Read Maasai Bible – Biblia Sinyati Tobit 5 Bible Online

Tobit 5 - Maasai Bible – Biblia Sinyati bible

Tobit 5

¹Newaliki Tobias menye nejoki, “Papa kaas nena pooki nikitiaaka nanu;

²Kake kaji aiko tenaitalaku esile nemayiolo ilo tung'ani oata?”

³Neisho Tobit olpiyayati oitodolu olning'o lenye o Gabael, “Nejoki ing'oru oltung'ani lintaa encholiek naa kalaaki eton aishu, shomo iyau impisai.”

⁴Nelo Tobias aing'oru ilo tung'ani; netum olmalaika oji enkarna Rafael.

⁵Kake ore ninye Tobias eitu eyiolou. Nejoki Tobias, ilo malaika “Torikoki Raga te Midia, iyiolo ina luboto?”

⁶Nejoki olmalaika, “Ekiriamari; kayiolo enkoitoi, natobiko sii tenebo olalashe lang Gabael.”

⁷Nejoki Tobias, “Tarreshuoki, pee aliki papa”.

⁸Nejoki “Shomo kake mimutie”. Nelo ajoki menye, “Papa anoto encholiek” nejoki, “Impotokoki, pee ayiolou ajo kolialo orere aashu tenaa ko ltung'ani oisiligayu.”

⁹Neitoomon Tobias Rafael, nejing aji neirorokino.

¹⁰Nejoki Tobit “Olalashe lai, ira olialo orere naa ira olialo marei? Tolikioki.”

¹¹Newaliki, “Amaa ke loreren o lmarei ing'oru anaa ko ltung'ani oirimarie olayioni lino pee ilaaki?” Nejoki Tobit, “Olalashe lai, tolikioki iltung'ana linyi o enkarna ino.”

¹²Newaliki ajoki “Kara nanu Azaria enkerai e Anania kitok, obo le nkaji inyi.”

¹³Nejoki Tobit, “Aaitoomono olalashe lai, migoro taa amu atejo ajurru olorere o lmarei lino, ira iyie ole nkaji ang o lmarei sidai, amu ayiolo apa Anania o Natani, ilayiok le Shama kitok, pee kipuo enkomono aaitayu inkishoorot e dukuya eishoi o inkishoorot oo nkurman ang te Yerusalem. Eitu apa eitarruoo ilalashera lang. Olalashe lai, ira ole nkaji namayiana.”

¹⁴Nejoki Tobit, “Kaalaki inoshi ake pisai enkolong o kulie naaponari te ntai pokira aare.

¹⁵Taa encholiek sidai e Tobias, naa kaaponiki impisai enkolong”.

¹⁶Nejoki Tobias, “Tanapayu te lototo nayiewuaki intae isidan”. Nenapa olayioni lenye. Nejoki menye, “Eriamari o ele tung'ani, ore Enkai natii shumata neitubulaa inkoitoi inyi, nerrip intai ilmalaika lenyena”. Neirimari pokira aare nepuo, nesuj oldia ninche.

¹⁷Kake ore Hana ng'otonye Tobias, neiteru aishir, nejoki Tobit, “Ainyoo pee irriwayie enkerai? Aime ninye oshi enkaina o enkeju ang tene. (Olaretoni lang tene)”.

¹⁸Amaa ke mpisai ine tipat teyie alang enkishui e nkerai ino?

¹⁹Amu ore enkishui naishoo iyiook Enkai nebaiki iyiook.

²⁰Nejoki Tobit ninye, “Minyamalu, enkanashe ai; keshukunye te seriani, naa idol too nkonyek inono.

²¹Amu kerikoo olmalaika; kemayiana elototo enye naa keshukunye te seriani”. Nepal Hana olkiyoi.