Read Maasai Bible – Biblia Sinyati Esra 5 Bible Online

Esra 5 - Maasai Bible – Biblia Sinyati bible

Esra 5

¹Ore apa iloibonok le Nkai, Hagai o Sakaria olayioni le Ido, neibonoki Ilyahudi ootii Yuda o Yerusalem, te nkarna e Nkai e Israel natii shumata ninche.

²Neitoki Serubabel olayioni le Shealtiel o Yeshua olayioni le Yehosadak aadumunye neiteru aashet enkaji e Nkai natii Yerusalem; ore tenebo ninche netii iloibonok le Nkai, eretito ninche.

³Ore teina kata ake nelotu Tatenai, ilo balusui lo lkerenket otii teidia alo olkejule Frati o Shetar-bosenai tenebo lelo le ncholuek enye neirorie aajoki nji, “Kaing'ae oishoo ntae enkitanapata nishetietie ena aji nindipidipi olchetiei lenye?”

⁴Enyaakita sii aaikilikuan ninche ena, “Kakua nkarn e kulo tung'ana ooshetita ena aji?”

⁵Kake etii apa enkong'u e Nkai enye shumata lelo payiani loo Lyahudi, neitu ninche eibooyo ninche ometabaiki ilo omoni Dario nerrinyuni ewalata naipirta ina te palai.

⁶Ore entashati eina palai nairriwakita Tatenai, ilo balusui lo lpolosie otii teidia alo olkeju o Shotar-bosnai o lelo le ncholuek enye, lelo balusuni apa ootii olkerenket otii lido kekun olkeju, o Dario olaiguanani;

⁷neirriwaki ninche ninye olomoni, oigerore kuna baa: Enetii Dario olaiguanani, eseriani te pooki.

⁸Nchoo metayiolouni to laiguanani nchere kishomo iyiook olkerenket le Yuda, enkaji e Nkai kitok. Eshetitae ninye too soito sapuki, netipikaki isunta enyena imbaoi, eloito ena siaai dukuya aponari easita to nkaik enye.

⁹Nikintoki iyiook aaikilikuan lelo payiani nikirorie ninche aajoki nji, Kaing'ae oishoo intae enkitanapata pee ishetishete ena aji, nindipidipi olchetiei lenye?

¹⁰Kinyaakita sii aaikilikuan ninche inkarn enye, pee itum atayiolo, nikitum aaigero inkarn e lelo tung'ana too lukuny enye.

¹¹Naa ena apa ninche etawalikitia iyiook, Kira iyiook isinkan le Nkai e keper o enkop, naa eikingil iyiook aashet ena aji apa nateshetaki too larin kumok ootulusoitie, apa natesheta olaiguanani le Israel kitok neidip.

¹²Kake ore te nkaraki apa naitagoro loo papa Enkai e keper, neishooyo ninye ninche apik enkaina e Nebukadnesa olaiguanani le Babilon, o Lkaldayo, laa ninche apa ooidaikie ena aji neya iltung'ana Babilon.

¹³Ore ake eyia neijia, to lari le dukuya le nkitoria e Sairas olaiguanani le Babilon, neitayu Sairas ilo aiguanani enkitanapata, nchere pee eitokini aashet ena aji e Nkai.

¹⁴Ore nena masaa e saabu o ne nkosholai e nkaji e Nkai, apa naaitayio Nebukadnesa teina aji e Nkai natii Yerusalem, neyau ina aji e nkai e Babilon, eyaua Sairas olaiguanani kuna aitupuku te nkaji e nkai e Babilon nepiki enkaina e obo oji enkarna Sheshbasa, laa ninye apa eitaa olgafanai;

¹⁵nejoki olaiguanani ninye, Iwa kuna masaa, shomo tipika ninche atua enkaji e Nkai natii Yerusalem, naa nchoo enkaji e Nkai eitokini aashet te wueji enye.

¹⁶Neitoki alotu ilo oji Sheshbasa neshet olkitamanyunoto le nkaji e Nkai natii Yerusalem; ore ebaiki ina kata o taata eshetitae ina aji, neitu eidipayu.

¹⁷Ore te nkaraki ina te nelioo aa sidai to laiguanani, nchoo ejurruni to lchumati loo mbaa musan o laiguanani te idie te Babilon, pee edoli tenaa keitayio apa Sairas olaiguanani enkitanapata nashetieki ina aji e Nkai natii Yerusalem. Naa nchoo olaiguanani eirriwaki iyiook enaitiship ninye tialo ena bae.