Read Maasai Bible – Biblia Sinyati 2 Intepen 32 Bible Online

2 Intepen 32 - Maasai Bible – Biblia Sinyati bible

2 Intepen 32

¹Ore etulusoitie kuna baa o kuna kiaasin, e nkisiligata, nelotu Senakerib arasaki Yuda neun ilng'oborri aipirakinye nena anas naasheta isunta, eji ejo ninye tenaa keisulie.

²Ore ake pee edol Hesekia ajo eewuo Senakerib, neyieu ninye neaarare Yerusalem,

³neitobir tenebo ilkituaak lenyena o ltung'ana lenyena magil, pee eibooyo enkare e nena shorroi naatii auluo enkanasa. Neret ninche ninye.

⁴Neiturruro olorere kitok, neibooyo nkonyek oo nkariak pooki o erata apa naaruko teinakop, ejo, “Kainyoo pee epuonu ilaiguanak le Asiria aatum enkare sapuk?”

⁵Neasisho ninye etumuta nabo, neshet ninye nena sunta apa naaturori, nepik iltaleta shumata enye. Ore tioriong ninye neshetu enkae suntai. Neitagol sii Milo teina anasa e Daudi. Eitobira sii apa imasaa o larrabal o long'oi te nkumoi.

⁶Nepik ninye iltung'ana abori ilarikok le njore teina anasa. Neiturrurroki ninche kewan to lkurroto te mbata e kishomi, neirorie ninche aitagol ejo,

⁷“Entagoluoto nimimiureishoyu. Emiureyuyu olaiguanani le Asiria o ina jore pooki natii tenebo ninye. Amu etii obo kitok tenebo iyiook olang ninye.

⁸Keata ninye engolon e tung'ani kake ore tialo iyiook netii Olaitoriani Enkai ang, pee eretu iyiook nearisho too larrabali lang.” Negolu iltung'ana oishua te lelo rorei le Hesekia olaiguanani le Yuda.

⁹Ore tesiadi ena, neirriu Senakerib, olaiguanani le Asiria ilo apa otang'adua Lakish aman, tenebo enjore enye pooki, isinkan lenyena meetu Yerusalem enetii olaiguanani Hesekia olaiguanani le Yuda o ltung'ana. Oltung'ana pooki le Yuda apa ootii Yerusalem ejo,

¹⁰“Nji ejo Senakerib olaiguanani le Asiria, ‘Kainyoo intae isiligitata, eji pee intasheshe intae itang'adutua aairin Yerusalem?

¹¹Keitu eitapong'oo intae Hesekia pee eisho intae entuata to lameyu o te nkure, ejoki intae: Kekordu iyiook Olaitoriani Enkai ang te nkaina o laiguanani le Asiria?

¹²Keitu ninye eiwang'ie Hesekia iwuejitin o lperereni loo lasarri neitanap Yuda o Yerusalem ejo: To lperere obo lo lasar intae enteserem naa te nchumata enye intae entayutu ilasarri?

¹³Aimiyiololo intae enaitaasa nanu o loo papa iltung'ana le kulie kuapi? Keidim apa nkaitin e lelo oreren aatokordu iloshon lenye te nkaina ai?

¹⁴Kake kaa tiatua nkaitin pooki e lelo oshon apa ooidaikie papa lai tukul naidima atokordu iltung'ana lenyena te nkaina ai, eji metaa keidim Enkai inyi atokordu intae te nkaina ai?

¹⁵Ore naa taata emincho Hesekia meitapong'oi intae anaa elej intae, tena pukunoto enye, nimining'ining'i intae ninye. Amu meetae enkai e ae kop anaa enkitoria naidima atokordu iltung'ana lenyena te nkaina ai, anaa te nkaina oo loo papa. Kebaa naa meidim Enkai inyi atokordu intae te nkaina ai!’ ”

¹⁶Neiro lelo sinkan lenyena mbaa kumok naaipirta Olaitoriani Enkai o sinka lenye Hesekia.

¹⁷Neiger ninye mpala amor Olaitoriani Enkai oo Siraeli neiro asukeny ninye ejo, “Anaa nkaitin oo loshon neitu eidim aatokordu iltung'ana lenye too nkaik aainei, neijia etiu Enkai e Hesekia, mekordu ninye iltung'ana te nkaina ai.”

¹⁸Nebuaku ninche aajo neijia te nkutuk e Yuda, aaitoning iltung'ana le Yerusalem apa ootii esuntai, ejo pee eiture neitashal, ejo pee etum aawaita enkanasa.

¹⁹Neiro ninche aaimaki Enkai e Yerusalem, anaa enaimaki nkaitin oo loreren le nkop, naa esiaai oo nkaik oo ltung'ana.

²⁰Neomon Hesekia olaiguanani o Isaya oloiboni le Nkai, olayioni le Amos te nkaraki ena, neishiraki ninche keper.

²¹Neirriu Olaitoriani olmalaika otara metuata lelo morran pooki magil, o larikok le njore o lkituaak loo lng'oborri lo laiguanani le Asiria. Neaku etorrinye ninye te nkurruna e nkomom enye alo enkop enye makewan. Ore pee elotu atua enkaji e nkai enye, near kulikae ayiok lenyena ninye metua.

²²Neitajeu Olaitoriani Hesekia, o lelo oomanya Yerusalem te nkaina e Senakerib, olaiguanani le Asiria, o te nkaina oo lmang'ati lenyena pooki. Neisho ninche enkiyeng'iyeng te pooki shoto.

²³Neyau ilkumok nkishoorot aaisho Olaitoriani te Yerusalem, neisho ntokitin e tipat Hesekia olaiguanani le Yuda, neaku keyanyiti ninye too loshon pooki, ebaiki ina kata neito idia alo.

²⁴Ore apa te nena olong'i nemuoyu Hesekia neaku keye, neomon ninye Olaitoriani, newal Olaitoriani enkomono enye, neisho ninye olmonekie.

²⁵Kake eitu eishoru Hesekia olerrinyore te risioroto eina supatisho naitaasaki ninye, amu etawuase to ltau lenye. Neaku eewuo engoro napi shumata ninye o Yuda o Yerusalem.

²⁶Kake eitoborro Hesekia kewan teilo wuasa lo ltau lenye, ninye o lelo oomanya Yerusalem, neaku eitu eitoki engoro napi o Laitoriani alotu shumata ninche too nkolong'i pooki e Hesekia.

²⁷Neeta apa Hesekia enkarsisisho sapuk o enkanyit, neitobiraki kewan ilchumat le nkosholai o le saabu, o soito oogol enkinyang'a, o sonkoyoni, o long'oi o masaa pooki naagol enkinyang'a.

²⁸Etesheta sii apa nkajijik naashumishoreki te nkaraki entapa, o enaisho oo sabibu, o eilata, o laleta te nkaraki mpukunot pooki oo nkishu, o muatat oo nkerra.

²⁹Neitobiraki sii kewan nkanas, o luaat oo nkerra, o nkishu kumok, amu eishoo apa Enkai ninye imasaa kumok.

³⁰Eikeno sii apa Hesekia iwuejitin oo nkariak e shumata oo nkariak e Gishon, neb o inaa ninche aipirie enkalo o loontoluo le nkanasa e Daudi. Nebul Hesekia too siaaitin pooki.

³¹Ore tialo ilbalusini le Babilon o lkituaak le Babilon, apa ooirriwakaki ninye meikilikuanishore te nkaraki ilo monekie otaasaki te nkop, nepalaa Enkai ninye, pee etum atetema ninye neyiolou nena pooki naatii oltau lenye.

³²Ore apa nkulie kiaasin e Hesekia, o nkiaasin enyena sidain, ng'ura eigeroki te nduaata e Isaya ole Amos, ilo oiboni le Nkai, te mbuku oo laiguanak le Yuda o Israel.

³³Neirura Hesekia etua anaa apa loo menye, nenukari ninye te wueji neika oo nkuraren oo layiok le Daudi. Ore Yuda pooki o lelo oomanya Yerusalem neisho ninye enkanyit te keeya enye. Neitoreisho olayioni lenye Manase te rishata enye.