Read Maasai Bible – Biblia Sinyati Tobit 4 Bible Online

Tobit 4 - Maasai Bible – Biblia Sinyati bible

Tobit 4

¹Ore ina olong nedamu Tobit impisai naatung'ueikia Gabael te Raga, te nkop e Midia. Nejo;

²“Ore amu atoomonuo keeya, kaipot olayioni lai Tobias pee aliki nena pisai eton eitu aye?”.

³Neipot olayioni lenye nejoki, “Enkerai ai, ore tenaye, nikinukaa, iyanyita ng'utunyi niramat; nintaas pooki nayieu nimintagor ake.

⁴Tadamu enkerai ai, ajo eimua ng'utunyi neerrish te nkaraki iyie eton miino. Ore teneye ng'utunyi tunukai te nkalo nanu teina kurare nabo.

⁵“Tadamu Olaitoriani Enkai ang nkolong'i inono pooki, enkerai ai, mias eng'oki aashu iyany isuj inkitanapat enyena. Taasa isidain te nkishui ino pooki, nimisuj inkoitoi torrok.

⁶Amu ore tenira asipani nebulaa iasat inono.

⁷Taa aminin te pooki ng'ae oyanyit Enkai. Mipal ake eitu ishilaa ilaisinak pee mikipalaa ake sii iyie Enkai.

⁸Ore tinikitamayiana Enkai, intayu inkishoorot naairirikino hoo niata nkuti, miure aitayu.

⁹Amu ore tinikiaas neijia, ate kishumaki isidain ore enkata enyamali nikiata enikishurie,

¹⁰amu ore tinikiret ilaisinak nemitu iyiook te naimin e keeya.

¹¹Kesipa ore pooki oata enyorrata naa enkishooroto sapuk oleng te dukuya Enkai.”

¹²“Enkerai ai tayiolo taa enkoitoi e loloito nirrip kewan, iyama enkitok e ishoi o loo minyi, nimiyam enkitok oo nkuapi neme ene nkaji inyi; amu aikira iyiook inkera oo loibonok. Tadamu, enkerai ai, ajo ore Noa, Abraham, Isaak o Yakobo o loo papa liapa neyama nkituaak e sotua. Nemayiani too nkera enye, naa ore eishoi enye nejung enkop.

¹³Enkerai ai, tonyorra naa ilalashera linono, mipashupashu niyany iiyam ile nkaji inyi, amu ore olwuasa neyau emutata o engoro sapuk anaa enayau olom aisinanisho o esumash. Ore olom naa ninye esumash kitok.

¹⁴Mintobik olekoisiaayio loo sinkan enkolong nabo, kake talaa ninche; iyanyita Enkai naa aikilak ninye. “Ing'ura kewan enkerai ai, te pooki nias, imbung'a enkanyit too iasat inono.

¹⁵Mintaas olikai enimiyieu iyie nikintaasi, miok enaisho o sabibu oleng aashu incho emerai kirikoo.

¹⁶Inchoo endaa loota esumash, nincho inkilani ilemeeta; inchooi inkishoorot te nyorrata, tiniretu olaisinani taasa ina te nyorrata.

¹⁷Teneye olasipani le Nkai, inchoo endaa enkaji enye, kake mias ina teneye olaing'okoni.

¹⁸Eng'oru enkikoo too iltung'ana ng'eni, mimenu ake enkikoo naata tipat.

¹⁹Isisa Olaitoriani Enkai nkolong'i pooki, niomon pee kirikoo too nkoitoi sidan, neitalala inkoitoi inono. Amu meeta enkop naata eng'eno kake Enkai openy naishoru isidain te yieuna enye to ltung'ani oyieu. “Neaku enkerai ai, tadamu nkitanapat aainei, nimincho kirikino to ltau lino.

²⁰Enkerai ai, tayiolo ajo aishoo apa Gabael olayioni le Gabri te Raga te nkop e Midia impisai tomon e nkosholai. Miureishoyu Enkerai ai, amu kitaa aisinak.

²¹Iata karsisisho sapuk tiniure Enkai, nimias ing'ok, taasa mbaa sidan te dukuya Olaitoriani e Enkai ino.”