Read Maasai Bible – Biblia Sinyati 1 Intepen 21 Bible Online

1 Intepen 21 - Maasai Bible – Biblia Sinyati bible

1 Intepen 21

¹Eitasho apa Sheitani agilunore Israel, neputu Daudi meikena Isiraeli.

²Neaku etiaaka Daudi Yoab o larikok le njore, “Shomo nkena Isiraeli, ebaiki Beersheba o metabaiki Dan, nikiyaki nanu oratioti, pee atum atayiolo esiana enye.”

³Kake etiaaka Yoab, “Metoponai Olaitoriani iltung'ana lenyena te maaip te risioroto enkumoi enye. Amaa ninche pooki olkitok lai olaiguanani, aime isinkan linono pooki? Kainyoo naa pee eyieu olkitok lai ena? Kainyoo pee eyaki ninye ena kitarruorroto Israel?”

⁴Kake etirrisha ororei lo laiguanani tialo Yoab, neaku eshomo Yoab atua Israel pooki, nerrinyunye Yerusalem.

⁵Neisho Yoab esiana oo ltung'ana Daudi. Ore tiatua Israel pooki netii iltung'ana emilion nabo o nkalifuni iip nabo ooidim aashom olarrabal, Ore te Yuda naa nkalifuni iip ong'uan o ntomoni naapishana iltung'ana ooata ilalema.

⁶Kake eitu eikenaki Lawi o Benchamen teina kikena, amu eitagoro apa irorei lo laiguanani Yoab.

⁷Kake eitu apa eitiship ena bae Enkai, neosh ninye Israel.

⁸Nejoki Daudi Enkai, “Ataasa nanu eng'oki oleng ataasa ena bae. Kake ore naa taata aatoomono nanu iyie, iwuang'ie entorroni o sinka lino; amu ataasa nanu ena te modai.”

⁹Neirorie Olaitoriani Gad, ilo aduaani le Daudi ejo,

¹⁰“Shomo tiaaki Daudi, ‘Nji ejo Olaitoriani, mbaa uni aaisho nanu iyie; tegelu nabo te ninche, pee aatum nanu aishoo iyie.’ ”

¹¹Nelotu Gad enetii Daudi nejoki ninye, “Nji ejo Olaitoriani, ‘Iwa ina niyieu:

¹²Ilarin okuni lo lameyu, aashu ilapaitin okuni likintanyamal ilmang'ati linono, nikinepu olalem loo lmang'ati linono; aashu nkolong'i uni o lalem lo Laitoriani, olmeitai le nkop, neidaikie olmalaika lo Laitoriani tiatua enkop e Israel pooki.’ Tuduta ewalata nayaki ilo laairriwua.”

¹³Neitoki Daudi ajoki Gad, “Atii nanu atua osina sapuk; nchooki nanu matabatatakinoyu enkaina o Laitoriani, amu aisapuk olng'ur lenye oleng, kake mincho nanu abatatakino enkaina e tung'ani.”

¹⁴Neaku eirriwaka Olaitoriani olmeitai shumata Isiraeli; neye teine iltung'ana le Israel nkalifuni ntomoni naapishana.

¹⁵Neirriwaa Olaitoriani olmalaika pee eidakie Yerusalem; kake ore etaa keidaikie, neing'or Olaitoriani neirridu ina torroni; nejoki ninye ilo malaika le nkidaata, “Eidipa ina; torrinyo taata enkaina ino.” Neitashe apa ilo malaika lo Laitoriani te mbata e wueji neiutuutishoreki e Onan le Yebusi.

¹⁶Nedumu Daudi nkonyek enyena nedol olmalaika lo Laitoriani eitashe te rishata e nkop o shumata, neeta te nkaina enye olalem otushutuaki te nchashurr neitoriokini shumata Yerusalem. Neishop Daudi olpayiani ilkuniyiani, nebatata too nkomomi enye.

¹⁷Nejoki Daudi Enkai, “Aime nanu doi oitanapishe meikeni olorere? Nanu otaasa eng'oki naas ena bae torrono. Kake amaa kuna kerra, kaa ninche etaasa? Nchoo naa enkaina ino Olaitoriani aatoomono, Olaitoriani Enkai ai, maatar nanu o enkaji e papaai lai; kake mincho olmeitai elotu shumata iltung'ana linono.”

¹⁸Neitoki ilo malaika le Nkai aitanap Gad metiaki Daudi nchere, pee elo aitobiraki olasar Olaitoriani te wueji neiutuutishoreki, e onan le Yebusi.

¹⁹Nelo Daudi teilo rorei le Gad oiroro te nkarna o Laitoriani.

²⁰Neidong'ito apa Onan enkano; neibelekenya Onan nedol olmalaika ore lelo ayiok lenyena pokira oong'uan neisudori.

²¹Ore elotu Daudi enetii Onan neing'orisho Onan nedol Daudi, nelo ninye teilo kurroto oiutuutishoreki neirrugo aitabaiki enkomom enye enkop, aisho Daudi enkanyit.

²²Nejoki Daudi Onan, “Nchooki nanu olkurroto oiutuutishoreki pee ashetie olperere lo lasar lo Laitoriani timirakaki nanu te nkinyiang'a nalulung'a, pee etumi aaiwuang'ie olmeitai too ltung'ana.”

²³Neitoki Onan ajoki Daudi, “Iwa iyie; naa nchoo olkitok lai olaiguanani eas ina naishiakino te ninye, ng'ura kaishoru nanu ilmong'i pee eitaae olasar opejori, ore kuna keek naaidong'ishoreki neaku ilkeek, neaku enkano olasar le ntapa. Kaishoru nanu pooki.”

²⁴Kake etiaaka olaiguanani Daudi Onan, “A'a, kake kainyiang'u nanu te nkinyiang'a nalulung'a; mayaki nanu Olaitoriani entoki nara enino, anaa aitayu ilasarri oopejori leitu ainyiang'u.”

²⁵Neaku etalaaka Daudi Onan shekeli iip ile e saabu te nkiroishi, te nkaraki ine wueji.

²⁶Neshetu Daudi teine olperere lo lasar lo Laitoriani, neitarasaa olasar opejori o lasar le seriani, neipot enkarna o Laitoriani, newaliki Olaitoriani ninye te nkima, naing'uaa keper naewuo shumata ilo perere lo lasar opejori.

²⁷Neitanap Olaitoriani ilo malaika, nerrinyoki olalem atua enchashur.

²⁸Ore teina kata, ore ake pee edol Daudi ajo etawalikia Olaitoriani ninye teilo kurroto oiutuutishoreki le Onan loo Lyebusi, neitobir ninye ilasarri lenyena teine.

²⁹Amu ore apa ilo ng'obor le manyisho o Laitoriani, oitobira Musa tiong'ota o ilo perere lo lasar opejori netii apa ina kata ewueji neika te Gibeon;

³⁰kake meidim apa Daudi ashomo aitasho te dukuya ninye aikilikuanishore Enkai, amu keure apa olalem leilo malaika lo Laitoriani.