Read Maasai Bible – Biblia Sinyati Esra 8 Bible Online

Esra 8 - Maasai Bible – Biblia Sinyati bible

Esra 8

¹Kuna apa ilukuny oo nkajijik oo loomenye, naa kuna inkarn oo ishoritin e lelo apa ooshomo tenebo nanu eing'uaa Babilon, te nkitoria o laiguanani Artaseses.

²Ore too layiok le Finehas naa Gershom. Ore too layiok le Itamar, naa Daniel, ore too layiok le Daudi naa Hatush,

³ore too layiok le Shekania, o too layiok le Parosh, naa Sekaria, laa te ninye eigeroki ilewa iip o onom.

⁴Ore too layiok le Pahat Moab, naa Elieho-enai olayioni le Serahia, ore tenebo ninye netii ilewa iip are o onom.

⁵Ore too layiok le Satu, naa Shekania olayioni le Yehasiel, ore tenebo ninye netii ilewa iip uni.

⁶Ore too layiok le Adin, naa Ebed olayioni le Yonatan, ore tenebo ninye netii ilewa onom.

⁷Ore too layiok le Elam, naa Yeshaia olayioni le Atalia, ore tenebo ninye netii ilewa ntomoni naapishana.

⁸Ore too layiok le Shefatia, o Sebadia olayioni le Mikael, netii tenebo ninye Ilewa ntomoni isiet.

⁹Ore too layiok le Yoab o Obadia olayioni le Yehiel, netii tenebo ninye ilewa iip are o tomon oisiet.

¹⁰Ore too layiok le Bani, o Shelomit olayioni le Yosifia, netii tenebo ninye ilewa iip o ntomoni ile.

¹¹Ore too layiok le Bebai, Sekaria olayioni le Bebai, netii tenebo ninye ilewa tikitam o isiet.

¹²Ore too layiok le Asgat, Yohanan olayioni le Hakatan, netii tenebo ninye ilewa iip o tomon.

¹³Ore too layiok le Adonikam, lelo apa ooetuo te siadi, ore nkarn enye naa Elifalet, Yeuel o Shemaia, netii tenebo ninche ilewa ntomoni ile.

¹⁴Ore too layiok le Bigfai, Utai o Sakur, netii tenebo ninche ilewa ntomoni naapishana.

¹⁵Aiturrurro apa nanu ninche te mbata olkeju orukokino Ahafa, ore teine nikibik too lng'oborri nkolong'i uni. Najo nanu ajur iltung'ana o lapolosak, nadol nchere metii Ilawi.

¹⁶Nairriwaa nanu olkilikuai meipoti Eliesa o Ariel o Shemaia o Elinatan o Yarib o Elnatan, o Natan o Sekaria o Meshulam, lelo arikok, neipotuni sii Yoiarib o Elnatan, laa iltung'ana apa ooata eng'eno nagut neiriwarri ninche meshomo enetii Ido,

¹⁷ilo arikoni te wueji neji Kasifia, neliki ninche enapuo aajoki Ido o lalashera lenyena lelo sinkan le nkaji e Nkai, te wueji neji Kasifia, aa taa, pee eirriwakini iyiook ilaisiaayiak te nkaraki e nkaji e Nkai.

¹⁸Ore te nkaraki enkaina supat e Nkai ang, natii te shumata iyiook eyakita ninche iyiook oltung'ani oata enkidimata, too layiok le Mahali, olayioni le Lawi, olayioni le Israel, oji enkarna enye Sherabia, ore tenebo ilayiok lenyena o ltung'ana lo lgilata lenye naa tomon oisiet,

¹⁹tenebo sii Hashabia, ore tenebo ninye netii Yashabia, too layiok le Merari, ore ninche tenebo iltung'ana lo lgilata lenye o layiok lenye naa tikitam.

²⁰Ore tenebo lelo aisiaayiak le nkaji e Nkai iip are o tikitam, apa ooiteng'ela Daudi, pee etum aaisiaayia Ilawi, neipotoki kulo pooki too nkarn.

²¹Naitoki nanu aibalunye eenata e mpukoroto to lkeju le Ahafa, pee kitum iyiook aitoborro ate te dukuya Enkai ang, pee king'oru te ninye enkoitoi naitoriori te nkaraki iyiook maate o nkera ang o masaa ang pooki.

²²Amu atoduaa apa nanu enkurruna tenaomon olaiguanani meishoo iyiook ilkuti sikarini o lakedok loo mbartan, pee emitu iyiook too lmang'ati te nkoitoi, amu kindipa iyiook aatiaaki olaiguanani, “Ore enkaina e Nkai ang naa pee eyaki eretoto lelo pooki ooing'oru ninye. Ore engolon e ng'oro enye napi naa pee egilunore lelo oopaashare ninye.”

²³Nikiyen iyiook ate aaitupukoo, nikisai Enkai ang tena bae, nening ninye esayiata ang.

²⁴Naiteng'el nanu ilapolosak tomon oaare te lelo apolosak kituaak: Sherabia o Hashabia o kulikae tomon loo lgilat lenye tenebo ninche.

²⁵Naineneng nanu enkiroishi e nkosholai o saabu o masaa o nena kishoorot te nkaraki enkaji e Nkai ang apa naaishorua olaiguanani, o lautarok lenyena o lkituaak lenyena, elulung'a Israel pooki;

²⁶naineneng nanu too nkaik enye enkiroishi e shekeli iip naa ntalantani iip ile e nkosholai o masaa e nkosholai naabaya enkinyiang'a enye shekeli iip nabo o saabu ntalantani iip nabo.

²⁷O lbakulini tikitam le saabu loo nkiloi isiet enkiroishi enye o masaa are sidain o suyai naanyaanyukie te nkiroishi nena e saabu.

²⁸Najoki nanu ninche, “Irara intae sinyat to Laitoriani, naa sinyat kuna masaa, ore enkosholai o saabu naa nkishoorot o lpela naaishori Olaitoriani, Enkai oo loo papaai linyi.

²⁹Entagolie ninche, ning'oring'oro ninche ometaba anaa nimpimipimi ninche te dukuya ilapolosak kituaak o Lawi o lukuny oo nkajijik oo loo menye te Israel te Yerusalem, tiatua ilgilat le nkaji o Laitoriani.”

³⁰Metaa eibung'a ilapolosak o Lawi enkipimore e nkosholai o saabu o masaa, neyau ninche Yerusalem atua ina aji e Nkai ang.

³¹Nikintoki iyiook aadumunye to lkeju le Ahafa te nkolong e tomon oaare o lapa le dukuya, aapuo Yerusalem. Netii enkaina e Nkai ang shumata iyiook, nekordu ninye iyiook te nkaina o lmang'atinta lang o too rresheta te nkoitoi.

³²Nikibau iyiook Yerusalem nikibik teine nkolong'i uni.

³³Ore te nkolong e ong'uan tiatua enkaji e Nkai ang, neipimi enkosholai o saabu o masaa aapik inkaik e Meremot olapolosani, olayioni le Uria, netii tenebo ninye Eliesa olayioni le Finehas, netii tenebo ninche Ilawi, Yosabad olayioni le Binui.

³⁴Eikenayioki nena pooki aajo keineneng'a, ore enkiroishi e pooki toki neigeri.

³⁵Ore teina kata lelo apa ooetuo eing'uaa eyararoto, lelo yararot ootorrinyunye, neishoru ilasarri oopejori aaisho Enkai e Israel, iloing'ok tomon oaare te nkaraki Isiraeli pooki o lmeregeshi ntomoni naaudo o ile o lkuoo le kerra ntomoni naapishana, neitayuni anaa olasar le ng'oki ilkineji tomon oaare: ore kuna pooki naa ilasarri oopejokini Olaitoriani.

³⁶Eyautua sii apa empalai naishorua olaiguanani aayaki ilkituaak o lbalusuni lo lkerenket otii teidia alo olkeju; neretu ninche iltung'ana o enkaji e Nkai.