oo sinkan, lenyena.