Read Maasai Bible – Biblia Sinyati 2 Intepen 9 Bible Online

2 Intepen 9 - Maasai Bible – Biblia Sinyati bible

2 Intepen 9

¹Ore ake pee ening'oo enkaiguanani e Sheba olning'o le Solomon, nelotu Yerusalem atem ninye too nkikilikuanat naagol. Nelotu ninye eeta ilaisiaayiak kumok o ntamesin naanapita isonkoyoni, o saabu sapuk oleng, o soito oogol enkinyang'a. Ore ake pee elotu enetii Solomon, neliki ninye nena pooki apa naatii oltau lenye.

²Newal Solomon inkikilikuanat enyena pooki. Meetae entoki hoo nabo nagol to laiguanani Solomon neitu atawaliki ninye.

³Ore ake pee edol ina aiguanani e sheba eng'eno e Solomon, o ina aji natesheta ninye;

⁴o endaa natii emisa enye o ltonei loo lkituaak lenyena, o enkisiaayiare oo sinkan lenyena, o nkilani enye, o lanapak loo nkikompeni enye o nkilani enye, o lasarri lenyena oopejori ooitayio ninye te nkaji o Laitoriani, eitu eitoki ninye aidim atejo ae.

⁵Nejoki ninye olaiguanani, “Ekesipa olkilikuai apa latoning'o nanu te nkop ai makewan tialo mbaa inono o eng'eno ino.

⁶Kake eitu apa nanu anyorraa ilo kilikuai ometaba anaa nalotu adol too nkonyek aainei makewan, naa eitu apa nanu aalikini olpisiai le ng'eno ino. Ilus iyie teilo kilikuai apa latoning'o nanu.

⁷Emunyak siaake inkituaak inono o sinkan linono ooitashe te dukuya iyie anaake nening eng'eno ino!

⁸Meisisi Olaitoriani Enkai ino amu kitishipakine ninye iyie nikipik iyie olorika lenye le nkitoo pee iaku olaiguanani te rishata o Laitoriani Enkai ino! Ore amu kenyor Olaitoriani Enkai ino Israel naa keitasheyie ninche intarasi, kintaa ninye iyie olaiguanani lenye, pee itum aiguanayu te sipata o te supatisho.”

⁹Neitoki enkaiguanani e Sheba ninye aisho olaiguanani shekeli iip o tikitam e saabu o sonkoyoni kumok o soito oogol enkinyang'a.

¹⁰Ore lelo sinkan le Huram o sinkan le Solomon apa ooyautua saabu naing'uaa Ofir neyau sii ilkeek ooji ilmusantali o soito oogol enkinyang'a.

¹¹Neitayunye Solomon lelo keek olkedet ojing'ieki enkaji o Laitoriani o enkaji o laiguanani, o lwululi loo usin o nkinantani oo usin, te nkaraki lelo aranyak. Eitu aikata edoli embae naaijo ena te nkop e Yuda.

¹²Neisho Solomon enkaiguanani e Sheba nena pooki naayieu ninye, pooki toki ake ninye natoomonuo metii ntokitin naayaka ninye olaiguanani. Nerrinyo ninye alo enkop enye tenebo ilaisiaayiak lenyena.

¹³Ore apa enkiroishi e saabu nayawuaki enetii olaiguanani Solomon naa intalantani iip ile o ntomoni ile o ile.

¹⁴Ore nena naayautua ilainyang'ak o lamirak, eyautua sii ilaiguanak pooki le Arabia o lbalusuni leina kop saabu o enkosholai aayaki Solomon.

¹⁵Neitobir olaiguanani ilong'oi iip are sapuki e saabu naaidong'oki, ore ake elong'o nabo naa shekeli iip ile e saabu naidong'oki.

¹⁶Neitoki aitobir ilong'oi iip uni e saabu naaidong'oki; naa shekeli iip uni e saabu naidong'oki ake elong'o nabo. Nepik olaiguanani nena long'oi atua ina aji o Sero le Lebanon.

¹⁷Neitobir sii olaiguanani olorika le nkitoo kitok loo lala loo ltomia, nemur te saabu nasila.

¹⁸Neeta ilo orika le nkitoo ilkedeta ile o ewueji neiteleikini oo nkejek e saabu, neitatashakini ilo orika le nkitoo, ore ake enkalo nabo eilo orika le nkitoo netii ineeiteleikini Inkaik o lng'atunyo oaare ooitashe too mbat nena wuejitin neeiteleikini inkaik.

¹⁹Neitashe ake ilng'atunyo tomon oaare teine, neitashe ake obo te nchoto e bayie e pooki kedet e lelo kedeta pokira ile, eitu aekata edoli entoki naaijo ina te pooki kitoria.

²⁰Ore intokitin pooki naaokishoreki o laiguanani Solomon naa ine saabu, ore imasaa pooki eina aji entim e Lebanon naa ine saabu nasila. Meikenari apa enkosholai aajo toki too nkolong'i e Solomon.

²¹Amu kepuo apa imelin o laiguanani Tarshishi tenebo isinkan le Huram kata nabo te rishata oo larin okuni, ore nena melin e Tarshishi naa kepuonu apa enapita saabu o enkosholai o lala loo ltomia o yekenyi o motonyi sidain naaijo ilukunkuni.

²²Neisulu Solomon ilaiguanak pooki le nkop te karsisisho o te ng'eno.

²³Neing'oru ilaiguanak pooki le nkop enetii Solomon ejo pee ening eng'eno enye natipika Enkai atua endamunoto enye.

²⁴Neyau ake pooki lenye enkishooroto, intokitin e nkosholai o ne saabu o lkilani o emanoo o sonkoyoni, o mbartan o nyumpui te pooki ari.

²⁵Neeta apa Solomon ilaleta inkalifuni ong'uan loo mbartan, o ngarrin oo mbartan, o lakedok loo mbartan inkalifuni tomon o are, ootamanya nena anas oo ngarrin oo mbartan tenebo olaiguanani te Yerusalem.

²⁶Neitore ninye ilaiguanak pooki ebaiki olkeju le Frati, ometabaiki enkop oo Filistia o metabaiki olpolosie le Misiri.

²⁷Neitotiu olaiguanani saabu te Yerusalem anaa isoito, nebayu iltarakua te nkumoi anaa ilng'abolo le Shefela.

²⁸Neyakini Solomon imbartan naaing'uaa Misiri neing'uaa inkuapi pooki.

²⁹Ore apa nkulie kiaasin e Solomon ebaiki enkiterunoto o metabaiki enkiting'oto neigeroki tiatua embuku oo nkaatini e Natan ilo oiboni le Nkai o tiatua e naibon e Ahija le Shilon, o too nduaat e Ido ilo aduaani, eipirta Yeroboam olayioni le Nebat.

³⁰Eitoreishe apa Solomon te Yerusalem neitore Israel pooki ilarin artam.

³¹Neirrura Solomon etua anaa loo menye. Nenukari te nkanasa e Daudi papaai lenye. Neitoreisho Rehoboam olayioni lenye te rishata enye.