Read Maasai Bible – Biblia Sinyati Nehemia 3 Bible Online

Nehemia 3 - Maasai Bible – Biblia Sinyati bible

Nehemia 3

¹Nedumunye Eliashib ilo apolosani kitok, tenebo ilalashera lenyena, lelo apolosak, neshet ninche kishomi oo nkerra. Neitisiny ninche ina kishomi, nepik inkikeneta enyena. Neitisiny ninche ina kishomi o meitabaiki oltalet le iip nelo abaiki oltalet le Hananel.

²Ore enetashare ninye neshet Iltung'ana le Yeriko. Ore enetashare ninche neshet Sakar olayioni le Imri.

³Ore ilayiok le Hasena neshet kishomi oo sinkir; eitoluaa ninche iloom, nepik inkikeneta enyena o lmushumaani lenyena o sekenke enyena.

⁴Ore enetashare ninche, neitobir aram Meremot olayioni le Uria, olayioni le Hakos. Ore enetashare ninche neitobir aram Meshulam olayioni le Berekia, olayioni le Meshesabel. Ore enetashare ninche neitobir aram Sadok olayioni le Baana.

⁵Ore enetashare ninche neitobir aaram iltung'ana le Tekoa, kake ore lelo kituaak lenye eitu ninche epik imurto ina siaai o Laitoriani lenye.

⁶Ore Yoida olayioni le Pasea o Mehulam olayioni le Besodia, neitobir aaram enkishomi musana. Nepik iloom lenyena o nkikeneta enyena, o lmushumaani lenyena o sekenke enyena.

⁷Ore enetashare ninche, neitobir aram Melatia le Gebeon o Yadon le Meron o ltung'ana le Gebeon o le Mispa, apa ootii abori enkitoria o lbalusui leilo kerenket te lido kekun o lkeju.

⁸Ore enetashare ninche neitobir aram Usiel olayioni le Harbaia, ilo kunoni. Ore enetashare ninye neitobir aram Hanania, ilo obo loo laitobirak loo sonkoyoni; Neshet ninche Yerusalem o meitabaiki esuntai dapash.

⁹Ore enetashare ninche, neitobir Aram Refaia olayioni le Huri, ilo aitoriani le nchoto e Yerusalem.

¹⁰Ore olotashare ninche neitobir aram Yedia olayioni le Harumap, ina kipirakinoto e nkaji enye. Ore enetashare ninye neitobir aram Hatush olayioni le Hashabneia.

¹¹Ore Malkija olayioni le Harim o Hashub olayioni le Pahat Moab neitobir aaram enkae rishata tenebo oltalet lo lkokuet.

¹²Ore enetashare ninye neitobir aram Shalum olayioni le Halohesh, ilo aitoriani le nchoto nabo e Yerusalem, neshet ninye o ntoyie enyena.

¹³Ore Hanam o lelo oomanya Senoa, neitobir aaram enkishomi o erata; neshetu ninche ninye nepik inkikeneta enyena o lmushumaani lenyena o sekenke enyena, neram ntemat e nkaina e nkalifu nabo e suntai o meitabaiki kishomi e modioi.

¹⁴Ore Malkija olayioni le Rekab, ilo aitoriani lo lkerenket le Bethashekem, neitobir aram enkishomi e modioi, neitoki ashet ninye nepik inkikeneta enyena o lmushumaani lenyena o sekenke enyena.

¹⁵Ore Shalum olayioni le Galhose, ilo aitoriani lo lkerenket le Mispa neram aitobir, enkishomi e nkong'u enkare. Etesheta ninye neimulumul nepik inkikeneta enyena o lmushumaani lenyena o sekenke enyena. Neshet ninye esuntai o lchorro le Shela le nkurma o laiguanani, omeitabaiki nkedeta naadoyio aapuo enkanasa e Daudi.

¹⁶Ore te siadi ninye, neitobir aram Nehemia olayioni le Asbak, ilo aitoriani le nchoto nabo o lkerenket le Betsar o meitabaiki enkipirakinoto oo nkuraren e Daudi o meitabaiki olchorro oitobiruaki o meitabaiki enkaji oo ltung'ana magil.

¹⁷Ore te siadi ninche neitobir kulo Lawi aaram esuntai: Reham olayioni le Bani; ore te siadi ninye naa Shashabia, ilo aitoriani lo lpisiai lo lkerenket le Keila, neram aitobir olkerenket lenye.

¹⁸Ore te siadi ninye neitobir aaram ilalashera lenye; Bafai olayioni le Hanadad, ilo aitoriani le nchoto nabo o lkerenket le Keila;

¹⁹ore olosujaki ninye naa Eser olayioni le Yeshua, ilo aitoriani le Mispa, neitobir aram enkae rishata, enkipirakinoto e wueji neshumieki imasaa o larrabal teine nelojare e suntai.

²⁰Ore te siadi ninye neitobir aram Baruk enkae rishata ebaiki elojata e suntai o meitabaiki kutukaji e nkaji e Eliaship ilo apolosani kitok.

²¹Ore te siadi ninye naa Meremot olayioni le Uria, olayioni le Hakos oitobira enkae rishata, ebaiki kutukaji e nkaji e Eliab o metabaiki enkiting'oto, e nkaji e Eliaship.

²²Ore te siadi ninye naa kulo apolosak, lelo tung'ana le nkisiashata, ooitobira aaram esuntai.

²³Ore te siadi ninche neitobir aaram Benchamen o Hashab enkipirakinoto oo nkajijiki enye. Ore te siadi ninche neitobir aram Asaria olayioni le Maaseia, olayioni le Anania embata e nkaji enye makewan.

²⁴Ore te siadi ninye naa Benui olayioni le Hanadad oitobira aram enkae rishata, ebaiki enkaji e Asaria ometabaiki elojata e suntai nelo abaiki olpijata.

²⁵Ore Palal olayioni le Usai neitobir aram enkipirakinoto elojata o ilo talet oipang'u te nkaji e shumata o laiguanani to lgoriet le rripore. Ore te siadi ninye neitobir aaram Pedaia olayioni le Parosh,

²⁶tenebo ilaisiaayiak le nkaji e Nkai ootii Ofel ewueji neipirakinore kishomi e nkare, te nkalo o loosaen oilo talet oilep shumata.

²⁷Ore te siadi ninche neitobir iltung'ana le Tekoa enkae rishata te nkipirakinoto eilo talet oilep shumata o metabaiki esuntai e Ofel.

²⁸Ore shumata enkishomi oo mbartan neitobir ilapolosak aaram, oltung'ani ake enkipirakinoto e nkaji enye makewan.

²⁹Ore te siadi ninche neitobir aram Sadok olayioni le Imer enkipirakinoto e nkaji enye. Ore te siadi ninye neram Shemaia olayioni le Shekemia, ilo arriponi le kishomi e nkalo o loosaen.

³⁰Ore te siadi ninye neitobir aram Hanania olayioni le Shelemia, o Hanam ilo ayioni le ile le Selap neitobir aram enkae rishata. Ore te siadi ninye neitobir aram Meshalam olayioni le Berekia enkipirakinoto e nkaji enye.

³¹Ore te siadi ninye, neshet aram Malkija obo loo lkunono omeitabaiki enkaji oo laisiaayiak le nkaji e Nkai o ewueji oo lamirak enkipirakinoto e kishomi e rripore o meitabaiki enkaji e shumata natii olpijata.

³²Ore ebaiki olgilata le shumata o metabaiki kishomi oo nkerra, neitobir aaram ilkunono le saabu.