Read Maasai Bible – Biblia Sinyati Tobit 6 Bible Online

Tobit 6 - Maasai Bible – Biblia Sinyati bible

Tobit 6

¹Ore epuoito nemutu pee baya olkeju le Tigiris netoni teine.

²Nelo Tobias olkeju aitukuo. Neipidu osinkirri to lkeju eyieu eijoo Tobias;

³nejoki olmalaika ninye, “Imbung'a osinkirri”, neibung Tobias osinkirri nenang'aki enkop natoyio.

⁴Nejoki olmalaika, “Teyiang'a ilo sinkirri, nintayu oltau o emoinyua o lodua tushuma”.

⁵Neas Tobias anaa enatiaaka olmalaika, nepej osinkirri nenya pokira. Neitoki aapuo ometinyikaki Ekbatana.

⁶Nejoki Tobias olmalaika, “Olalashe Azaria kaa tipat eeta oltau o emoinyua o lodua lo sinkirri?”

⁷Newaliki ajoki, “Ore oltau o emoinyua keidim atapejo oltung'ani ore empuruo enye naa kemiraa enkiyang'et torrono aashu oloirirua oitanyamal oltung'ani.

⁸Kake ore olodua naa keelieki oltung'ani oata nkileget too nkonyek neishiu.”

⁹Ore etaa kebaiki Ekbatana,

¹⁰nejoki olmalaika Tobias, “Olalashe lai Tobias ore taata kitoni o Raguel. Le sotua lino, neeta eselenkei nabo naji Sara. Nemetorrono ti niyam ninye,

¹¹amu ene sotua inyi, naa iyie enarikino ti niyam. Naa kenarikino sii tinijung imasaa e menye.

¹²Naa ore sii ina selenkei aisidai neeta eng'eno nagut. Enining'oki naa nanu, kairorie menye, paa tinikishukunye te Raga, niyam. Amu ayiolo ajo ore Raguel, too nkitanapat e Musa, nemeputan likae tung'ani, teneiko neijia naa keshiaakino neari metua, amu iyie ake enarikino nijung.”

¹³Nejoki Tobias olmalaika Rafael, “Olalashe Azaria, atoning'o ajo eyama ilpayiani oopishana ina selenkei, naa keeye pooki te nkolong enkiyama.

¹⁴Amaa taa amu nanu ake enkerai te papa, kaure ajo tenalo sii nanu naa kaye, anaa lelo oituruko, amu kenyor oloirirua ninye naa keinyal lelo pooki oonyikaki ninye. Neaku kaure ajo kaye, nayaki papa lai o yieyio ai osina sapuk enkishui enye te nkaraki nanu. Nemeeta olikai ayioni onukaa ninche.”

¹⁵Kake nejoki olmalaika ninye, “Amaa idamu ilomon likitiaaka apa papa lino ajo iyam enkitok esotua inyi? Inining'oki taa olalashe lai, ore amu keaku enkitok ino; minyamalu te nkaraki oloirirua, amu ore ena kewarie niyam ninye.

¹⁶Ore tininjing olgilata airura, iwa nkuruon naairoua, nibukoki inkuti oltau oina moinyua osinkirri pee eitayu empuruo.

¹⁷Ore teneing'uaya oloirirua neisik, nemeitoki ashukunye. Naa tinibaiki ninye, ninyotototo aaishiraki Enkai olng'ur, amu keitajeu intai neing'urie intai. Emiureishoyu, amu enino apake. Amu intajeuo ninye, nikiriamariyie ninye iyie nitumutumu inkera o ninye.” Ore pee ning Tobias lelo omon, nenyorru Sara oleng.