Read Maasai Bible – Biblia Sinyati 2 Intepen 14 Bible Online

2 Intepen 14 - Maasai Bible – Biblia Sinyati bible

2 Intepen 14

¹Neirura apa Abija, etua anaa loo menye nenukari te nkanasa e Daudi; neitoreisho Asa olayioni lenye te rishata enye. Ore too nkolong'i enyena netum enkop enkiyeng'iyeng ilarin tomon.

²Neas Asa imbaa supati naa sidain too nkonyek o Laitoriani Enkai enye.

³Eiwuang'ie apa ilpereren loo lasarri loo loreren, o wuejitin neeika, neuroo ing'apeta nedung'oo Asherim aauroo.

⁴Neitanap Yuda pee eing'oru Olaitoriani, Enkai oo loo menye, neibung nkitanapat enyena.

⁵Eiwuang'ie sii too nkanas pooki e Yuda iwuejitin neeika, ilpereren oopejieki enkorropil. Netum enkitoria enkiyeng'iyeng too nkolong'i enyena.

⁶Etesheta ninye inkanas naata isunta te Yuda, amu enoto enkop enkiyeng'iyeng. Eitu ninye etum olarrabal te nena olong'i amu eishoo Olaitoriani ninye eseriani.

⁷Nejoki ninye Yuda, “Mateshet iyiook kuna anas, nikintaman isunta o ltaleta, nikipik nchomito oo sekenke; eton aa enaang ena kop, amu king'orutua iyiook Olaitoriani Enkai ang; king'orutua iyiook ninye, neishoo ninye iyiook eseriani too nkaloli pooki.” Neaku eteshetishote ninche nedupoyu.

⁸Neeta apa Asa enjore oo ltung'ana inkalifuni iip uni le Yuda, ooata ilong'oi o remeta. O ltung'ana nkalifuni iip are o ntomoni isiet oo ltung'ana le Benchamen, ooata ilong'oi o nkai; ore kulo pooki naa iltung'ana magil yiolot.

⁹Nelotu Serak le Etiopia agilunore ninche eeta enjore oo ltung'ana emilion nabo, o ngarrin oo mbartan iip uni, nepuonu o metabau Maresha.

¹⁰Nelo Asa anang'are ninye, neitolok ilkererin lenye aaluakino olarrabal to erata le Sefata te Maresha.

¹¹Neishiraki Asa Olaitoriani Enkai enye ejo, “Olaitoriani, meetae likae likinyaanyukie te retoto, te rishata o lmagilani o loshal. Taretu iyiook Olaitoriani Enkai ang, amu kingarakino iyiook iyie, naa te nkarna ino kietuo iyiook aagilunore ele orora. Olaitoriani, ira iyie Enkai ang; mincho eisulu likae tung'ani te iyie.”

¹²Neaku etimira Olaitoriani ile Etiopia te dukuya Asa o te dukuya Yuda, neilanyisho ile Etiopia.

¹³Ore Asa o lelo tung'ana apa ootii tenebo ninche, nesujaa ninche o meitabaiki Gerar. Nebatata ile Etiopia o metaa meetae obo otelekua eishu; amu etigilaki ninche te dukuya Olaitoriani o enjore enye. Nenap iltung'ana le Yuda intokitin kumok oleng naataarutua.

¹⁴Neitoki sii aagil nkanas naamanita Gerar, amu etijing'a euriata o Laitoriani shumata ninche, neya ninche imasaa kumok te nena anas.

¹⁵Near ilng'oborri le lelo apa oata nchoo, neya nkerrai te nkumoi, o ntemesin. Neitoki taa aarrinyo aapuo Yerusalem.