Read Maasai Bible – Biblia Sinyati 2 Intepen 18 Bible Online

2 Intepen 18 - Maasai Bible – Biblia Sinyati bible

2 Intepen 18

¹Keeta apa Yehoshafat enkarsisisho sapuk o enkanyit, neitobir olning'o te nkaraki enkiyama o ltung'ana le Ahab,

²ore te siadi ilkuti arin nedoyio alo enetii Ahab te Samaria. Neyiang'aki Ahab Yehoshafat nkerra kumok o lmong'i tenebo lelo tung'ana apa ootii tenebo ninye, neilejilej ninye pee epuo aagilunore Ramot-Gilead.

³Nejoki Ahab, ilo aiguanani loo Siraeli, Yehoshafat olaiguanani le Yuda, “Eilo iyie tenebo nanu Ramot-gilead?” Newal Yehoshafat ajo, “Atiu nanu anaa enitiu iyie, netiu iltung'ana laainei anaa iltung'ana linono. Aikiaku iyiook tenebo o iyie to larrabal.”

⁴Neitoki Yehoshafat ajoki olaiguanani loo Siraeli, “Tang'asa nkilikuanishore ororei lo Laitoriani.”

⁵Neitoki olaiguanani loo Siraeli aiturrurr iloibonok le Nkai tenebo, iltung'ana iip ong'uan, nejoki ninche, “Aikipuo iyiook olarrabal aagilunore Ramot-Gilead, anaa aimikipuo?” Nejoki ninche, enchom, amu keishoru Enkai apik nkaik o laiguanani.

⁶Kake etejo ninye Yehoshafat, “Aimeetae likae oiboni lo Laitoriani likinkilikuanishore?”

⁷Nejoki olaiguanani loo Siraeli Yehosafat, “Eton etii oltung'ani obo likindim iyiook aaikilikuanishore tialo Olaitoriani, Mikaia olayioni le Imala; kake manyor nanu ninye, amu meibonu aikata isupati tialo nanu, ntorrok ake eibonu.” Nejo Yehoshafat, mincho olaiguanani ejo neijia.

⁸Neitoki olaiguanani loo Siraeli aipotu olkitok obo, nejoki, “Iyau nabo kata Mikaia olayioni le Imala.”

⁹Ore ina kata netonita olaiguanani loo Siraeli o Yehoshafat, olaiguanani le Yuda too lorikan le nkitoo, neishopo ilkilani lenye, netonita ninche te wueji neituutishoreki, te mpolos e kishomi e Samaria; neibonisho iloibonok pooki te dukuya ninche.

¹⁰Ore Sedekia olayioni le Kenaana neitobiraki kewan imowuarak e sekenkei, nejo, “Nji ejo Olaitoriani, ‘Te kuna ilo iyie arrumoo ile Siria o metaba anaa neidaaya ninche.’ ”

¹¹Ore iloibonok pooki neibonu ina, nejo, “Ilepa shomo Ramot-gilead pee ilo amirisho amu aikincho iyie Olaitoriani apik enkaina o laiguanani.”

¹²Ore lelo kulikae apa ooshomo aaipotu Mikaia nejoki ninye, “Ore irorei loo loibonok le Nkai pooki neimaki embae nabo supat tialo olaiguanani; nchoo ororei lino etiu anaa ororei le obo lenye, niro te supatisho.”

¹³Kake etejo Mikaia, “Ore anaa enaishu Olaitoriani, ore ina najo Enkai ai ina nanu airo.”

¹⁴Ore ake pee ebau enetii olaiguanani, nejoki olaiguanani ninye, “Mikaia, eikipuo iyiook Ramot-gilead, olarrabal anaa aikipal?” Newalu ninye nejo, “Ilepa shomo timirisho, kepiki ninche enkaina ino.”

¹⁵Kake etiaaka olaiguanani ninye, “Ai katitin aja aasai nanu pee iro esipata ake te nkarna o Laitoriani?”

¹⁶Neitoki ninye ajo, “Atoduaa nanu Isiraeli pooki eidapashakinote ildoinyio anaa nkerra nemeeta olchekut; netejo Olaitoriani, ‘Meeta kulo olaitasheikinoni; nchoo pooki ng'ae errinyo alo enkang enye te seriani.’ ”

¹⁷Neitoki olaiguanani loo Siraeli ajoki Yehoshafat, “Keitu nanu aajoki iyie nchere meibonu ninye esidai tialo nanu, kake entorroni ake eibonu?”

¹⁸Nejo Mikaia, “Toning'o naa ororei lo Laitoriani: Atoduaa nanu Olaitoriani etonita to lorika lenye le nkitoo, ore olorora pooki le shumata, neitashe te nkaina enye e tatene, o te ne kedianye.

¹⁹Nejo Olaitoriani, ‘Aing'ae olo alej Ahab olaiguanani loo Siraeli, pee etum ninye ashomo atabatatayu te Ramot-gilead?’ Nejo obo embae nabo, nejo olikae enkae.

²⁰Neitoki alotu enkiyang'et neitashe te dukuya Olaitoriani, nejo, ‘Kalo nanu alej ninye.’ Nejoki Olaitoriani, ‘Tia oitoi?’

²¹Nejo ninye, ‘Kalo nanu, naiko iloibonok pooki le Baal metelejisho.’ Nejo ninye ilo iyie alej ninye, naa ndimu ninye, shomo naa taasa ina.

²²Ore naa taata etipika Olaitoriani enkiyang'et e lejare nkutukie e kulo oibonok linono; eiroro entorroni tialo iyie.”

²³Neitoki Sedekia olayioni le Kenaana anyiku neosh Mikaia eseder, nejoki, “Kaji eimua Enkiyang'et o Laitoriani pee epuku te nanu nikilotu airorie iyie?”

²⁴Nejo Mikaia, “Ng'ura ajo ilo iyie adol teina olong, tinilo iyie olgilata liatua aisudori.”

²⁵Nejo ilo aiguanani loo Siraeli, “Embung'a Mikaia, nirrinyirrinyi ninye aaya enetii Amon ilo balusui le nkanasa, o enetii Yoash ilo ayioni lo laiguanani.

²⁶Nilo ajo, ‘Nji ejo olaiguanani, Entipik ena tung'ani atua jila, ninchosho ninye meinosa imukateni naatoito neok enkare, o metaba anaa nashukunye te seriani.’ ”

²⁷Nejo Mikaia, “Tenitushukunye iyie te seriani, neitu nanu aairorie Olaitoriani”, neitoki ninye ajo, “Entoning intae lo orere pooki!”

²⁸Neaku eshomo Ahab, olaiguanani loo Siraeli o Yehoshafat, olaiguanani le Yuda Ramot-gilead.

²⁹Nejoki olaiguanani loo Siraeli Yehoshafat, “Kaibelekeny nanu enkishopo ai nalo olarrabal, kake inchopo iyie ilkilani linono le nkitoo.” Neibelekeny olaiguanani loo Siraeli enkishopo enye nepuo ninche olarrabal.

³⁰Neitanapa apa olaiguanani le Siria ilkituaak loo ngarrin enyena oo mbartan, ajoki, “Emiarare ake oloti anaa olkitok, kake olaiguanani loo Siraeli ake entaarare.”

³¹Ore ake pee edol lelo kituaak loo ngarrin oo mbartan Yehoshafat nejo ninche, “Olaiguanani loo Siraeli ilo.” Neibelekenya ninche aarare ninye; neyietu Yehoshafat abuaku, neretu Olaitoriani ninye. Neboinaa Enkai ninche aitung'uaa ninye.

³²Amu etoduaa ake lelo kituaak loo ngarrin oo mbartan aajo mme olaiguanani loo Siraeli ilo nerrinyo te sujata enye.

³³Kake eteyietuo oltung'ani obo enkawuo enye neng'oroo embae, neng'or olaiguanani loo Siraeli eripata enkila enye esekenkei, to lgoo; ore te nkaraki ina nejoki ninye olarewani lenye le ngarri e mbarta, “Mbelekenyayu ntung'uayioki nanu olarrabal, amu aatipikaki nanu olbae.”

³⁴Neirowuaju oleng olarrabal ina olong, neigarakino olaiguanani loo Siraeli eng'arri enye embarta aing'or ile Siria o metaa teipa. Ore ake pee edoyio enkolong neye.