Read Maasai Bible – Biblia Sinyati 2 Intepen 8 Bible Online

2 Intepen 8 - Maasai Bible – Biblia Sinyati bible

2 Intepen 8

¹Ore te siadi ilarin tikitam laa ninche eteshetie Solomon enkaji o Laitoriani o enkaji enye makewan

²neitoki Solomon ashet nena anas apa naaishoo Huram ninye, nepik iltung'ana loo Siraeli ine.

³Neitoki Solomon alo Hamatsoba, neisulie ninye.

⁴Neshet ninye Tadamor ti ong'ata o nkanas pooki naashumishoreki apa naatesheta ninye te Hamat.

⁵Neitoki sii ashet Bet-horon e shumata o Bet-horon e abori, inkanas naasheta isunta, o nchomito, naatii isekenke.

⁶Neshet sii Baalat o nkanas naasheta too soito apa naara ine Solomon, o nkanas pooki oo ngarrin enyena oo mbartan, o nkanas oo lakedok lenyena loo mbartan, o pooki toki nayieu Solomon neshetu te Yerusalem, o te Lebanon, o teinakop pooki enkitoria enye.

⁷Ore lelo tung'ana pooki ootelekutua too Lhiti o Lamori o Lperisi, o Lhifi, o Lyebusi, lelo leme iloo Siraeli,

⁸ebaiki iishoritin enye, apa ootelekutua teinakop leitu eidaikie iltung'ana loo Siraeli - neitaa Solomon lelo ilenkisiaayiare nagol, naa neijia etiu o taata.

⁹Kake ore tialo iltung'ana loo Siraeli, eitu eitaa Solomom irrindiki le siaai enye. Isikarini apa ninche, o ltung'ana le nkitoo, o lkituaak le njore loo ngarrin oo mbartan, o lakedok loo mbartan.

¹⁰Naa kulo apa iltung'ana kituaak le Solomon, iip are o onom, laa ninche oata enkitoria tiatua olorere.

¹¹Neyau Solomon entito e Farao aitung'uaa enkanasa e Daudi neriku ina aji apa nateshetaka ninye. Amu etejo ninye, “Meton enkitok ai te nkaji e Daudi olaiguanani loo Siraeli. Amu ore iwuejitin neeyauaki osanduku lo Laitoriani naa kesinya.”

¹²Neitaiki Solomon Olaitoriani olasar opejori te nchumata ilo perere lo lasar lo Laitoriani apa otesheta ninye te mbata e nkaji e Nkai.

¹³Ore anaa enayieuni te nkisiaayiare e pooki olong'i, neitayuni ilasarri terisioroto enkitanapata e Musa too Sabatoni, o too lapaitin ng'ejuko okuni to lari o sirua loo mukateni neitu eisuishieki, o sirua loo wikii, o sirua loo lng'oborri.

¹⁴Ore te risioroto e nkikoo e Daudi papaai lenye, etegelua ninye ilturrurri loo lapolosak te nkaraki enkisiaayiare enye, o Lawi te nkaraki isiaaitin enye e nkisisa o enkisiaayiare te dukuya ilapolosak metaasa esiaai te pooki olong nayieuni; o ilarripok loo nchomito loo lturrurri lenye too nchomito esiana naje; amu ina apa eitanapishe Daudi osinka le Nkai.

¹⁵Neitu ninche eibelekenya apaash ina naitanapa olaiguanani ilapolosak o Lawi tialo pooki bae o too lchumat.

¹⁶Neaku eidipe apa esiaai pooki e Solomon ebaiki ina olong apa napiki olkitamanyunoto le nkaji o Laitoriani o meidipayu ina aji o Laitoriani.

¹⁷Neitoki Solomon alo Esiong'eber o Elot te mbata e naiposha, te nkop e Edom.

¹⁸Neirriwaki Huram ninye too sinkan lenyena imelin o sinkan ootamoo enaiposha, nepuo ninche Ofir tenebo isinkan le Solomon. Neyau teine intalantani iip ong'uan o onom e saabu nayaki olaiguanani Solomon.