Read Maasai Bible – Biblia Sinyati Esra 6 Bible Online

Esra 6 - Maasai Bible – Biblia Sinyati bible

Esra 6

¹Neitoki Dario olaiguanani aitayu enkitanapata, nejurruni te Babilon, te nkaji nashumieki mbaa musan, teine apa neshumieki mbaa naaigeroki.

²Ore te Ekbatana, teina anasa kitok natii olkerenket le Midia, netumi teine olpiyayati oigerore ena: Embae nadamuni.

³Ore to lari le dukuya le nkitoria e Sairas olaiguanani, neitayu Sairas olaiguanani enkitanapata: Naipirta enkaji e Nkai te Yerusalem, nejo, nchoo metesheti ina aji, ine wueji apa neishoorieki ilasarri, neyauni ilasarri oopejori; ore enkadoro enye naa keaku ntemat e nkaina ntomoni ile ore endapasho naa ntemat e nkaina ntomoni ile,

⁴neeta nkererin uni oo soito sapuki, o enkereri nabo oo mbaoi; nchoo elaata e nchetata enye meitayuni to lchumati lo laiguanani.

⁵Ore sii nchoo inapa masaa e saabu o ne nkosholai e nkaji e Nkai naawa Nebukadnesa te nkaji e Nkai natii Yerusalem, neya Babilon, errinyuni aayau atua ina aji e Nkai natii Yerusalem, neyauni ake pooki nabo ewueji enye, nipik ninche atua enkaji e Nkai.

⁶Neirriwaa Dario ena walata; nejo, Ore taata Tetanai, olgafanai lo lkerenket otii teidia alo olkeju o Shetar-bosenai o lelo le ncholuek ino, lelo balusuni ootii olkerenket otii teidia alo olkeju, entalamari;

⁷entalam esiaai ena aji e Nkai; enchoo olgafanai loo lyahudi o lpayiani loo Lyahudi eitoki aashet ena aji e Nkai te wueji enye.

⁸Ore ake sii aitayio nanu enkitanapata naipirta enintaasiasa kulo payiani loo Lyahudi te nchetata ena aji e Nkai; kelaakini kulo tung'ana te nkiputakinoto to lchumati le nkitoo nemeimutieki te kodi naing'uaa olkerenket otii teidia alo olkeju.

⁹Ore entoki pooki nayieuni - ilooti oing'ok, olmeregeshi, anaa nkerra te nkaraki ilasarri oopejokini Enkai e keper o enkano o emunyan o enaisho oo sabibu, anaa eilata, anaa enayieu ilapolosak te Yerusalem, nchoo ninche ina anaake, nemepali,

¹⁰pee etum ninche aaishooi ilasarri ooitishipisho te Nkai e keper, neomonoki enkishui o laiguanani o layiok lenyena.

¹¹Aitayio sii enkitanapata nchere teneibelekeny ake oltung'ani ena limunoto, neiwuang'ieki imbokishi te nkaji enye, nesheyieki ninye, neaku enkaji enye olkiu le modiei.

¹²Ore e Nkai apa naitamanya enkarna enye ine wueji, metusulai pooki aiguanani o ltung'ana ooitorioo inkaik enye aaibelekeny ena, anaa einyal ena aji e Nkai natii Yerusalem. Nanu Dario oitayio ena kitanapata nchoo metaasi neibung'i aakurraki.

¹³Ore te risioroto eilo rorei oirriwayie olaiguanani Sairas, neas Tatenai ilo balusui lo lkerenket otii teidia alo olkeju o Shetar-bosenai o lelo le ncholuek enye, nena pooki naaitanapishe olaiguanani Dario.

¹⁴Ore ilpayiani loo Lyahudi neshetisho nebul, teina aibon apa e Hagai oloiboni le Nkai o Sakaria olayioni le Ido. Eidipa ninche ina aji enye te nkitanapata e Nkai oo Siraeli o te nkitanapata e Sairas o Dario o Artaseses olaiguanani le Parsia;

¹⁵neidipe apa ena aji te nkolong e uni o lapa le Adar[2], to lari le ile le nkitoria o laiguanani Dario.

¹⁶Ore iltung'ana loo Siraeli, ilapolosak o Lawi, o lelo kulikae apa ootorrinyunye te yararoto, neraposhoki enkitisinyata eina aji e Nkai te nchipai.

¹⁷Neishooyo ninche teina kitisinyata ena aji e Nkai iloing'ok iip nabo olmeregeshi iip are olkuoo le kerra iip ong'uan, neitayu anaa olasar le ng'oki too Siraeli pooki ilkineji tomon oaare, terisioroto e siana oo loshon loo Siraeli.

¹⁸Nepik ninche ilapolosak ilturrurri lenye nepik Ilawi irishat enye e siaai, te nkaraki enkisiaayiare e Nkai te Yerusalem anaa enaigeroki too nkitanapat e Musa.

¹⁹Ore te nkolong e tomon oong'uan o lapa le dukuya, neibung lelo apa ootorrinyunye te yararoto Pasaka.

²⁰Amu eitisinya apa ilapolosak o Lawi ate tenebo; etaa apa pooki ilemeiduruk. Neaku eteyiang'a ninche olkuoo lenye le Pasaka te nkaraki lelo pooki ootorrinyunye te yararoto, te nkaraki lelo apolosak alashera lenye, o te nkaraki ninche maate,

²¹einosa apa ina Pasaka iltung'ana loo Siraeli ootorrinyunye te yararoto, o pooki ng'ae oibung'are ninche, neitalam kewan olduruk loo ltung'ana leina kop, neserem Olaitoriani, Enkai e Israel.

²²Neibung ninche osirua loo mukateni neitu eisuishieki nkolong'i naapishana te nchipai; amu eitishipa ninche Olaitoriani, neibelekenya oltau lo laiguanani le Asiria aibelekenyakino ninche, ometaa etareto ninye ninche te siaai e nkaji e Nkai, Enkai e Israel.