Read Maasai Bible – Biblia Sinyati 2 Intepen 10 Bible Online

2 Intepen 10 - Maasai Bible – Biblia Sinyati bible

2 Intepen 10

¹Eshomo apa Rehoboam Shekem, amu eshomo apa iltung'ana pooki loo Siraeli Shekem aaitaa ninye olaiguanani.

²Ore ake pee ening Yeroboam olayioni le Nebat ina, (amu Misiri apa etii ninye, ine apa neisikaka ailany olaiguanani Solomon) neitoki Yeroboam arrinyunye te Misiri.

³Neirriwaa ninche olkilikuai meipotuni ninye. Ore Yeroboam o Siraeli pooki nepuonu aajoki Rehoboam,

⁴“Eiroshiyie apa papaai lino enchata ang oo murto. Ore naa taata nteneneng'a ina kisiaayiare nagol natii shumata iyiook, naa eikisiaai iyiook iyie.”

⁵Nejoki ninye ninche, “Enyaaki wootu enatii nanu te rishata oo nkolong'i uni.” Nerrinyo iltung'ana aapuo.

⁶Neitoki olaiguanani Rehoboam aikilikuanishore ilpayiani, laa ninche apa ooitashe te dukuya olaiguanani Solomon papaai lenye, apa eton eishu, ejoki, “Kaa intae kiutakiki matiaaki kulo tung'ana?”

⁷Nejoki ninche ninye, “Tiniaku iyie supat tialo kulo tung'ana, nintiship ninche, niro irorei supati tialo ninche, naa keaku ninche isinkan linono ntarasi.”

⁸Kake etanya ninye ina kikoo oo lpayiani, neing'oru enkikoo oo lbarnot le risiori enye oitashe te dukuya ninye.

⁹Nejoki ninche, “Kaa intae iututu pee kiwaliki kulo tung'ana laatiaakita ninche nanu, ‘Nteneneng'a enchata ang oo murto apa natipika papaai lino shumata iyiook?’ ”

¹⁰Nejoki lelo barnot le risiori enye ninye, “Nji iyie shomo tiaaki lelo tung'ana likitiaakiata iyie, ‘Eiroshiyie apa papaai lino enchata ang oo murto, kake inteneneng'aki iyie iyiook;’ nji shomo tiaaki ninche, ‘Ore enkilinta ai naa ninye esapuk alang empolos e Papaai lai.

¹¹Naa Ore naa taata, teneiteleikia apa papaai intae enchata oo murto nairoishi, naa kaponaa nanu enkiroishi eina shata inyi oo murto. Eitamio intae papaai too nkibokoni, kake kaitame nanu intae too nkolupani.’ ”

¹²Neitoki Yeroboam o ltung'ana pooki loo Siraeli aapuonu enetii Rehoboam te nkolong e uni, anaa enatejo olaiguanani, “Enyaaki wootu enatii nanu te nkolong e uni.”

¹³Newaliki olaiguanani ninche tenkisikong'ata, neany ina kikoo oo lpayiani.

¹⁴Neirorie olaiguanani ninche te risioroto enkikoo oo lbarnot, nejoki, “Eiroshiyie apa papaai enchata inyi oo murto, kake kaponaa nanu enkiroishi. Eitamio apa intae papaai too nkibokoni, kake kaitame nanu intae too nkolupani.”

¹⁵Neaku eitu ening olaiguanani iltung'ana amu embae ena nayawua Enkai, pee etum Olaitoriani aitabai ororei lenye, apa oiroro aimunye Ahija le Shilon metoliki Yeroboam olayioni le Nebat.

¹⁶Ore ake pee edol Isiraeli pooki aajo eitu ening olaiguanani ninche, newaliki iltung'ana olaiguanani aajoki, “Kaa rubata iyiook kiata te Daudi? Mikiata iyiook enjung'ore to layioni le Yese. Shomo pooki ng'ae olng'obor lino, intae Israel! Ing'ura taata enkaji ino makewan Daudi.” Nedumunye Isiraeli pooki aapuo ilng'oborri lenye.

¹⁷Kake eitoria apa Rehoboam iltung'ana pooki loo Siraeli ootii nkanas e Yuda.

¹⁸Neitoki olaiguanani Rehoboam airriwaa Hadoram laa ninye apa olaitasheikinoni le siaai nagol, nenang iltung'ana loo Siraeli ninye too soito metua. Neisarrisar olaiguanani Rehoboam alo airot ngarrin enyena oo mbartan, pee eisikaki Yerusalem.

¹⁹Neaku etekepari Isiraeli te nkaji e Daudi ometabaiki ena olong.