Read Maasai Bible – Biblia Sinyati 2 Intepen 28 Bible Online

2 Intepen 28 - Maasai Bible – Biblia Sinyati bible

2 Intepen 28

¹Oloo larin tikitam apa Ahas pee eiteru aitoreisho, neitoreisho ninye ilarin tomon o ile te Yerusalem. Neitu ninye eas mbaa sidain too nkonyek o Laitoriani, anaa apa papaai lenye Daudi.

²Kake eibung'a ninye irrekiei loo laiguanak le Israel. Eitobira doi ninye nkitanyaanyukot o ntokitin naatosholaki aaitobiraki Baal.

³Nepej enkorropil to erata lo layioni le Hinom; nepejoo ilayiok lenyena anaa olasar, te risioroto e nena tabo apa oo loshon ooterewa Olaitoriani aiwuang'ie te dukuya iltung'ana le Israel.

⁴Neitayu ninye olasar nepejoo enkorropil, too wuejitin e shumata o too ldoinyio, o tiabori pooki shani onyori.

⁵Ore te nkaraki ina eishooyie Olaitoriani ninye apik nkaik o laiguanani le Siria. Nemir olaiguanani le Siria ninye, neibung iltung'ana lenyena kumok neya ninche Dameski. Eishooyioki sii apa aapik nkaik o laiguanani le Israel, ilo otimira ninye te sesekuanata sapuk.

⁶Amu ore olayioni le Remalia netasesekuana iltung'ana nkalifuni iip nabo o tikitam te Yuda te nkolong nabo. Ore lelo pooki naa iltung'ana yiolot, te nkaraki natanyaita ninche Olaitoriani, Enkai oo loo menye.

⁷Ore Sikri ilo tung'ani magilani le Efraim, nesesekuan Maaseia, olayioni lo laiguanani, o Asikam ilo kitok le nkaji e nkitoo, o Elkana ilo osujaki te nkitoo o laiguanani.

⁸Ore iltung'ana le Israel neibung iltung'ana nkalifuni iip are e lelo tung'ana lenye, nkituaak o layiok o ntoyie. Ewaita sii iyarunot kumok te ninche neya Samaria.

⁹Kake etii apa oloiboni lo Laitoriani ine, oji enkarna enye Oded. Neipang ninye alo atumore ina jore naing'uaa Samaria, nejoki ninche, “Ng'ura, ore amu etagorokine apa Olaitoriani, Enkai oo loo papaai linyi Yuda, eishorua ninche apik nkaik inyi, kake itasesekuana intae ninche te ngoro naing'uaa shumata.

¹⁰Niyieuu taata intae nintaa irrindiki iltung'ana le Yuda o le Yerusalem, Ilewa o nkituaak. Aimiatata intae ing'ok inyi maate tialo Olaitoriani Enkai inyi?

¹¹Entoning'oki naa taata nirrinyirrinyi lelo apa limbung'a aayau, amu etii engoro napi o Laitoriani shumata intae.”

¹²Ore apa kulikae tung'ana kituaak too ltung'ana le Efraim, Asaria olayioni le Yohanan, o Berekia olayioni le Meshilemot, o Yehikia olayioni le Shalum, o Amasa olayioni le Hadalai, neitashe aagilunore lelo apa ooing'uaa olarrabal.

¹³Nejoki ninche, “Miyauu intae lelo yarunot ene, amu ijojo intae pee iyauu shumata iyiook enkitarruroto to Laitoriani aaponiki ing'ok ang o nkitarrurot ang maate. Amu aikitok enkitarruoroto ang maate, netii engoro napi te nkaraki Israel.”

¹⁴Neaku etapala lelo tung'ana le njore lelo yarunot aaisho meshomo, tenebo nena masaa, te dukuya lelo kituaak o eumata pooki.

¹⁵Ore lelo tung'ana apa ooipotoki nkarn nedumunye aaya lelo yarunot, o masaa naatarayioki, neishopoki nkilani lelo lemeishopo. Neishopoki ninche nkilani, neisho ninche inamuka, neisho endaa o entoki naok, neyel ninche te ilata. Ore lelo lemeidimari nenapi too sirkon. Neyau ninche enkop enye maate, Yeriko enkanasa oo ltuka. Neitoki ninche aarrinyo aapuo Samaria.

¹⁶Ore apa teina kata neomonu olaiguanani Ahas eretoto to laiguanani le Asiria.

¹⁷Amu enyaakita iltung'ana le Edom aarasaki nemir Yuda, neya ninye nkanas e Betshemesh o Aijalon, o Gederot, o Soko tenebo nkang'itie enyena kutiti,

¹⁸neya Timna tenebo nkang'itie enyena kutiti, o Gumso tenebo nkang'itie enyena kutiti, nemanyisho ninche tenena wuejitin.

¹⁹Amu eitadouo apa Olaitoriani Yuda te nkaraki Ahas olaiguanani le Israel, amu etaasa apa ninye inenkarruoisho tiatua Yuda, netaa olemeisiligayu to Laitoriani.

²⁰Neaku eewuo Tilgat-pilnesa, ilo aiguanani le Asiria agilunore ninye, ore terishata naitagol ninye neidop ninye.

²¹Amu eitayio apa Ahas te nkaji o Laitoriani, o te nkaji o laiguanani o too nkajijik oo lkituaak, ntokitin e kodi naaishoo olaiguanani le Asiria; kake eitu eretu nena tokitin ninye.

²²Ore teina kata enye o sina neponari ninye aaku olemeisiligayu to Laitoriani. Ore ake sii ele aiguanani oji Ahas,

²³amu etopolosaka ninye nkaitin e Dameski, naa ninche apa naatimira ninye, nejo ninye, “Ore te nkaraki natareto nkaitin oo ltung'ana le Asiria ninche, kapolosaki nanu ninche pee aatum aataretu nanu.” Kake etaa ninche enkidaata te ninye o te Israel pooki.

²⁴Neiturrur Ahab tenebo imasaa e nkaji e Nkai nedung'udung nena masaa aitaa ndung'udung'ot, neiken ninye nkutukie oo nkajijik e nkaji o Laitoriani; neitobiraki kewan ilpereren loo lasarri te pooki pijata le Yerusalem.

²⁵Ore tiatua pooki anasa e Yuda, neitobir ninye iwuejitin neeika neepejokinye enkorropil kulie aitin, neitagor Olaitoriani, Enkai oo loo menye.

²⁶Ore apa nkulie kiaasin enyena o nkoitoi enyena pooki, ebaiki enkiterunoto o metabaiki enkiting'oto, ng'ura eigeroki te mbuku oo laiguanak le Yuda o Israel.

²⁷Neirrag Ahas etua anaa loo menye, nenukaa ninche ninye te nkanasa, tiatua Yerusalem, amu eitu ninche eyau ninche nkuraren oo laiguanak le Israeli. Neitoreisho Hesekia olayioni lenye te rishata enye.