Read Maasai Bible – Biblia Sinyati Tobit 13 Bible Online

Tobit 13 - Maasai Bible – Biblia Sinyati bible

Tobit 13

¹Neiger Tobit enkomono enkisisa, nejo: Emayiana Enkai naishu intarasi, naa kemayiana sii enkitoria enye.

²Keitame neeta olng'ur; erikoo iltungana enemeneng'a neshuku, nemeetai oloidim ailanya enkaina enye.

³Embalie ninye too loshon pooki, intae inkera e Israeli; amu eidapasha iyiook tiatu ninche.

⁴Embalie enkitoo enye, elepunyie ninye te dukuya lelo oishu; amu Olaitoriani lang naa Enkai, ninye Papa lang intarasi.

⁵Keitame iyiook too nkitaruorot ang, neitoki aing'urrie iyiook, neiturrur iyiook too loshon pooki, likindapashakinote.

⁶Tinimbelekenyakinono ninye too iltauja linyi o enkishui inyi, niasiasa ina nasipa te dukuya ninye, naa keshukokino intae, nemeitoki aisudoo enkomom enye te intae. Kake entodol enaas te intae; entushukoki enashe too itoiloshi linyi pooki. Esisa Olaitoriani le supatisho nilepunyenye olaiguanani loo iishoritin pooki. Kaisho ninye enashe te enkop ai eyararoto, naa kaibalie engolon o nkitoo, enye te nkop oo laing'okok. Embelekenyata intae ilaing'okok, niasiasa esidai te dukuya ninye; kang'ae naiyiolo te naa aikinyoraa niking'urrie?

⁷Kailepunye Enkai ai; neilepunye enkishui ai olaiguanani le keper, naa kashipakino enkitoo enye.

⁸Inchoo iltung'ana pooki eiro, nishukokiki enashe te Yerusalem.

⁹Oi iyie Yerusalem, enkanasa sinyati, keitame intae too iasat o enkera inyi, kake keitoki aduaki olng'ur inkera esupatisho.

¹⁰Enchoo Olaitoriani enashe naishiaakino, eisisa olaiguanani loo ishoritin pooki, pee eilepakinyeki intae olng'oborr lenye te inchipai. Neitiship tiatua intae lelo ooena o enyorrata te lelo o oonyamal too iishoritin pooki intarasi.

¹¹Kepuonu iloshon kumok oolakua te enkarna Olaitoriani Enkai, enapita inkishoorot too inkaik enye, inkishoorot olaiguanani le keper. Neisis iishoritin o iishoritin te nchipai.

¹²Kediaa lelo pooki ooiba intae nemayiana intarasi lelo o oonyorr intae.

¹³Entigi'ndata nishipapa te nkaraki inkera esupatisho; te nkaraki keiturruri tenebo neisis Olaitoriani le supatisho.

¹⁴Kebaa emayianata e lelo onyorr intae! Keng'idayu tiatua eseriani inyi. Emayiana lelo ooisinanuo tiatua enkitamioto inyi; amu keng'indayu tenedol enkitoo inyi, naa keshipayu intarasi.

¹⁵Enchoo oltau lai eisis Enkai olaiguanani kitok.

¹⁶Amu kesheti Yerusalem te safira o soito oonyori, ore sunta enye too soito sidain ore iltaleta o wuejitin o larrabal naa saabu nasila.

¹⁷Ore inkoitoi enkanasa e Yerusalemu naa kesheti te bali o rubi o soito le ofir;

¹⁸nerany inkoitoi pooki aajo Halleluyia neisho enkisisa ejo, Kemayiana Enkai nikilepunye iyie intarasi.