Read Maasai Bible – Biblia Sinyati Tobit 14 Bible Online

Tobit 14 - Maasai Bible – Biblia Sinyati bible

Tobit 14

¹Eidipa Tobit irorei lenyena le nkisisa.

²Oloo larin onom o isiet pee modoku, ore pee elusoo ilarin isiet neitoki adolishoyu. Neitayu inkishoorot, nelo dukuya eure Olaitoriani Enkai neisis ninye.

³Ore pee emoruau, neipot enkerai enye o noo nkakuyiaa enyena nejoki, Enkerai ai, iwa inkera inono amu atamorua netaa kairura.

⁴Shomo Midia, Enkerai ai, amu kairuk tukul enatejo apa oloiboni Yona too naaipirta Ninawi, pee ejo kebatata. Kake ore te Midia naa ketumi eseriani te nkiti rishata. Naa keidapashakino ilalashera lang enkop pooki eiteru te nkop sidai, neaku mijooni Yerusalem. Nepejori enkaji e Nkai neinyali te nkiti rishata.

⁵Kake keitoki Enkai aing'urrie ninche, neyau enkop enye; naa keitoki aashet enkaji e Nkai, kake meitoki anyaanyukie enapa e dukuya. Ore pee eidipayu, neshukunye te yararoto, neitoki aashet Yerusalem te karsisisho. Nesheti enkaji e Nkai anaa enatejo iloibonok le Israel.

⁶Neureyu iloreren Olaitoriani Enkai tesipata nenukaa inkaitin enye naaguetuno.

⁷Ore ilkulikae oreren pooki neisis Olaitoriani, neshukoki iltung'ana lenyena Enkai enashe, naa keilepunye Enkai iltung'ana lenyena. Naa ore pooki oonyorr Olaitoriani Enkai te sipata oe supatisho naa keng'idayu, neduaaki olng'ur ilalashera lang.

⁸“Ore naa, enkerai ai, indurra te Ninawi amu ore enatejo oloiboni Yona naa keasayu,

⁹kake imbung'a inkitanapat, taa oltung'ani lo lng'ur naa asipani, pee eaku sidai te iyie.

¹⁰“Tunukayioki aitobiraki o yieyio lino. Naa miton oleng te Ninawi. Ing'ura, enkerai ai, enaitaasa Nadab Ahika laa ninye oitubulua, nerikoo aitung'uaa ewang'an arik enaimin, nidol enatalakaki ninye. Kake itajeuoki Ahika ore kulikae neng'amu elaata enye, ore ninye nelo tenaimin. Eishooyie Ahika inkishoorot neisik aing'ataa orreshet le keeya otipikaka Nadab; kake ore ninye Nadab nesulakino ilo rreshet neye.

¹¹Neaku, inkera aainei, aiguanare nena naitabaya inkishoorot oe supatisho nayau.” Ore ejoito kuna neirura te ndapash enye eeta ilarin iip o onom o isiet; nenukaa Tobias aitobiraki.

¹²Ore pee eye Hana nenukaa te mbata e Paapai lenye. Neshuko Tobias o enkitok enye o enkerai enye aapuo Ekbatana, enkang e Raguel olaputani lenye.

¹³Nemoruau aaku kitok eishori enkanyit, neturoo Tobias aitobiraki olaputani o enkaputani enye. Nejung imasaa enye pooki o ne papaai lenye Tobit.

¹⁴Etua ninye Tobias te Ekbatana e Midia eeta ilarin iip nabo o tikitam oopishana.

¹⁵Kake ore eton eitu eye nening emutata e Ninawi, ina apa naibung'a Nebukadnesa o Ashuru. Kake ore eton eitu eye neng'idakino Ninawi.