Read Maasai Bible – Biblia Sinyati 2 Intepen 11 Bible Online

2 Intepen 11 - Maasai Bible – Biblia Sinyati bible

2 Intepen 11

¹Ore ake pee elotu Rehoboam Yerusalem, neiturrur enkaji e Yuda o ene Benchamen, iltung'ana inkalifuni iip o ntomoni isiet gelunot, pee earare Israel, pee errinyoki Rehoboam enkitoria.

²Kake eewuo ororei lo Laitoriani enetii Shemaia ilo tung'ani le Nkai, ejo,

³“Tiaaki Rehoboam olayioni le Solomon, olaiguanani le Yuda, o Siraeli pooki ootii Yuda, o Benchamen,

⁴‘Inji ejo Olaitoriani, Mipuopuo intae aarare ilalashera linyi. Torrinyoyu pooki tung'ani shomo enkang enye, amu ore ena bae naa nanu eing'uaa.’ ” Neaku etoning'o ninche ororei lo Laitoriani, nerrinyo neitu epuo aarare Yeroboam.

⁵Etobiko apa Rehoboam te Yerusalem neshet inkanas naamitunye kewan tiatua Yuda,

⁶etesheta Betlehem o Etam o Tekoa,

⁷o Betsur o Soko o Adulam,

⁸o Gat o Maresha o Sif,

⁹o Adoraim, o Lakish, o Ashetak,

¹⁰o Sora o Ahijalon o Hebron, inkanas naasheta isunta naatii Yuda o Benchamen.

¹¹Neitagol ninye isempewueti, nepik ilarikok le njore atua ninche, nepik ineeshumieki endaa o eilata o enaisho oo sabibu.

¹²Nepik sii iremeta o long'oi atua nena anas pooki, neitagol ninche oleng. Neaku eeta apa ninye Yuda o Benchamen.

¹³Ore ilapolosak o Lawi apa ootii atua Israel pooki, neing'uaa ninye too wuejitin pooki apa neetii ninche.

¹⁴Amu etung'uaitie Ilawi iwuejitin enye, o ntokitin enye nepuonu Yuda o Yerusalem te nkaraki nataarayie Yeroboam ninche o layiok lenyena aitung'uaa enkisiaayiare anaa lapolosak lo Laitoriani,

¹⁵negelu ilapolosak lenyena loo wuejitin neeika, o too wuejitin neeseremieki inkitanyaanyukot, o Nkaitin oo lasho naaitobira ninye.

¹⁶Ore lelo ootipika iltauja lenye pee eing'oru Olaitoriani Enkai e Israel nepuonu aasuju ninche eing'uaa iloshon pooki loo Siraeli o meetu Yerusalem, aapolosaki Olaitoriani Enkai oo loo menye.

¹⁷Neitagol ninche enkitoria e Yuda, ore too larin okuni neitaserian ninche Rehoboam olayioni le Solomon, amu eshomo ninche too larin okuni aaibung orrekie le Daudi o Solomon.

¹⁸Ewa apa Rehoboam aitaa enkitok enye Mahalat entito e Yerimot olayioni le Daudi neji ng'otonye Abihail entito e Eliab olayioni le Yese.

¹⁹Neiki ninye ilayiok, Yeush, o Shemaria, o Saham.

²⁰Ore te siadi ina neitoki aya Maaka entito e Absalom, naa ninye natoikio ninye Abija o Atai, o Sisa, o Shelomit.

²¹Kenyor apa Rehoboam Maaka ina tito e Absalom aitalang nena kituaak enyena pooki, o nkapiak. (Eyama apa ninye inkituaak tomon o isiet o nkapiak ntomoni ile neeta ilayiok tikitam o isiet, o ntoyie ntomoni ile.)

²²Negelu Rehoboam Abija ilo ayioni le Maaka metaa ninye olkitok tiatua ilalashera lenyena, amu kejo apa pee eitaa ninye olaiguanani.

²³Neas ninye ine ng'eno, neidapashaki kulikae ayiok lenyena aibulunye enkop e Yuda o Benchamen, eeta ndaiki kumok, neing'uraki ninche inkituaak.