Read Maasai Bible – Biblia Sinyati Esra 9 Bible Online

Esra 9 - Maasai Bible – Biblia Sinyati bible

Esra 9

¹Ore eidipaki aataas kuna baa, nepuonu lelo kituaak enatii nejo, “Ore iltung'ana loo Siraeli o lapolosak o Lawi, neitu egelaa ate aarishu too ltung'ana le kuna kuapi oata olminong oing'uaa ile Kanaan o Lhiti o Lperisi o Ljebusi o Lamoni o Lmoabu o Lmisiri o Lamori.

²Amu ewaita ninche embata oo ntoyie enye aayamaki ate o layiok lenye, metaa etushulare ilo osho osinya iltung'ana loo loreren. Ore te nkaraki ena nemeisiligayu ninche, eituruk lelo kituaak o laiguanak eitarruoitie.”

³Ore ake pee aning ena, napolos nanu ilkilani laainei, olkila lai oodo, naputu olpapita te ndukuya ai o to lmunyei naton aiputukuny.

⁴Ore lelo pooki ooikirikirate too rorei le Nkai e Israel, te nkaraki nemeisiligayu lelo ootorrinyunye te yararoto, neiturrurro naaman nanu, ina kata aitashe aiputukuny ometabau olasar le nteipa.

⁵Ore to lasar le nteipa nadumunye nanu te enata ai e mpukoroto, aishopito lelo kilani laainei o lkila lai oodo epolosa, nagil nanu kung naitorioo nkaik aainei aitorioki Olaitoriani Enkai ai,

⁶ajo, “Oi Enkai ai, kaata enkurruna tenaashumaki nanu iyie enkomom ai, Enkai ai, amu eilepa entorroni ang shumata alang ilukuny ang, neilepa entorroni ang abaiki keper.

⁷Ore ebaiki nkolong'i oo loopapa o metabaiki ena olong kitii iyiook atua enkitarrurroto sapuk. Naa too nkitarruorrot ang, ewaki iyiook o laiguanak lang o lapolosak lang aapik inkaik oo laiguanak loo nkuapi, nepiki iyiook olalem, nepiki eyararoto, neoruni iyiook imasaa, nepiki iyiook esulare anaa enatiu ena olong.

⁸Kake ore taata te nkiti rishata, neishorua Olaitoriani Enkai ang omom, alekaki iyiook oloti pisiai, neisho iyiook ewueji e seriani, tiatua ewueji enye sinyati. Pee etum Enkai ang aitawang'a nkonyek ang neisho iyiook enkiti piunoto te rrindikisho ang.

⁹Amu kira iyiook iltung'ana le rrindikisho; ore ake eyia eitu eiturraa iyiook Enkai ang te rrindikisho ang. Kake eitabaikia iyiook enyorrata enye nauno, te dukuya le Pasia pee eisho iyiook enkiti kiyagata maitasheyie enkaji e Nkai ang, nikiram iwuejitin neeidaaitie, neisho iyiook emitunoto te Yudea o te Yerusalem.

¹⁰“Naa ore taata iyie Enkai ang, kaa iyiook kipuo aajo te siadi ena? Amu kinturraitie iyiook nkitanapat inono,

¹¹apa nintanapishe aimunye isinkan linono, iloibonok le Nkai, ijo, ‘Ore ina kop nipuopuo aajing, pee iyaya metaa eninyi, naa enkop nemesinya, naata olduruk loo loreren le kuna kuapi, tenebo ilo minong oiputa ninye, ebaiki enkiting'oto o metabaiki enkiting'oto teilo duruk lenye.

¹²Ore te nkaraki ina emincho ntoyie inyi meyama ilayiok lenye, nimiyaya sii ntoyie enye aayamaki ilayiok linyi. Niming'oruru aekata osotua o ninche o karsisisho enye eji pee igolulu, nitumutumu aainosa endaa sidai eina kop nintaa enjung'ore oo nkera inyi ntarasi.’

¹³Ore eidipa kuna pooki aatadoiki iyiook te nkaraki nkiaasin ang torrok o te nkitarruoroto ang kitok, nikidol aajo, iyie Enkai ang naitamio, aitodorropu too nkitarruorot ang, ninchoo iyiook olpisiai loo lekunot oba nji.

¹⁴Eikingil iyiook aagil nkitanapat inono nikiyama o ltung'ana oas kuna baa o lminong? Aimigorokino iyie iyiook, nimut iyiook ometaa metumi ninye olpisiai loo lekunot, nemeimisho ninye obo?

¹⁵Olaitoriani Enkai e Israel, ira iyie asipani, amu etelekuaki iyiook olpisiaai oimishe, anaa enikitiu ena olong. Ng'ura ajo kitii iyiook dukuya iyie te nkitarruorroto ang, amu meetae oloidim aitasho te dukuya iyie te nkaraki ena.”