Read Maasai Bible – Biblia Sinyati Tobit 10 Bible Online

Tobit 10 - Maasai Bible – Biblia Sinyati bible

Tobit 10

¹Neiken Tobit inkolong'i pooki ometabau enapa olong naishiaa pee ebau neitu ebau,

²Nejo, “Kebaiki neibooki? Aashu ebaiki netua Gabael nemeetae oltung'ani oisho mpisai?”

³Nenyamalu Tobit oleng.

⁴Nejoki enkitok enye Hana, “Etua enkerai ai, ore ena bikoto naa keibalunye ina.” Neiteru Hana aishir, nejo,

⁵“Oi enkerai ai, kainyoo apa pee aaishoo ilo, iyie ewang'an oo nkonyek aainei?”

⁶Kake nejoki Tobit ninye, “Intagoluoyu mintoki anyamalu; aisupat ninye.”

⁷Newaliki Tobit ajoki, “Intagoluoyu nimikintoki alej, etua enkerai ai.” Neaku ore inkolong'i pooki nelo enkoitoi naima apa enkerai enye; nepukoo dama, naa ore kewarie neishir edamu enkerai enye Tobias, omeishunye inkolong'i tomon oong'uan o sirua le nkiyama apa naatejo Raguel kebik teine. Ore teina rishata nejoki Tobias Raguel, “Irriwayioki amu meekure eeta papa o yieyio osiligi laaitoki aadolie.”

⁸Kake nejoki olaputani lenye, “Matotoni tenebo, naa kairriwaa ilkiliku enetii papa lino pee aliki enaikununo imbaa tena alo.”

⁹Newaliki Tobias, “Irriwayioki nanu pee ashuko enetii papa.”

¹⁰Nedumunye Raguel neisho Tobias enkitok naji Sara neisho sii esashati sapuk oo masaa enyena aa taa: irrindiki, inkishu, intamesin, intare o sirkon o mpisai.

¹¹Nemayian ninche nejo “Ore Enkai e shumata kemayian intae pee edol enkishui ai nkera inyi eton eitu aye.”

¹²Nejoki entito enye, “Iyanyita papa lino o ng'utunyi amu etaa duo taata intoiwuo inono kuna. Inchooki aning ilomon supati.” Neng'utut ninye. Nejoki Edna Tobias, “Inchoo erikoo intae Olaitorini le shumata, olalashe lai, inchooki matoduaa inkera entito ai Sara, pee ashipa te dukuya Olaitoriani. Ingu'ra ajo aaishoo entito ai; mintagor ake.”

¹³Nelo Tobias aing'uaa enkaji e Raguel eshipa oleng. Ore te nchipai enye neisis Enkai e shumata o enkop, olaiguanani le pooki toki, nemayian sii ninche Raguel o enkitok enye Edna, ejo “Enchoo eaku enchipai ai enkanyit nayanyit intai inkolong'i pooki e nkishui ai.”