Read Maasai Bible – Biblia Sinyati 2 Intepen 6 Bible Online

2 Intepen 6 - Maasai Bible – Biblia Sinyati bible

2 Intepen 6

¹Neitoki Solomon ajo, “Etejo Olaitoriani kebik ninye te misimisi nagut.

²Aateshetaka nanu iyie enkaji e shumata, ewueji ino nibikie intarasi.”

³Neitoki olaiguanani aibelekenya nemayian ina umata oo Siraeli, eitashe ina umata pooki oo Siraeli.

⁴Nejo ninye, “Meisisi Olaitoriani Enkai e Israel, amu eitabayie ninye te nkaina enye ina apa naisiligie te nkutuk enye Daudi papaai lai, ejo,

⁵‘Ore ebaiki ina olong nayawua nanu iltung'ana laainei aitupuku te nkop e Misiri, eitu nanu agelu enkanasa tiatua Israel pooki, naa ninye eshetieki enkaji, pee etum enkarna ai ataa ine etii. Neitu nanu agelu oltung'ani aitaa kitok te shumata iltung'ana laainei loo Siraeli.

⁶Kake ategelua nanu Yerusalem pee eaku ine wueji aaseremieki, nategelua nanu Daudi pee eitasheiki iltung'ana laainei le Israel.’

⁷Eeta apa Daudi papaai lai to ltau lenye pee eshet enkaji te nkaraki enkarna o Laitoriani, Enkai e Israel.

⁸Kake etiaaka Olaitoriani Daudi papaai lai, ‘Ore hoo niata to ltau lino pee ishet enkaji te nkaraki enkarna ai, intobira amu iata ina to ltau lino;

⁹ore ake eyia, milo iyie ashet ina aji, kake olayioni lino likiikini iyie, ninye olo ashet enkaji te nkaraki enkarna ai.’

¹⁰Eitabayie taata Olaitoriani ina kisiligata enye apa naisiligishore; amu aitasho nanu te rishata e Daudi, papaai lai, naton to lorika le nkitoo, le Israel, anaa apa enaisiligishore Olaitoriani, atesheta nanu enkaji te nkaraki enkarna o Laitoriani, Enkai e Israel.

¹¹Natipika ine osanduku laa ninye etii ilo sotua lo Laitoriani oitobira ninye tenebo iltung'ana loo Siraeli.”

¹²Neitashe Solomon te dukuya ilo perere lo lasar lo Laitoriani te dukuya ina umata pooki neilepie inkaik enyena aitorioo.

¹³Eitobira apa Solomon ewueji o suyai neika intemeta are e nkaina enkadoro o endapasho, naa entemet nabo enkadoro nailep, nepik apa ine wueji olgoriet. Neitashe te nchumata. Neitoki agil kung te nchumata ine te dukuya ina umata pooki oo Siraeli neitorioo inkaik enyena aing'orie shumata,

¹⁴nejo, “Olaitoriani Enkai e Israel, meetae Enkai natiu anaa iyie, te keper o te nkop, naibung osotua neitodolu enyorrata nauno too sinkan lenyena oopuo te dukuya iyie too ltauja lenye pooki.

¹⁵Mbung'a iyie tialo osinka lino Daudi, papaai lai ina apa nimbalakinye ninye; ee iroro iyie te nkutuk ino, nintabayie te nkaina ino nena ena olong.

¹⁶Ore naa taata, Olaitoriani Enkai e Israel, mbung'a to sinka lino Daudi, papaai lai, ina apa nisiligie ninye, ijo: Mikiany ae kata oltung'ani kisiaai iyie te dukuya nanu, pee etonie olorika le nkitoo le Israel, oi duoo tenaa kejurru ilayiok linono inkoitoi enye nepuo too nkitanapat aainei anaa enishomie iyie te dukuya nanu.”

¹⁷Ore naa taata Olaitoriani, Enkai e Israel, inchoo eunoyu ilo rorei lino, apa lirorie osinka lino Daudi.

¹⁸“Kake amaa, kesipa kebik Enkai tenebo iltung'ana te nkop? Ng'ura, ore keper o keper nalakua nemikiishaa iyie; kebaa naa mikiishaa iyie ena aji natesheta nanu!

¹⁹Toning'o naa enkomono o sinka lino o esayiata enye, Olaitoriani Enkai ai. Toning'o enkishirata o enkomono nayau osinka lino dukuya iyie;

²⁰pee etum inkonyek inono aaing'ura ena aji dama o kewarie, ene wueji apa nisiligishore pee ipik enkarna ino, pee itum atoning'o enkomono naomon osinka lino tene wueji.

²¹Toning'o iyie eomonokinoto o sinka lino o enoo ltung'ana linono le Israel, te neomon eing'or ene wueji, ee toning'o iyie itii emanyisho ino te keper, naa te nining nipaliki.

²²“Teneas oltung'ani eng'oki tialo ole latia enye, neinosieki ninye olmumai te dukuya ele perere lo lasar tena aji,

²³toning'o naa iyie itii keper, nias, ninguanare isinkan linono, aitalaku entorroni ayau entorroni enye shumata endukuya enye makewan, nimbalunye ilo supat alaaki ninye te risioroto e supatisho enye.

²⁴“Tenemiri iltung'ana linono loo Siraeli te dukuya ilmang'ati, te nkaraki nataasa ninche eng'oki te iyie, tenelo neibelekenya ninche aaibalie enkarna ino, neomon, nesaisho tiatua ena aji,

²⁵toning'o ake iyie itii keper, nipalaki eng'oki oo ltung'ana linono loo Siraeli, nirrinyu ninche menyaaki aapuonu ina kop apa ninchoo ninche o loo menye.

²⁶“Teneikeno keper, nelai enchan te nkaraki nataasa ninche eng'oki tialo iyie, teneomon ninche eing'or ene wueji, neibalie enkarna ino, neibelekenya aaing'uaa ing'ok enye, itoosho iyie ninche,

²⁷toning'o naa iyie itii keper, nipaliki eng'oki oo sinkan linono, iltung'ana linono loo Siraeli, niutaki ninche enkoitoi sidai naa ninye epuoyie; nirriwaki enchan ena kop ino, naa ninye inchoo iltung'ana linono metaa enjung'ore.

²⁸“Tenelotu olameyu enkop anaa olmeitai, anaa erruoyo indaiki naatii nkurman, anaa tenelotu olmaati, anaa enkurto; teneng'adu ilmang'ati lenye ninche te nabo ake ninye oo nkanas enye; o pooki meitai anaa pooki muoyian;

²⁹ore ake enkomono pooki o esayiata naomon oltung'ani obo anaa iltung'ana pooki loo Siraeli, eyiolo ake oltung'ani eoshoto enye o sina lenye, neitorioo inkaik aaing'orie ena aji;

³⁰toning'o naa iyie te keper, teina manyisho ino, nipaliki, ore ake pooki tau liyiolo iyie nilaaki te risioroto oo nkoitoi enyena (Amu iyie ake openy oyiolo iltauja loo nkera e tung'ana);

³¹pee kitum ninche aatureita iyie, nepuo too nkoitoi inono, inkolong'i pooki naaishu teinakop apa ninchoo iloo menye.

³²“Naa tenelotu oltung'ani loo loreren, ilo leme oloo ltung'ana linono loo Siraeli eing'uaa enelakua te nkaraki enkarna ino kitok, o enkarna ino magilani, tenelotu ninye aomon eing'or ena aji,

³³toning'o iyie itii keper, ina manyisho ino, nias te risioroto e nena pooki nikimpotie ilo tung'ani loo loreren iyie; pee etum iloreren pooki le nkop aatayiolo enkarna ino, nikiureyu iyie, anaa enaasita iltung'ana linono loo Siraeli, netum aatayiolo inchere ore ena aji natesheta nanu te nkarna ino naa enkarna ino eipotieki.

³⁴“Tenepuo iltung'ana linono olarrabal aagilunore ilmang'ati lenye, ore te pooki oitoi niimie iyie ninche; nikiomon ninche iyie eing'or ena anasa nitegelua, iyie o ena aji natesheta nanu te nkarna ino,

³⁵toning'o iyie itii keper enkomono enye o esayiata enye, nintagol ninche.

³⁶“Teneas ninche eng'oki te dukuya iyie, amu meetae oltung'ani lemeas ing'ok, nigorokino iyie ninche, ninchooyo ninche aisho lmang'ati lenye nenapi ninche aaya eyararoto enkop nalakua o enataana;

³⁷kake tenedamu ninche too ltauja teinakop apa nawaki ninche, neirridu, nikisai ninche iyie teinakop e yararoto enye, ejo, ‘Kitaasa iyiook eng'oki, nikitaasa intorrok;’

³⁸teneirridu ninche too ndamunot enye pooki o too ltauja lenye pooki teinakop e yararoto enye, apa nawaki ninche, neomon eing'or ina kop enye apa ninchoo iyie iloo menye, o ina anasa nitegelua iyie, o ina aji natesheta nanu te nkaraki enkarna ino,

³⁹toning'o iyie itii keper ina manyisho ino, enkomono enye o esayiata enye. Intagolo ninche, nipalaki lelo tung'ana linono ootaasa eng'oki te iyie.

⁴⁰Ore naa taata Enkai ai nchoo eing'or inkonyek inono nening inkiyiaa inono enkomono ene wueji.

⁴¹“Naa tudumunye taata, Olaitoriani Enkai, shomo ewueji ino enkiyeng'iyeng, iyie oilo sanduku lino le magilanisho. Inchoo ilapolosak linono Olaitoriani Enkai meishopokini enjeunoto ino. Inchoo isinyat linono eshipakino esupatisho ino.

⁴²Olaitoriani Enkai, mimbelekeny enkomom ino aitung'uaa ilo lino otubukokoki eilata aaput! Tadamu enyorrata ino nauno te nkaraki Daudi osinka lino.”