Read Maasai Bible – Biblia Sinyati Tobit 11 Bible Online

Tobit 11 - Maasai Bible – Biblia Sinyati bible

Tobit 11

¹Ore pee eidipa ina, nelo Tobias, eisisita Enkai amu etamayiana elototo enye. Nemayian Raguel o enkitok enye Edna. Nelo ometinyikaki Ninawi.

²Nejoki Rafael Tobias, “Olalashe aimiyiolo enaikununo apa mpapa lino pee ing'uaa?

³Maituruko te dukuya enkitok ino pee kintobir enkaji.

⁴Naa iwa olodua lo sinkirri.” Nepuo taa ninche neirukurukore oldia.

⁵Ore teina rishata, etonita Hana aing'or enkoitoi te naa kedol olayioni lenye.

⁶Nedol egira alotu, nejoki menye, “Ing'ura, egira alotu olayioni lino o lapa tung'ani oiriamariyie!”

⁷Nejoki Rafael Tobias, “Kayiolo ajo kedolishoyu papaai lino.

⁸Ielie taa iyie inkonyek enyena olodua lo sinkirri, ore amu olchani keitayu inkileget pooki too nkonyek, nedolishoyu.”

⁹Nekwet Hana anang'are ninche, neng'amu olayioni lenye, nejoki, “Atoduaa enkerai ai, aidipa metii enyamali tenaye.” Neishir pokira are.

¹⁰Nedumunye sii ninye Tobit kake nebatata, nekwetiki olayioni lenye ninye,

¹¹neibung menye, neisuaaki olodua lo sinkirri inkonyek e menye, nejo, “Intagoluoyu papa”

¹²Naa ore pee eiteru inkonyek aang'eyu neoj,

¹³nepuku inkeleget too nkonyek.

¹⁴Nedol Tobit olayioni lenye nemuataki inkaik, neishir nejo, “Mikisisi iyie Enkai ai, Meisisi enkarna ino intarasi, Meisisi ilmalaika sinyat.

¹⁵Iyie oyawua ele sina pooki, kake king'urrie, kaidim taata atoduaa enkerai ai Tobias!” Nejing Tobias aji eshipa, neliki menye imbaa pooki naatasate te Midia.

¹⁶Nelo Tobit anang'are Sara enkitok olayioni lenye te kishomi e Ninawi, eshipa neisisita Enkai. Ore lelo otoduaa eloito neing'asia oleng amu etodolishe.

¹⁷Neshukoki Tobit Enkai enashe te dukunya ninche amu eingu'rrie Enkai ninye. Ore pee ebaiki Sara enkitok olayioni lenye, nemayian, ejo, “Aaitoomon entito ai! Meisisi sii Enkai nikiyauwua enikitii, nemayiana sii papai lino o ng'utunyi.” Neaku sapuk enchipai too lalashera pooki le Ninawi.

¹⁸Nelotu sii ninye Ahika o lalashe lenye Nadab, naa ore enkiyama e Tobias neaku osirua loo nkolong'i napishana le nchipai sapuk.