Read Maasai Bible – Biblia Sinyati Nehemia 1 Bible Online

Nehemia 1 - Maasai Bible – Biblia Sinyati bible

Nehemia 1

¹Irorei kulo le Nehemia, olayioni le Hekalia. Ore apa to lapa oji ole Kislep[1], to lari le tikitam, atii nanu Susa ina ang kitok.

²Nelotu Hanani obo loo lalashera laainei tenebo kulikae tung'ana eing'uaa Yuda. Naikilikuan nanu ninche mbaa naaipirta lelo Yahudi ootelekutua, lelo apa ooimishote te yararoto, naikilikuan sii mbaa naapirta Yerusalem.

³Naajoki ninche nanu, “Ore lelo lekunot ootii olkerenket apa ooimishote te yararoto, neeta enyamali sapuk o enkurruna. Etuurori esuntai e Yerusalem, ore nchomito enyena netumuta enkima.”

⁴Ore ake pee aning kulo rorei naton aishir, naisinanuo inkolong'i kumok; nabik nanu apukoo naomon te dukuya Olaitoriani Enkai e keper.

⁵Najo nanu, “Olaitoriani, Enkai e keper, Enkai kitok naitureisho naibung osotua o enyorrata nauno, te lelo oonyor ninye, neibung inkitanapat enyena.

⁶Nchoo enkiok ino einining, nincho inkonyek inono eing'orisho, pee ining enkomono o sinka lino, naomon taata nanu te dukuya iyie, dama o kewarie, te nkaraki iltung'ana linono le Israel, isinkan linono, airridu ing'ok oo ltung'ana le Israel, nikitaasa iyiook tialo iyie. Ee ore nanu o enkaji e papaai lai nikitaasa eng'oki.

⁷Kitaasa iyiook entorroni oleng tialo iyie, neitu kimbung inkitanapat o nkiguanat o nkikoot apa nintanapa osinka lino Musa.

⁸Tadamu ilo rorei apa lintanapa osinka lino Musa, ijo, ‘Tenirara intae ilemeisiligayu, nalo nanu aidapash intae tiatua iloreren.

⁹Kake tenikirrinyokinono intae nanu nimbung'ubung'u inkitanapat aainei, ore hoo neba enkidapashari inyi anaa nkatampo te lakuani, kaiturur nanu ninche tene, nayau ninche ine wueji nategelua, pee aisho enkarna ai metobiko teine.’

¹⁰Isinkan linono ninche naa iltung'ana linono, lelo litokordua iyie te ngolon ino kitok, o te nkaina ino nagol.

¹¹Olaitoriani, nchoo enkiok ino metoning'o enkomono o sinka lino o enkomono oo sinkan linono ooshipakino euriata e nkarna ino. Nchoo enkishuroto o sinka lino ena olong, nincho ninye olng'ur too nkonyek ele tung'ani.” Kara apa nanu olanapani le nkikompe o laiguanani.