Read Maasai Bible – Biblia Sinyati Tobit 3 Bible Online

Tobit 3 - Maasai Bible – Biblia Sinyati bible

Tobit 3

¹Ore te mion sapuk naishir, naomon Enkai to sina lai,

²“Ira supat, iyie Olaitoriani! Ore iasat inono naa eine sipata; ore inkoitoi inono naa ino lng'ur oe sipata, ira iyie olaiguanani le nkop.

³Tadamuaki, niking'urrie nanu; mikintame te ng'oki nataasa te eng'oki ai, oe nataasa loo papa te dukuya iyie.

⁴Amu eitu eyanyit inkitanapat inono, nipalaa meibung'i, neidurrieki neari iyiook. Intaa iyiook iloomeni tiatua iltung'ana le nkop lindapashaka.

⁵Naa ore inkiguanat inonok naasipa, pee king'uanare nanu too ng'ok aainei o noo loo papa, amu eitu kimbung inkitanapat inono. Amu eitu kipuo too nkoitoi e sipata te dukuya iyie.

⁶Intaasaki nanu anaa enyorrata ino; intayu oltau lai, pee eaku enterit. Amu enaikash tenaye alang tenaishu, anoto inyamalaritin kumok o sina sapuk tiatua nanu. Intayioki tiatua ena nyamali, iwaki enalo ayeng'iyeng'are intarasi. Miany ake enkomono ai.”

⁷Ore ina olong ake te nkanasa e Ekbatana e Midia, netediaaki Sara entito e Raga, nabo oo nkasiaayiak e menye.

⁸Amu ore apa Sara neyama ilpayani oopishana, kake near olorirua oji Asmoda eton eitu eboitare. Nejoki enkasiaayani, “Emiyiolo ajo iyie nataara payiani linono? Iata apa lpayiani oopishana nemeeta hoo obo litudupore.

⁹Ainyoo pee ishukokino aar iyiook? Etuata ninche, tusuja! Enaikash tenimikidol olayioni aashu entito ino!”

¹⁰Ore pee ening Sara lelo omon neisinanuo oleng, nejo agor kewan. Kake nejo, “Nanu ake enkerai e papa; tenaas ena, keaku torrono te papai, naa ore te moruao enye, kear ina bae nepik enkurare”.

¹¹Neomon Sara te lusie e nkaji enye ejo, Enkai o lng'ur, “Ekiririkino enkisisa Enkai ai, nemayiana sii enkarna ino sinyati nikianyiti intarasi. Nikisis iasat inono intarasi.

¹²Ore taata Olaitoriani, aaing'orita naaisiligita iyie.

¹³Talakuaki nanu tena kop, pee maitoki atum osina.

¹⁴Amu iyiolo iyie Olaitoriani lai ajo mayiolo nanu olee.

¹⁵Neitu ainyal enkarna ai o ene papa te nkop oo loreren. Nanu ake enkerai e papa, nemeetai ai kerai najung ninye aashu osotua lenye laaidim ayama. Aaidipa aatuata ilewa oopishana laainei; ainyoo pee aishu nanu? Ore tinimikiyieu nikintayu tena kop, ing'urrieki Enkai ai. Amu maidim morot”.

¹⁶Neaku etoning'o Enkai enkomono e Tobit o Sara.

¹⁷Eirriwua Enkai Olmalaika lenye Rafael pee ebak Sara o Tobit: Meitayu inkileget too nkonyek e Tobit pee edolishoyu, neisho Sara entito e Raguel meyama Tobias olayioni le Tobit, pee eitayu oloirirua oji Asmoda amu Tobias apa oyam ninye te sipata. Ore ina kata ake neshukunye Tobit nejing aji, nedou Sara entitio e Raguel eing'uaa olgilata le shumata.