Read Maasai Bible – Biblia Sinyati Tobit 2 Bible Online

Tobit 2 - Maasai Bible – Biblia Sinyati bible

Tobit 2

¹Ore pee ashuko ang, nikintoki aatumo o enkitok ai Hana o layioni lai Tobias to sirua le Pentekoste, laa osirua osinya loo wikii naapishana, naaitobirakini endaa e teipa naton anya.

²Ore pee adol endaa eneba najoki olayioni lai, “Shomo toriku oltun'gani aisinani le nkaji ang otii eyararoto oyiolo Enkai naa kaarreshu”.

³Kake neshukunye nejo, “Papaai! Papaa! Etaaraki oltung'ani lang obo neiturrarri te nemirishoreki”

⁴Neaku ore ninye eton eitu aishamisham endaa, nadumunye, nalo aitayu ilo sesen napik ewueji sidai ometadoi enkolong.

⁵Ore pee ashuko naisuja nadaa naisinanuo.

⁶Nadamu enetejo oloiboni le Nkai Amos, “Kaibelekeny nanu isiruai linyi aitaa osina, ore isinkolioitin linyi pooki neaku olkiyioi.” Naishir.

⁷Ore pee edoyio enkolong nalo atur enkurare nanukaa osesen.

⁸Naakueniyie elatiaa ai pooki nejo, “Meekure eure ajo keari teneas kuna; netang'asa oshi ailany, naa nele oturoo ilootuata!”.

⁹Ore ina kewarie nashukunye aidipa atunukai ilo sesen, ore amu aiduruko, nairura te suntai o lgoriet nemeitoipo enkomom ai.

¹⁰Eitu ayiolou ajo ketii isarampalani esuntai, naapik inkik inkonyek, naaiborru nkonyek, nalo aduaare ilabaak kake eitu aaret, namodoku kake naaramat Ahika too larin aare eton eitu elo enkop e Elam.

¹¹Ore pee elo Ahika, nelo Hana enkitok ai aas esiaai, arip inkilani anaa nkulie kituaak.

¹²Ore iltung'ana ootasaka esiaai nelaaki mpisai neyaki inkilani. Neishori olkuoo le kine.

¹³Ore pee eyau Hana Olkuoo lenye le kine ang, neorito, “Naikilikuan ajoki kaji intung'uaa olkuoo? Tushukoki ilopeny, amu mme sidai tininya enyamu”.

¹⁴Naajoki Hana “Aaishoki anaa enkishooroto o e mponikinoto olekoisiaayio lai”. Kake eitu airuk ninye, najoki pee eshukoki iloopeny; naawaliki ajoki, “Koree enyorrata ino o esupatisho oo iasat inono? Etiu anaa iyiolo pooki toki!”