Read Maasai Bible – Biblia Sinyati Nehemia 7 Bible Online

Nehemia 7 - Maasai Bible – Biblia Sinyati bible

Nehemia 7

¹Ore apa pee eidipayu esuntai natipika nkikeneta oo nchomito, neidipaki aategelu ilarripok loo nchomito o laranyak o Lawi,

²naisho nanu olalashe lai Hanani o Hanania meitasheiki Yerusalem amu oltung'ani apa oisiligayu neure Enkai alang ilkumok.

³Najoki nanu ninche, “Emincho ake nchomito e Yerusalem eboli ometaba anaa neilepu enkolong; naa ore eton eitashe aarripisho nchoo ninche eiken nepik isekenke ooikenieki nchomito. Entegelu ilarripok tiatua lelo oomanya Yerusalem, neitashe ake pooki ng'ae te rishata enye, neipirare ake oltung'ani enkaji enye.”

⁴Aisapuk apa ina anasa nelala, kake ore iltung'ana ootii atua naa kuti nemetii nkajijik naaidipaki aateshet.

⁵Nepik apa Enkai ndamunot aainei pee aiturrur ilkituaak o larikok o ltung'ana pee eiger pooki anaa ntipati oo lmareita, lelo apa ootang'asa aapuonu, natum nanu eigeroki aaiko nji:

⁶Iltung'ana lo lkerenket kulo apa ooetuo eing'uaa eyararoto e lelo apa ootaarayie Nebukadnesa olaiguanani le Babilon nenap aya, etorrinyunye ninche Yerusalem o Yuda nelo ake pooki ng'ae enkang enye.

⁷Eetuo apa ninche tenebo Serubabel o Yeshua o Nehemia o Asaria o Raamia o Nahamani o Mordekai o Bilshan o Misparet o Bigfai o Nehum o Baana. Ore esiana oo ltung'ana le Israel:

⁸lelo ayiok le Parosh, naa nkalifuni are o iip nabo o ntomoni naapishana oaare.

⁹Ore ilayiok le Shefatia naa iip uni o ntomoni naapishana oaare.

¹⁰Ore ilayiok le Ara, naa iip ile o onomm oaare.

¹¹Ore ilayiok le Pahat Moab, aa taa ilayiok le Yeshua o Yoab, naa nkalifuni are o iip isiet o tomon o isiet.

¹²Ore ilayiok le Elam naa enkalifu nabo o iip are o onom o oong'uan.

¹³Ore ilayiok le Setu naa iip isiet o artam o miet.

¹⁴Ore ilayiok le Sakai, naa iip naapishana o ntomoni ile.

¹⁵Ore ilayiok le Binui, naa iip ile o artam o isiet.

¹⁶Ore ilayiok le Bebai naa iip ile o tikitam o isiet.

¹⁷Ore ilayiok le Asgad, naa nkalifuni are o iip uni o tikitam o are.

¹⁸Ore ilayiok le Adonikan naa iip ile o ntomoni ile oopishana.

¹⁹Ore ilayiok le Bigfai naa nkalifuni are o ntomoni naapishana.

²⁰Ore ilayiok le Adin naa iip ile o onom o miet.

²¹Ore ilayiok le Ater, a taa ile Hesekia naa ntomoni naaudo o isiet.

²²Ore ilayiok le Hashum naa iip uni o tikitam o isiet.

²³Ore ilayiok le Besai, naa iip uni o tikitam o ong'uan.

²⁴Ore ilayiok le Harif naa iip o tomon oaare.

²⁵Ore ilayiok le Gibeon naa ntomoni naaudo o miet.

²⁶Ore iltung'ana le Betlehem o Netofa naa iip o ntomoni isiet o isiet.

²⁷Ore iltung'ana le Anatot naa iip o tikitam o isiet.

²⁸Ore iltung'ana le Bet-asmapet naa artam oaare.

²⁹Ore iltung'ana le Kiriat-yearim, Kepira o Beerot, naa iip naapishana o artam o kuni.

³⁰Ore iltung'ana le Rama o Geb, naa iip ile o tikitam o obo.

³¹Ore iltung'ana le Mikmas naa iip o tikitam o are.

³²Ore iltung'ana le Betel o Ai, naa iip o tikitam okuni.

³³Ore iltung'ana le nkae Nebo naa onom o are.

³⁴Ore ilayiok le likae oji Elam naa enkalifu nabo o iip are o onom o ong'uan.

³⁵Ore ilayiok le Harim, naa iip uni o tikitam.

³⁶Ore ilayiok le Yeriko naa iip uni o artam o miet.

³⁷Ore ilayiok le Lod, Hadid o Ono, naa iip naapishana o tikitam o obo.

³⁸Ore ilayiok le Senaa naa nkalifuni naapishana o iip naaudo o tomoni uni.

³⁹Ore ilapolosak: lelo ayiok le Yedaia aa taa enkaji e Yeshua, naa iip naaudo o ntomoni naapishana o okuni.

⁴⁰Ore ilayiok le Imer, naa enkalifu nabo o onom o are.

⁴¹Ore ilayiok le Pashur, naa enkalifu nabo o iip are o artam o oopishana.

⁴²Ore ilayiok le Harim naa enkalifu nabo o tomon oopishana.

⁴³Ore Ilawi: lelo ayiok le Yeshua, aa taa ile Kadmiel loo layiok le Hedefa, naa ntomoni naapishana o ong'uan.

⁴⁴Ore ilaranyak lelo ayiok le Asaf, naa iip nabo o artam o isiet.

⁴⁵Ore ilarripok loo nchomito: lelo ayiok le Shalum, ilayiok le Ater, lelo ayiok le Talmon, lelo ayiok le Akub, lelo ayiok le Hatita, lelo ayiok le Shobai, naa iip nabo o tomoni uni o isiet.

⁴⁶Ore lelo aisiaayiak le nkaji e Nkai, lelo ayiok le Siha, lelo ayiok le Hasufa, lelo ayiok le Taabaot,

⁴⁷lelo ayiok le Keros, lelo ayiok le Sia, lelo ayiok le Padon

⁴⁸lelo ayiok le Lebana, lelo ayiok le Hagaba lelo ayiok le Shalmai,

⁴⁹lelo ayiok le Hanan, lelo ayiok le Gidel, lelo ayiok le Gahar,

⁵⁰lelo ayiok le Reia, lelo ayiok le Resin, lelo ayiok le Nekoda,

⁵¹lelo ayiok le Gesam, lelo ayiok le Usa, lelo ayiok le Pasea,

⁵²lelo ayiok le Besai, lelo ayiok le Meunim, lelo ayiok le Nefushesim,

⁵³lelo ayiok le Bakbuk, lelo ayiok le Hakufa, lelo ayiok le Hashur,

⁵⁴lelo ayiok le Bashit, lelo ayiok le Mehida, lelo ayiok le Harsha,

⁵⁵lelo ayiok le Barkos lelo ayiok le Sisera, lelo ayiok le Tema,

⁵⁶lelo ayiok le Nesia, lelo ayiok le Hatifa.

⁵⁷Ore ilayiok loo sinkan le Solomon, ilayiok le Sotai, ilayiok le Soferet, ilayiok le Persida,

⁵⁸ilayiok le Yaala, ilayiok le Darkon, ilayiok le Gidel,

⁵⁹ilayiok le Shefatia, ilayiok le, Hatil, ilayiok le Pokeret Lasebaim, lelo ayiok le Amon.

⁶⁰Ore isinkan pooki le nkaji e Nkai o sinkan loo layiok le Solomon pooki naa iip uni o ntomoni naaudo oaare.

⁶¹Kulo oodukino apa lelo ooetuo eing'uaa Telmela, Telhasha, Keurub, Adon, o Imer, kake meidim apa ninche aaibalie ilmareita loo loo menye aashu ineeikino ninche, tenaa ke ltung'ana le Israel ninche.

⁶²Ilayiok le Delaia, ilayiok le Tobia, ilayiok le Nekoda, naa iip ile o artam oaare.

⁶³Ore sii ilapolosak: lelo ayiok le Hobaia, lelo ayiok le Hakos, ilayiok le Barsilai, (laa ninye apa oyama entito nabo too ntoyie e Barsilai le Gilead neaku ninche eipotieki).

⁶⁴Eing'orutua kulo enkigeroto oo nkarn enye tenebo lelo ooigeroki too lmareita, kake eitu etumi teine, neaku etundung'oyioki too lapolosak aajo keiduruk;

⁶⁵etiaaka olgafanai ninche pee mejing ninche enkinosata eina daa sinyati aisul, ometaba anaa nedumunye olapolosani oata Urim o Tummim.

⁶⁶Ore apa eumata pooki tenebo naa nkalifuni artam oaare o iip uni o ntomoni ile

⁶⁷metii isinkan lenye lewa o sinkan enye ng'oruo, nera apa ninche nkalifuni naapishana o iip uni o ntomoni ile o opishana; neeta apa ninche ilaranyak iip are o artam o miet, ilewa o ng'oruo.

⁶⁸Ore mbartan enye naa iip naapishana o tomoni uni o ile. Ore inyumpui enye naa iip are o artam o miet.

⁶⁹Ore ntamesin enye naa iip ong'uan o tomoni uni o miet. Ore isirkon lenye naa nkalifuni ile o iip naapishana o tikitam.

⁷⁰Ore apa ilukuny oo nkajijik oo loo menye neishooyo nkishoorot te nkaraki esiaai. Eishooyie olgafanai apik olchumati nkiloi isiet e saabu o ng'irran onom o lkilani loo lapolosak iip imiet o tomoni uni.

⁷¹Ore ilkulikae oora ilukuny oo nkajijik oo loo menye neishooyo aapik olchumati le siaai saabu nkiloi iip o ntomoni ile o miet o enkosholai nkiloi enkalifu nabo o iip are o onom.

⁷²Ore ilkulikae tung'ana neishooyo saabu nkiloi iip nabo o ntomoni ile o isiet o nkiloi iip nabo o artam e nkosholai o lkilani ntomoni ile oopishana loo lapolosak.

⁷³Neaku ore ilapolosak, lelo le Lawi o larripok loo nchomito o laranyak o embata oo ltung'ana o embata oo sinkan le nkaji e Nkai o Siraeli pooki; netoni too nkang'itie enye. Ore pee ebau olapa liopishana, netii nkera e Israel nkang'itie enye maate.