Read Maasai Bible – Biblia Sinyati 1 Intepen 28 Bible Online

1 Intepen 28 - Maasai Bible – Biblia Sinyati bible

1 Intepen 28

¹Eiturrurro apa Daudi te Yerusalem ilkituaak pooki le Israel, ilkituaak loo loshon o larikok le lelo turrurri apa ooisiaai olaiguanani, o larikok le njore le nkalifu, o larikok le njore le maa iip, o laitashiekinok loo masaa pooki o nkishu o laiguanani o layiok lenyena, tenebo o lkituaak le nkaji o laiguanani o lelo tung'ana magil o lelo murran pooki yiolot.

²Nedumunye Daudi aitashe nejo, “Entoning'oki nanu, ilalashera laainei o ltung'ana laainei. Atadamua apa to ltau lai pee ashetu enkaji nairragieki osanduku lo sotua lo Laitoriani, neaku eneitasheyie nkejek e Nkai ang: naitobira nanu mbaa naashetieki,

³kake aatiaaka nanu Enkai, ‘Mindim iyie atesheta enkaji te nkaraki enkarna ai, amu ira iyie olmurrani nimbukoyie osarge sapuk.’

⁴Ore ake eyia, aategelua nanu Olaitoriani Enkai e Israel te nkaji e papaai pooki pee aaku olaiguanani le Israel ntarasi, amu etegelua Yuda metaa olarikoni, naa ore te nkaji e Yuda, teina aji e papa o tiatua ilayiok le papa neitishipa ninye pee aaitaa olaiguanani le Israel pooki.

⁵Naa ore too layiok laainei pooki (amu aaishoo Olaitoriani ilayiok kumok) netegelua Solomon olayioni lai, pee eton to lorika le nkitoo le nkitoria o Laitoriani te Israel.

⁶Aatiaaka ninye nanu, ‘Solomon olayioni lino olo ashet enkaji ai o lgorieti laainei, amu ategelua nanu ninye metaa enkerai ai, naa kaaku nanu menye lenye.

⁷Kaitasheyie nanu enkitoria enye ntarasi tenebik ninye aibung neitabaya nkitanapat aainei o nkikoot aainei, anaa enatiu ninye taata.’

⁸Ore naa taata te dukuya Israel pooki, ena umata o Laitoriani o te ning'oto e Nkai ang, entujurru ning'oruru nkitanapat pooki o Laitoriani Enkai inyi; pee itumutumu aawaita ena kop sidai aaitaa eninyi, ning'ueikiki nkera inyi metaa enjung'ore enye ntarasi.

⁹“Naa ore iyie Solomon enkerai ai, tayiolo Enkai e papaai lino, nisiaai ninye to ltau pooki o te ndamunoto e yieunoto amu kejur Olaitoriani iltauja pooki, neyiolo pooki kitobirat o endamunoto. Tening'oru iyie ninye, naa eitum iyie ninye, kake tenilam ninye, naa eikinturraa ninye iyie ntarasi.

¹⁰Toning'o naa taata, amu kitegelua iyie Olaitoriani pee ishet enkaji naaku ewueji sinyati; ntagoluoyu taasa ina.”

¹¹Neisho Daudi Solomon eutaroto enkitobirata eina aji Enkai pooki o enoo nkajijik enyena o neeshumishoreki o lgilat lenyena le shumata o lgilat lenyena liatua o lgilat lo lorika lo lng'ur,

¹²o nena kitobirat pooki naata to ltau, te nkaraki ilgorieti le nkaji o Laitoriani o lgilat pooki oomanita o wuejitin pooki neeshumishoreki e nkaji e Nkai o eneshumieki nkishoorot naaitisinyaki;

¹³te nkaraki lelo turrurri loo lapolosak o Lawi o esiaai pooki e nkisiaayiare tiatua enkaji o Laitoriani o masaa pooki e nkisiaayiare tiatua enkaji o Laitoriani,

¹⁴o enkiroishi e saabu te nkaraki imasaa e saabu te pooki kisiaayiare o enkiroishi oo masaa e nkosholai te pooki kisiayiare.

¹⁵O enkiroishi oo nkitasheta oo ltaai, lenye o enkiroishi e pooki kitashet oltaa o ltaai lenyena o enkiroishi e nkosholai te nkaraki enkiteshet oltaa o ltaai lenyena, te risioroto enkisiaayiaret e pooki kitashet o ltaa.

¹⁶O enkiroishi e saabu te pooki misa, e mukate nkitoduaaroto o enkosholai te nkaraki imisai naaitobiri te nkosholai.

¹⁷O saabu nasila naitobirieki nkijikoni oo lala, o mbeshenini o nkikompeni o nena girran e saabu, o enkiroishi e saabu naitobirieki pooki o ng'irran e nkosholai.

¹⁸O te nkaraki olperere lo lasar le nkorropil le saabu nasila, o enkiroishi e saabu naitobirieki. Neisho sii nkitobirat te nkaraki engarri oo lbartan e saabu nanapieki lelo kerubi oolak inaipuko enye aaitoip ilo sanduku lo sotua lo Laitoriani.

¹⁹Eibalunye ninye kuna baa pooki too lkigerot le nkaina o Laitoriani, ooipirta ena bae. Keasi ena siaai pooki aaiturubare ina kitobirata e utaroto.

²⁰Neitoki Daudi ajoki Solomon ilo ayioni lenye, “Ntagoluoyu nintagol oshoke, niaas ina, miureishoyu, milepori nimishalu; amu ore Olaitoriani Enkai ai, ee Enkai ai, netii tenebo iyie, mikintiak ninye iyie nimikinguanare ometaba anaa neidipayu esiaai pooki e nkisiaayiare e nkaji Olaitoriani. Naa ore ilturrurri loo lapolosak; o loo Lawi, teina kisiaayiare pooki enkaji e Nkai, netii tenebo iyie, ometaba anaa neidipayu esiaai pooki e nkisiaayiare e nkaji Olaitoriani.

²¹Naa ore ilturrurri loo lapolosak o loo Lawi, teina kisiaayiare pooki enkaji e Nkai netii tenebo iyie, neeta ake pooki tung'ani eyieunoto, neeta pooki ng'ae enkarriyiano te pooki kisiaayiare; ore sii ilkituaak o ltung'ana pooki naa kening aakurraki tenintanap ninche.”