Read Maasai Bible – Biblia Sinyati 2 Intepen 15 Bible Online

2 Intepen 15 - Maasai Bible – Biblia Sinyati bible

2 Intepen 15

¹Eewuo apa Enkiyang'et e Nkai shumata Asaria olayioni le Oded,

²neipang ninye alo anang'are Asa. Nejoki ninye, “Toning'oki nanu Asa, o Yuda pooki o Benchamen: Etii Olaitoriani tenebo iyie, eton sii iyie itii tenebo ninye. Tening'oru iyie ninye nitum, kake tening'ua iyie ninye niking'uaa sii ninye iyie.

³Ore te nkata naado nemeeta Israel Enkai nasipa. Nemeeta olapolosani oiteng'enisho, nemeeta enkitanapata.

⁴Kake teneibelekenyakino ninche to sina lenye Olaitoriani, Enkai e Israel, neing'oru ninye nenoto ninche ninye.

⁵Ore apa te nena katitin nemeetae eseriani teilo oipang o teilo ojing'u amu etijing'aka enyamali sapuk lelo oomanya nkuapi.

⁶Eitaaki ninche ng'iligilat. Negilunore olosho olosho, negilunore enkanasa enkanasa, amu eitanyamala Enkai ninche te pooki pukunoto o sina.

⁷Kake ntagoluoyu iyie! Mincho elepori inkaik inono, amu eikilaakini esiaai ino.”

⁸Ore ake pee ening Asa kulo rorei, ina aibon e Asaria olayioni le Aded, neitagoluo, neiwuang'ie nena kitanyaanyukot oo nkaitin naa ninche olminong teinakop e Yuda o ene Benchamen, o te nena anas naawa ninye teinakop oo ndoinyo e Efraim. Neitoki ninye aitobir olperere lo lasar lo Laitoriani apa otii dukuya olgoriet le nkaji o Laitoriani.

⁹Neiturrur ninye Yuda pooki o Benchamen, o lelo ooing'uaa Efraim o Manase o Simion apa oobikito tenebo ninche, amu iltung'ana kumok ooisikakita ninye eing'uaa Israel, ina kata pee edol aajo etii Olaitoriani Enkai enye tenebo ninye.

¹⁰Eiturrurrote apa ninche te Yerusalem to lapa liokuni lo lari le tomon o miet le nkitoria e Asa.

¹¹Nepolosaki ninche Olaitoriani olasar teina olong, te nena masaa apa naataarutua ninche ilmong'i iip naapishana o nkerra inkalifuni naapishana.

¹²Neibung ninche olning'o lo sotua pee eing'oru Olaitoriani, Enkai oo loo menye, too ltauja lenye pooki o te nkishui enye pooki;

¹³naa ore pooki ng'ae lemeing'oru Olaitoriani Enkai e Israel, neari metua, aa oti o aa moruo, aa olee anaa enkitok.

¹⁴Einosie ninche Olaitoriani olmumai to ltoilo sapuk, o te mbuakunoto o too sekekuani, o te oshoto oo mowuarak.

¹⁵Neshipa Yuda pooki te nkaraki ilo mumai; amu einosa ninche too ltauja lenye pooki, neing'orutua ninche ninye te yieunoto enye pooki, nenoto ninche ninye, neishoo Olaitoriani ninche enkiyeng'iyeng too nkaloli pooki.

¹⁶Ore Maaka, ng'otonye Asa, eiwuang'ie olaiguanani Asa pee meitoki aata enkitoo enye te nkaraki nataasa embae olminong, aitobir enkitanyaanyukoto e Ashera. Nedung Asa ina kitanyaanyukoto auroo, neidong aitaa irrarrat, nelo apejoo to erata le Kidron.

¹⁷Kake eitu apa eiwuang'ieki iwuejitin neeika e Israel. Ore ake etiu neijia nemeeta apa oltau le Asa eleyiata too nkolong'i e nkishui enye pooki.

¹⁸Neyau ninye atua enkaji e Nkai nena tokitin apa naaitisinya menye o nkishoorot naaitisinya ninye makewan, enkosholai o saabu o masaa,

¹⁹neitu aikata eitokini aata olarrabal o metabau olari le tomoni uni o imiet le nkitoria e Asa.