Read Maasai Bible – Biblia Sinyati 2 Intepen 29 Bible Online

2 Intepen 29 - Maasai Bible – Biblia Sinyati bible

2 Intepen 29

¹Eiterua apa Hesekia aitoreisho aa o loo larin tikitam o imiet, neitoreisho ninye ilarin tikitam ooudo te Yerusalem. Ore apa enkarna e ng'otonye naa Abija entito e Sekaria.

²Neas mbaa sidain te dukuya Olaitoriani, te risioroto e nena pooki apa naataasa papaai lenye Daudi.

³Ore to lari le dukuya le nkitoria enye, to lapa le dukuya, nebol ninye nkutukie oo nkajijik e nkaji o Laitoriani, neram ninche.

⁴Neitijing'u ninye ilapolosak o Lawi, neiturrur ninche to lgoriet le nkalo o loosaen, nejoki ninye ninche, “Entoning'oki nanu lo Lawi!

⁵Entisinya ate, nintisinyinyi enkaji o Laitoriani, Enkai oo loo papaai linyi, niwuang'ieng'ie intae olduruk teine wueji sinyati.

⁶Amu etaa apa iloo papa ilemeisiligayu, netaasa ninche entorroni too nkonyek o Laitoriani Enkai ang; etung'uitie ninche ninye, neibelekenyate aapaash emanyisho o Laitoriani, neisho ninche ninye oriong.

⁷Neiken sii kutukaji eine wueji sinyati, near iltaai, neitu epejoki enkorropil anaa eishooyo ilasarri teine wueji sinyati, aaisho Enkai e Israel.

⁸Ore te nkaraki ina, nelotu engoro o Laitoriani napi shumata e Yuda o Yerusalem, neitaa ninche entoki naitureisho, o enenking'asia, o entoki naimakini, anaa enidolidolo too nkonyek inyi.

⁹Amu ng'ura to lalem apa etabatatate loo papa o ilayiok lang, o ntoyie ang, ore nkituaak ang naatii netii atua eyararoto te nkaraki ena.

¹⁰Etii naa taata oltau lai pee aitobir osotua lo lning'o o Laitoriani, Enkai e Israel, pee etum ina goro enye napi aibelekenyayu te iyiook.

¹¹Nakera aainei, emimenaa naa taata, amu etegelua intae Olaitoriani pee ipuopuo aaitashe te dukuya ninye, pee isiayiayia ninye, niakuku ilaisiaayiak lenyena nipejokiki ninye enkorropil.”

¹²Neitoki aadumunye kulikae Lawi, Mahat olayioni le Amasia, o Yoel olayioni le Asaria loo layiok le Kohat; ore too layiok le Merari naa Kish olayioni le Abdi, o Asaria olayioni le Yahalel; Ore too le Gershon, naa Yoa olayioni le Sima, o Eden olayioni le Yoa.

¹³Ore too layiok le Elisafan, naa Shimri o Yeul; ore too layiok le Asaf naa Sekaria o Matania;

¹⁴ore too layiok le Heman, naa Yehuel o Shimei; ore too layiok le Yedutum naa Shimeia o Usiel.

¹⁵Neiturrur ninche ilalashera lenye neitisiny ate, nejing ninche atua anaa enaitanapishe olaiguanani, too rorei lo Laitoriani, pee eitisinyi enkaji o Laitoriani.

¹⁶Nepuo ilapolosak olgilata liatua le nkaji o Laitoriani aaitisiny, neitayu ninche olduruk pooki, apa otii atua enkaji o Laitoriani aayau boo, ilo goriet le nkaji o Laitoriani, nedumu Ilawi aaya oerata le Kidron.

¹⁷Eiterutua apa ninche aaitisiny te nkolong e dukuya o lapa le dukuya, ore te nkolong e isiet o lapa nepuonu ninche olgoriet le kutukaji enkaji o Laitoriani; ore too nkolong'i isiet neitisiny ninche enkaji o Laitoriani ore te nkolong e tomon o ile o lapa le dukuya neidip ninche.

¹⁸Neitoki ninche aapuo enetii olaiguanani Hesekia nejoki ninye, “Kintisinya iyiook enkaji o Laitoriani pooki, ilo perere lo lasar opejori o masaa enyena pooki, o ina misa e mukate e nkitoduaaroto o masaa enyena pooki.

¹⁹Ore imasaa pooki apa naawa olaiguanani Ahas te nkitoria enye apa meisiligayu, nikintobira iyiook, nikintisinya; naa ng'ura etii ninche dukuya olperere lo lasar lo Laitoriani.”

²⁰Neitoki olaiguanani Hesekia adumunye tadekenya neiturrur iltung'ana kituaak le nkanasa, neilep alo enkaji o Laitoriani.

²¹Neyau ninche iloing'ok oopishana, o lmeregeshi oopishana o lkuoo le kerra oopishana, te nkaraki olasar loo ng'ok o te nkaraki enkitoria, o te nkaraki ewueji sinyati o te nkaraki Yuda. Neitoki ninye aitanap ilapolosak lelo ayiok le Aron pee eishooyo ninche anaa olasar te nchumata olperere lo lasar lo Laitoriani.

²²Neyieng ninche lelo oing'ok, neng'amu ilapolosak osarge neisuaki olperere lo lasar; neyieng lelo meregeshi neisuaki osarge lenye olperere lo lasar; neyieng ilkuoo le kerra neisuaki osarge lenye olperere lo lasar.

²³Neitokini aayau lelo kineji anaa olasar loo ng'ok, dukuya olaiguanani o eumata, neiteleiki ninche nkaik enye shumata ninche.

²⁴Neyieng ilapolosak ninche neitobir olasar loo ng'ok to sarge le lelo kineji te nchumata olperere lo lasar, pee eitobir olning'o lo sotua te nkaraki Israel pooki. Amu eitanapishe olaiguanani nchere, ore olasar opejori, o lasar le ng'oki naa keitobiri te nkaraki Israel pooki.

²⁵Nepik ninye Ilawi atua enkaji o Laitoriani, eeta nkinantani dapashi oo saanini, o Nkai oo sinkolioitin, o lwululi loo usin, te risioroto enkitanapata e Daudi, o ene Gad ilo aduaani lo laiguanani o Natan oloiboni le Nkai. Amu ore apa ina kitanapata naa Olaitoriani eing'uaa eimunye iloibonok lenyena.

²⁶Neitashe Ilawi eeta nena kinantani e Daudi neitashe ilapolosak eeta sekekuani.

²⁷Neitoki Hesekia aitanapisho pee eitobiri olasar opejori te nchumata olperere lo lasar. Ore ake pee eiteruni ilo perere lo lasar, neiteruni sii osinkolio oranyakini Olaitoriani, neitusuji eoshoto oo sekekuani, o nkinantani e Daudi ilo aiguanani le Israel.

²⁸Neserem ina umata pooki, neranyisho ilaranyak, nebuaku sekekuani. Neranyisho nena pooki o metaba anaa neishunye ilo asar opejori.

²⁹Ore ake pee eidipayu olasar, neirrugo olaiguanani o lelo pooki ootii tenebo ninye aaserem.

³⁰Neitanap olaiguanani Hesekia o lapolosak, o ltung'ana kituaak ilapolosak, metaranyaki Olaitoriani enkisisa too rorei le Daudi, o Asaf ilo aduaani. Nerany ninche enkisisa o Laitoriani te nchipai, neirrugo ninche aaserem.

³¹Neitoki Hesekia ajo, “Intisinyakita taata intae ate Olaitoriani; entinyiku ene; niyauu ilasarri o nkishoorot e nashe atua enkaji o Laitoriani.” Neyau ina umata ilasarri, o nkishoorot e nashe, ore lelo pooki ooata enyorrata too ltauja, neyau ilasarri oopejori.

³²Ore esiana oo lasarri oopejori, ooyautua ina umata naa iloing'ok ntomoni naapishana, o lmeregeshi iip nabo, o lkuo le kerra iip are. Ore kulo pooki naa iloo lasarri oopejokini Olaitoriani.

³³Ore olasar le nkitisinyata naa iloing'ok iip ile o nkerra nkalifuni uni.

³⁴Kake aikuti apa ilapolosak oleng nemeidim aaitobira ilasarri oopejori pooki, neaku eitisinya apa ilapolosak ate, neretu ninche ilalashera lenye, o metaba anaa neidipayu esiaai. Amu kedupa apa Ilawi too ltauja aalang ilapolosak.

³⁵Ore tenebo ilo asar opejori kitok, netii eilata o lasar le seriani, netii ilasarri oopikuni te nkaraki ilasarri oopejori. Neikoni neijia aarrinyu enkisiaayiare e nkaji o Laitoriani.

³⁶Ore Hesekia o ltung'ana pooki neshipayu te nkaraki ina naitaasa Enkai iltung'ana; amu eewuo ina bae nabo kata.