Read Maasai Bible – Biblia Sinyati 2 Intepen 13 Bible Online

2 Intepen 13 - Maasai Bible – Biblia Sinyati bible

2 Intepen 13

¹Ore to lari le tomon o isiet le nkitoria o laiguanani Yeroboam, neiteru Abija aitoreisho te Yuda.

²Eitoreishe ninye ilarin okuni te Yerusalem. Ore apa enkarna e ng'otonye naa Mikaia, entito e Uriel le Gibea. Netii apa olarrabal erishata e Abija o Yeroboam.

³Neipang Abija alo olarrabal eeta enjore oo ltung'ana yiolot to larrabal, iltung'ana inkalifuni iip ong'uan oogeluno. Neitoloku Yeroboam iltung'ana lenyena to larrabal aitoluaaki ninye, naa iltung'ana inkalifuni iip isiet magil, gelunot.

⁴Neitashe Abija te nchumata oldoinyo le Semaraim otii ina kop oo ndoinyio e Efraim, nejo, “Entoning'oki nanu, iyie Yeroboam o Israel pooki!

⁵Aimeishiaakino tiniyiolou nchere, eishoo Olaitoriani Enkai oo Siraeli, enkitoria oo Siraeli pooki Daudi ntarasi to lmumai le munyan?

⁶Ore Yeroboam olayioni le Nebat ilo sinka le Solomon olayioni le Daudi, nedumunye agilunore olkitok lenye.

⁷Ore ilkulikae tung'ana le pesho, nerrumoki ninche Rehoboam olayioni le Solomon, ilo leton aa oti nemeeta enkarriyiano, metaasa enkarruoisho. Nemeidimaa apa Rehoboam ninche.

⁸“Amaa taata, ijo iyie indim aitasheikinore enkitoria o Laitoriani too Nkaik oo layiok le Daudi, eji te nkaraki nira iyie olorora, kitok, niata nkitanyaanyukot e Nkai oo lasho le saabu, apa naaitobira Yeroboam aitaa nkaitin?

⁹Keitu iyie iaraa aipang'ie ilapolosak lo Laitoriani, ilayiok le Aaron, o Lawi, nintobiraki kewan ilapolosak anaa iltung'ana le kulie kuapi? Ore pooki ng'ae olotu aitisiny kewan to loti oing'oni anaa too lmeregeshi oopishana neaku olapolosani le nena neme Nkaitin.

¹⁰Kake ore tialo iyiook, Olaitoriani ninye Enkai ang, neitu iyiook kipuo aaing'ua ninye. Kiata iyiook ilapolosak ooisiaaita Olaitoriani laa ilayiok le Aaron, o Lawi te nkaraki enkisiaayiare enye.

¹¹Kepolosaki ninche Olaitoriani anaake tedekenya o teipa ilasarri oopejori, o enkorropil o sonkoyoni naarropil, neirragie emukate nasinya te misa e saabu nasila, neing'or nena kitasheta oo ltaai e saabu pee etum iltaai lenyena aayupuyupo anaake teipa. Amu eikimbung iyiook enkitanapata Olaitoriani Enkai ang, kake itanyaita intae ninye.

¹²Etii Enkai tenebo iyiook, ninye orikito iyiook, tenebo ilapolosak eeta sekekuani enye o larrabal pee eosh tenikinteru olarrabal o intae. Nakera, e Israel emiarare intae Olaitoriani Enkai oo loo minyi, amu mimirishosho.”

¹³Neirriu apa Yeroboam iltung'ana olnukata aitaman ninche te siadi. Netii ilturrurri lenyena dukuya iltung'ana le Yuda. Netii lelo tung'ana oonuka siadi ninche.

¹⁴Ore pee eing'orisho Yuda, ng'ura etii olarrabal dukuya o siadi, neishiraki ninche Olaitoriani nekut ilapolosak sekekuani.

¹⁵Neitayu iltung'ana le Yuda embuakunoto o larrabal. Ore ake pee ebuaku iltung'ana le Yuda nemir Enkai Yeroboam o Siraeli pooki ootii dukuya Abija o Yuda.

¹⁶Neilanyisho iltung'ana loo Siraeli te dukuya iltung'ana le Yuda neishoru Enkai ninche apik atua Nkaik e Yuda.

¹⁷Nesesekuan Abija o ltung'ana lenyena iltung'ana kumok oleng; neaku etuata too Siraeli iltung'ana gelunot nkalifuni iip imiet.

¹⁸Neidimuni apa iltung'ana loo Siraeli ina kata, neisulu iltung'ana le Yuda, te nkaraki naigarakinote ninche Olaitoriani, Enkai oo loo menye.

¹⁹Nesujaa Abija Yeroboam, neoru ninye inkanas, Betel o nkang'itie enyena kutiti o Yeshana tenebo nkang'itie enyena kutiti o Efron tenebo nkang'itie enyena kutiti.

²⁰Neitu aekata eitoki Yeroboam arrinyu engolon enye too nkolong'i e Abija. Neosh Olaitoriani ninye neye ninye.

²¹Kake etaa Abija magilani, neyam ninye inkituaak tomon oong'uan, netum ilayiok tikitam oaare, o ntoyie tomon o ile.

²²Ore nkulie kiaasin pooki e Abija, inkoitoi enyena o nkirorot enyena, neigeroki too nkaatini o loiboni le Nkai oji Ido.