Read Maasai Bible – Biblia Sinyati 2 Intepen 21 Bible Online

2 Intepen 21 - Maasai Bible – Biblia Sinyati bible

2 Intepen 21

¹Neirrag Yehoshafat etua anaa loo menye, nenukari tenebo loo menye tiatua enkanasa e Daudi, neitoreisho Yehoram olayioni lenye, te rishata enye.

²Eeta apa ninye Yehoram ilalashera ile: Asaria o Yehiel o Sekaria o Mikael o Shefatia. Ore apa kulo pooki naa ilayiok le Yehoshafat olaiguanani le Yuda.

³Eishoo apa ninche menye nkishoorot sapuki, e nkosholai o saabu, o ntokitin e tipat, tenebo nkanas naasheta isunta e Yuda. Kake Yehoram eishoo enkitoria, amu ninye apa olkikau.

⁴Ore ake pee etonie Yehoram olorika le nkitoo le papaai lenye, nebul, near ilalashera lenyena pooki metuata to lalem, tenebo sii kulikae tung'ana kituaak le Israel.

⁵Oloo larin tomoni uni oaare apa Yehoram pee eiteru aaku olaiguanani, neitoreisho ninye ilarin isiet te Yerusalem.

⁶Neibung ninye orrekie loo laiguanak le Israel anaa apa enataasa Ahab. Amu entito apa e Ahab enkitok enye. Neas ninye mbaa torrok too nkonyek o Laitoriani.

⁷Kake meidaikie ake Olaitoriani enkaji e Daudi, te nkaraki olning'o lo sotua apa oitobira ninye o Daudi, neisiligishore apa ninye pee eitoreisho eishoi enye, o layiok lenyena ntarasi.

⁸Ore too nkolong'i enkitoria enye, nekepari Edom aing'uaa enkitoria e Yuda, negelaki ninche ate olaiguanani.

⁹Nedumunye Yehoram tenebo ilarikok lenyena le njore, o ngarrin enyena oo mbartan pooki, nepuo kewarie aaidaikie iltung'ana le Edom apa oomanita ninye o lkituaak lenyena loo ngarrin oo mbartan.

¹⁰Neaku etekepari apa Edom aing'uaa enkitoria e Yuda o metabaiki ena olong. Ore apa teina kata nekepari sii ninye Libna aing'uaa enkitoria enye, te nkaraki natanya ninye Olaitoriani, Enkai oo loo menye.

¹¹Ore ake sii eshomo ninye aitobir iwuejitin neeika teinakop oo ldoinyio e Yuda, neitapong'oo lelo oomanya Yerusalem metapaasha Olaitoriani, neitapong'oo Yuda.

¹²Nelotu empalai enetii ninye naing'uaa oloiboni le Nkai oji Eliya, ejo, “Nji ejo Olaitoriani, Enkai e Daudi papaai lino, ‘Ore te nkaraki neitu iyie imbung orrekie le Yehoshafat papaai lino, anaa orrekie le Asa olaiguanani le Yuda,

¹³kake orrekie loo laiguanak le Israel iturubare, nintapong'oyie Yuda o lelo oomanya Yerusalem metaasa ing'ok, anaa apa enaitapong'oyie enkaji e Ahab Israel metaasa ing'ok, nitaara sii ilalashera linono metuata, lelo le nkaji e papaai lino, laa ninche supati te iyie.

¹⁴Ore te nkaraki ena, keyau Olaitoriani olmeitai kitok shumata iltung'ana linono, o nkera inono, o nkituaak inono, o ntokitin inono pooki.

¹⁵Ore iyie makewan nikijing enkeeya torrono e nkoshoke o metaba anaa nikipuku imonyit te nkaraki ina keeya.’ ”

¹⁶Neputu Olaitoriani engoro oo Lfilisti o Ilarabu te nkaraki Yehoram. Etaaniki apa lelo Filisti o Ilarabu Etiopia.

¹⁷Nepuonu ninche aarasaki Yuda, neibung ninye, nenap ninche aaya ntokitin pooki naanoto te nkaji o laiguanani, neya sii ilayiok lenyena o nkituaak enyena, neaku meetae olayioni otung'eikiaki ninye, meteleku ake Yehoahas ilo ayioni lenye oti te pooki.

¹⁸Ore etulusoitie kuna pooki near Olaitoriani ninye teina keeya nemeishiunoyu enkoshoke enye.

¹⁹Ore te nkiti rishata etulusoitie ilarin oaare, neipang'u imonyit enyena te nkaraki ina keeya. Neye ninye te mion sapuk. Neitu eitobir iltung'ana lenyena enkima, aaisho ninye enkanyit anaa apa enaitobiraki enkima too loo menye.

²⁰Oloo larin tomoni uni oaare apa ninye pee eiteru aitoreisho, neitoreisho ninye ilarin isiet te Yerusalem. Eiwuang'a ninye meetae oltung'ani otishilayie. Etunukaitie ninche ninye te nkanasa e Daudi, kake mme too nkuraren oo laiguanak.