Read Maasai Bible – Biblia Sinyati 2 Intepen 34 Bible Online

2 Intepen 34 - Maasai Bible – Biblia Sinyati bible

2 Intepen 34

¹Oloo larin isiet apa Yosia pee eiteru aitoreisho, neitoreisho ninye ilarin tomoni uni oobo te Yerusalem.

²Etaasa ninye mbaa sidain too nkonyek o Laitoriani, neibung orrekie le Daudi papaai lenye, neitu eibelekenya alo enkalo e tatene anaa ene kedianye.

³Amu ore to lari le isiet le nkitoria enye, eton aa oti, neiteru aing'oru Enkai e Daudi papaai lenye; ore to lari le tomon oaare neiteru aituku Yuda o Yerusalem, aiwuang'ie iwuejitin neeika, o Asherim, nkitanyaanyukot oo nkaitin naaguetuno o naatosholuaki.

⁴Negil ninche ilpereren loo lasarri le Baal eitasheiki ninye. Neuroo ilpereren loo lasarri le nkorropil apa ootii shumata ninche. Nebel asherim aitaa mbelibelat, o nena kitanyaanyukot naaguetuno o naasholuno. Neitaa empunyua neisuaaki nkuraren e lelo apa ooitayu ilasarri too nchumat enye.

⁵Etapejoyie sii apa iloik le lelo apolosak too nchumat e lelo pereren lenye, neituku Yuda o Yerusalem.

⁶Ore tiatua nkanas e Manase o Efraim, o Simion o metabaiki Naftali, te nkidaata enye too nkaloli pooki,

⁷eturoyie ninye ilpereren loo lasarri, neidong Asherim, o nkitanyaanyukot aitaa empunyua, nesulaki enkop ilpereren pooki le nkorropil te nkop e Israel pooki. Neitoki ninye arrinyo alo Yerusalem.

⁸Ore apa to lari le tomon o isiet le nkitoria enye, eidipa aipoo ina kop o enkaji e Nkai, neirriwaki Shafan olayioni le Asalia olkilikuai, o Mesai ilo balusui le nkanasa o Yoa olayioni le Yoahas, ilo aigeroni, pee etum aaitobira enkaji o Laitoriani Enkai enye.

⁹Nepuonu ninche enetii Hilkia olapolosani kitok, neisho nena pisai apa naayawuaki enkaji e Nkai, apa naatasotutuo Ilawi, ebaiki Manase o Efraim o metabaiki ilo pisiai pooki le Israel o Yuda pooki, o Benchamen, o lelo pooki oomanya Yerusalem.

¹⁰Neisho ninche lelo aisiaayiak apa ooitasheiki enkaji o Laitoriani. Ore lelo aisiaayiak apa oasisho tiatua enkaji o Laitoriani; neishooyo te nkaraki eramata o enkitobirata eina aji.

¹¹Neisho ninche ilaguetak loo nkeek, o lashetak, pee einyiang'u isoito, o nkeek, o loom, te nkaraki ina shetare apa naishoo ilaiguanak le Yuda erruoyo.

¹²Neas iltung'ana esiaai aaitobiraki. Ore apa oloitasheiki ninche naa Yohat o Obadia loo Lawi, loo layiok le Merari naa Sakaria o Meshulam, too layiok le Kohat. Naa Ilawi pooki, naa arriyiak too nkinantani o sinkolio.

¹³Ninche apa ooitasheiki ilanapak loo lolan, neutaa pooki oas pooki pukunoto e nkisiaayiare. Ore ilkulikae Lawi naa ilasirak, o lkituaak, o larripok le kishomi.

¹⁴Ore eitayu ninche nena pisai apa naayawuaki atua enkaji o Laitoriani, netum Hilkia olapolosani embuku oo nkitanapat o Laitoriani apa naaishoruaki aaimunye Musa.

¹⁵Nejoki Hilkia Shafan olaigeroni, “Anoto nanu embuku oo nkitanapat tiatua enkaji o Laitoriani.” Neisho Hilkia ina buku Shafan.

¹⁶Neyaki Shafan ina buku olaiguanani, neitoki aliki olaiguanani ajoki, “Ore nena pooki naaitanapaki isinkan linono, easita ninche.

¹⁷Eishutua ninche nena pisai apa naanotoki te nkaji o Laitoriani, netipika ninche nkaik o laigerok o laitasheikinok.”

¹⁸Neitoki Shafan olaigeroni ajoki olaiguanani “Aishoo nanu Hilkia olapolosani embuku.” Neisumaki Shafan olaiguanani.

¹⁹Ore ake pee ening olaiguanani irorei loo nkitanapat nepolos nkilani enyena.

²⁰Neitanap olaiguanani Hilkia o Ahikam olayioni le Shafan, o Abdon olayioni le Mika, o Shafan olaigeroni, o Asaia ilo aisiaayiani lo laiguanani nejoki,

²¹“Enchom enkilikuanishore Olaitoriani te nkaraki nanu, o te nkaraki lelo ootelekutua te Israel, o te Yuda, tialo kulo rorei lena buku nanotoki. Amu eikitok engoro napi o Laitoriani natubukokoki shumata iyiook, te nkaraki apa neitu eibung loo papa irorei lo Laitoriani, neas te risioroto e kuna pooki naaigeroki tena buku.”

²²Nelo Hilkia o lelo pooki ooirriwayie olaiguanani enetii enkoiboni naji Hilda. Naa enkitok apa e Shalum olayioni le Takat, olayioni le Hasra, ilo aing'urani lo sanduku. (Naa Yerusalem apa namanya ninye) neirorie ninche ninye aaikilikuanishore.

²³Nejoki ninye ninche, “Nji ejo Olaitoriani, Enkai e Israel, ‘Tiaaki ilo tung'ani likirriua enatii nanu,

²⁴Nji ejo Olaitoriani, ng'ura kayau nanu entorroni shumata ene wueji, o shumata lelo oomanya o lelo deketa pooki ooigero teina buku naisumakaki olaiguanani le Yuda.

²⁵Ore te nkarakinaatanyaita ninche nanu, netapejokitio enkorropil kulie aitin, pee aatum ninche aaitagoro nanu te siaai oo nkaik enye, kebukokini naa engoro ai napi shumata ene wueji nemeibooroyu ina goro ai.

²⁶Kake ore tialo ilo aiguanani le Yuda oirriwua intae pee ipuonunu aaikilikuanishore Olaitoriani, nji enchom entiaaki ninye, Nji ejo Olaitoriani Enkai oo Siraeli: Ore tialo lelo rorei litoning'o,

²⁷te nkaraki nairridua oltau lino nintoborro kewan te dukuya Enkai, ina kata pee ining irorei lenyena ooipirta ene wueji o lelo oomanya, nintoborro iyie kewan tialo nanu, nitopolosa iyie nkilani inono ninchir te dukuya nanu, aatoning'o sii nanu iyie, Olaitoriani ojo.

²⁸Ng'ura kaaiturrurroki nanu iyie loo papaai lino, nikipiki iyie engumoto te seriani, nemedol nkonyek inono ina torroni nayau nanu shumata ene wueji, o lelo oomanya.’ ” Neyaki ninche olaiguanani olkilikuai.

²⁹Neitoki olaiguanani airriwaa ilkiliku neiturrur ilpayiani pooki le Yuda o le Yerusalem.

³⁰Neilep olaiguanani alo enkaji o Laitoriani, tenebo iltung'ana pooki le Yuda o lelo oomanya Yerusalem, o lapolosak o Lawi, o ltung'ana pooki kituaak o looti. Neisum ninye ening'ito pooki irorei pooki leina buku osotua apa nanotoki tiatua enkaji o Laitoriani.

³¹Neitashe olaiguanani te wueji enye neitobir olning'o, te dukuya Olaitoriani pee elo ninye asuj Olaitoriani o nkitanapat enyena o shakenisho enye, o nkiguanat enyena, to ltau lenye pooki o te nkishui enye pooki. Pee eas lelo rorei lo lning'o ooigero teina buku.

³²Neisho ninye lelo pooki apa ootii Yerusalem o Benchamen meitasho aaibung ina. Ore lelo oomanya Yerusalem neas te risioroto osotua le Nkai ina Ai oo loo menye.

³³Neiwuang'ie Yosia ilo minong pooki otii enkop oo Siraeli, neisho lelo pooki ootii atua Israel meisiaayia Olaitoriani Enkai enye. Ore too nkolong'i enyena pooki neitu ninche eibelekenya te sujata o Laitoriani Enkai oo loo menye.