Read Maasai Bible – Biblia Sinyati 1 Intepen 22 Bible Online

1 Intepen 22 - Maasai Bible – Biblia Sinyati bible

1 Intepen 22

¹Neitoki Daudi ajo, “Ene nelo aaku enkaji o Laitoriani Enkai, naa ene nelo aaku olperere lo lasar opejori te Israel.”

²Neitanapisho Daudi pee eiturrurri tenebo iltung'ana pooki omon ootii atua enkop e Israel, nepik iladung'ok loo soito, pee eitobir isoito oogueta ooshetieki enkaji e Nkai.

³Neishoru sii Daudi isekenke kumok naaitayunyeki ilmushumaani loo nkutukie oo nkajijik o nkikeneta, tenebo o suyai kitok oleng lemeimakinoyu enkiroishi

⁴o mbaoi o ltarakuai nemeikenayu; amu eyautua iltung'ana le Sidon, o le Tiro mbaoi kumok o ltarakuai aayaki Daudi.

⁵Amu etejo apa Daudi, “Ore Solomon olayioni lai, naa koti, nemeyiolo toki, naa ore ena aji nashetakini Olaitoriani naa aisidai oleng, nening'o neeta enkitoo te nkop pooki; kaitobir nanu mbaa olchetiei leina aji.” Neaku eishorua Daudi ntokitin kumok e nchetare eton eitu eye.

⁶Neitoki aipotu Solomon ilo ayioni lenye, neitanap metesheta enkaji Olaitoriani, Enkai e Israel.

⁷Nejoki Daudi Solomon, “Enkerai ai, kaata apa to ltau lai pee ashetu enkaji te nkarna Olaitoriani Enkai, ai.

⁸Kake aairorie Olaitoriani, nejo, ‘Imbukoyie iyie osarge sapuk nitijing'a ilarrabali kumok sapuki; mishetu iyie enkaji te nkaraki enkarna ai, amu imbukoyie iyie osarge sapuk te dukuya nanu o tioriong enkop.

⁹Ng'ura, eikiikini iyie enkayioni, naa keaku ninye oltung'ani le seriani. Kaisho nanu ninye eseriani too lmang'ati lenyena pooki oomanita; amu keaku keji enkarna enye Solomon, naa kaishoru nanu eseriani o enkitirring'a te Israel too nkolong'i enyena.

¹⁰Ninye olo ashet enkaji te nkaraki enkarna ai. Keaku ninye enkerai ai naaku nanu menye lenye, naa kaitasheyie nanu olorika lenye le nkitoo tiatua Israel ntarasi.’

¹¹Ore naa taata enkerai ai, metaa Olaitoriani tenebo iyie, pee itum atudupoyu te nchetata enkaji o Laitoriani Enkai ino, anaa apa enairoro ninye tialo iyie.

¹²Mikinchoo ake ninye Olaitoriani eng'eno o ening'unoto, peyie tinikincho ninye enkitanapata naipirta Isiraeli, nitum aibung'a enkitanapata o Laitoriani Enkai ino.

¹³Nitum taa atudupoyu, tenijurru, nimbung nena kikoot o nkiguanat naaitanapa Olaitoriani Musa te nkaraki Israeli. Ntagoluoyu, nintagol oshoke. Miureishoyu; mipalari.

¹⁴Ore te mion kitok oleng, naishorua nanu te nkaraki enkaji o Laitoriani ntalantani nkalifuni iip nabo e saabu (4,000), o ntalantani emilio nabo e nkosholai o suyai, o esekenkei nemetemayu, amu aikumok apa oleng. Aishorua sii mbaoi o soito. Ore te kuna nemeeta nchere pee miponaa.

¹⁵Iyata isinkan kumok oleng; iladung'ok loo soito, o lashetak loo soito, o laguetak loo mbaoi, o mpukunot pooki oo laisiaayiak arriyiak lemeikenayu. Iltung'ana arriyiak te siaai,

¹⁶e saabu, o enkosholai, o suyai, o sekenke. Entudumunye entaasisho! Metaa Olaitoriani tenebo intae!”

¹⁷Eitanapa sii apa Daudi ilarikok pooki le Israel pee eretu Solomon, ilo ayioni lenye ejo,

¹⁸“Aimetii Olaitoriani Enkai inyi tenebo intae? Naa keitu ninye eisho intae eseriani te pooki shoto? Amu eyaua ninye lelo oomanya ena kop apik atua nkaik aainei; naa keaku enkop abori Olaitoriani etii o ltung'ana lenyena.

¹⁹Esiaayia naa taata Olaitoriani Enkai inyi too ltauja. Entudumunye enteshet ewueji sinyati o Laitoriani Enkai inyi, pee etumi aayau nena masaa sinyat atua ina aji nateshetaki te nkaraki enkarna o Laitoriani.”