Read Maasai Bible – Biblia Sinyati 2 Intepen 1 Bible Online

2 Intepen 1 - Maasai Bible – Biblia Sinyati bible

2 Intepen 1

¹Eitagolo apa Solomon olayioni le Daudi kewan te nkitoria enye, netii Olaitoriani Enkai enye tenebo ninye, neitaa ninye kitok oleng.

²Neirorie Solomon Isiraeli pooki, neirorie ilarikok le njore loo nkalifuni, o loo maa iip o larishak o larikok pooki loo Siraeli, o lukuny oo nkajijik oo loo menye.

³Ore Solomon o ina umata pooki natii tenebo ninye, nepuo ine wueji e shumata natii Gibeon; amu ine apa etii olng'obor le Nkai oitobira Musa osinka lo Laitoriani.

⁴Kake eyawua apa Daudi ilo sanduku le Nkai te Kiriat-Yearim neya ine wueji apa neitobiraka, amu etuuno apa ninye olng'obor te nkaraki ninye te Yerusalem.

⁵Kake ore ilo perere lo lasar lo suyai oitobira Besalel olayioni le Uri, olayioni le Huri, netii dukuya ilo ng'obor lo Laitoriani. Nesai Solomon o ina umata Olaitoriani.

⁶Neilep Solomon alo ine netii olperere lo lasar lo suyai te dukuya Olaitoriani. Atua ilo ng'obor le ntumo apa etii ilo perere lo lasar, neitayu Solomon ilasarri oopejori enkalifu nabo te nchumata enye.

⁷Ore teina kewarie neipang'aki Enkai Solomon, nejoki ninye, “Toomonu entoki niyieu naaisho.”

⁸Nejoki Solomon Enkai, “Intodolua iyie enyorrata kitok nauno te papaai lai Daudi, nikintaa nanu olaiguanani te rishata enye.

⁹Olaitoriani Enkai, inchoo ina kisiligata ino tialo Daudi papaai lai meitabari taata, amu kintaa iyie nanu olaiguanani te shumata olorere kitok oba anaa enterit e nkop.

¹⁰Inchooki naa taata nanu eng'eno nagut o eyiolounoto pee aaidim atoriko kulo tung'ana kulo tung'ana, amu aing'ae oidim aitoria ele orere lino kitok?”

¹¹Newaliki Enkai Solomon ajoki, “Ore te nkaraki netii ena atua oltau lino, neitu iyie iomonu imasaa, o enkarsisisho, o enkanyit, anaa enkishui e lelo likimba iyie, neitu doi ninye iomonu enkishui naado, kake eng'eno o eyiolounoto te kewan ino, pee itum aitoria lelo tung'ana laainei laa te ninche nanu aaitaa olaiguanani,

¹²kinchooki iyie eng'eno nagut o eyiolounoto. Kaaisho sii karsisisho, o masaa, o enkanyit, neitu aekata etum obo le lelo aiguanak apa ootii dukuya iyie, nemeetae te siadi iyie olotum mbaa naatiu anaa kuna.”

¹³Neitoki Solomon alotu teine wueji e shumata te Gibeon, te dukuya ilo ng'obor le ntumo, nelotu Yerusalem. Neitore ninye Israel.

¹⁴Neiturrur Solomon tenebo ngarrin oo mbartan o lakedok loo-mbartan inkalifuni tomon oaare, laa ninche apa etipika inkanas, oo ngarrin oo mbartan tenebo olaiguanani te Yerusalem.

¹⁵Neitotiu olaiguanani enkosholai o saabu anaa isoito te Yerusalem neiput iltarakua pooki wueji anaa olng'aboli le Shefela.

¹⁶Neinyang'u Solomon imbartan naaing'uaa Misiri o enkop naji Kue, ore lelo biasharani lo laiguanani neng'amu ninche te Kue te nkinyang'a.

¹⁷Naa keinyang'u apa ninche engarri oo mbartan naing'uaa Misiri te shekeli iip ile e nkosholai, neinyang'u embarta te shekeli iip nabo o onom. Neikunaki sii apa neijia aamiraki ilaiguanak pooki le Hiti o laiguanak le Siria.