Read Maasai Bible – Biblia Sinyati Tobit 7 Bible Online

Tobit 7 - Maasai Bible – Biblia Sinyati bible

Tobit 7

¹Ore pee ebaiki Ekbatana, enkaji e Raguel, nenang'are Sara neiroroki ninche. Neirukoki ninye, neitoomon ninche.

²Nejoki Raguel enkitok enye Edna, “Ijo menyaayukie ele kiti tung'ani olalashe lai Tobit!”

³Neikilikuan Raguel ninche, “Ejo kaji ing'uaa ilalashera?” Newaliki aajoki, “Kira iyiook ilayiok le Naftali, olapa oibung'aki te Ninawi.”

⁴Neikilikuan ninche, “Iyiololo olalashe lang Tobit?” Nejoki, ee aikiyolo, “Amaa aisupat?”

⁵Newaliki ajo, “Keishu naa biyoto.” Nejoki Tobias, “Ninye papa lai.”

⁶Nedumunye Raguel neng'utut Tobias neishir.

⁷Nemayian ninye ejo, “Olayioni le ilo tung'ani supat!” Ore pee ening ajo etamodoo Tobit, neisinanuo oleng neishir.

⁸Neishir sii ninye Edna enkitok enye o Sara entito enye. Neitoomon ninche; neyieng'aki olmeregesh loo ntare enye, neitobiraki ninche endaa sapuk. Nejoki Tobias Rafael, “Olalashe Azaria, inosu lelo omon likinosaka kitii enkoitoi, pee eiting ororei”.

⁹Neliki Raguel ina omono. Nejoki Raguel Tobias, “Inosa niokisho nishipa;

¹⁰amu keishiaakino enkerai ai. Kake intasho maatoliki anaa enaikununo.

¹¹Aishoo entito ai ilewa oopishana, ore pooki ootaboitare ninye kewarie neye. Kake ore taata tishipayu.” Nejo Tobias, “Manya ai toki, oonitobiru olning'o o nanu.”

¹²Nejo Raguel, “Toriko ninye tenakata anaa enatiu to lkerreti lang. Ira iyie ole sotua enye. Nerikoo intai Enkai olng'ur te sidano.”

¹³Neipot entito enye Sara, neibung nkaina neitarasaki Tobias, nejo, “Nena, toriko anaa enaikununo too nkitanapat e Musa, eriamari enetii paapai linyi.” Nemayian ninche.

¹⁴Neipot Raguel enkitok enye Edna nedumu olpiyayati naigerokino olning'o le nkiama netukuny.

¹⁵Neiteru aadaa.

¹⁶Neipot Raguel enkitok enye Edna, nejoki “Enkanashe intobira olikai gilata nirik Sara ine.”

¹⁷Neas anaa enatiaakaki nerik Sara neiteru entito aishir. Kake neilejilej Edna entito enye nejoki,

¹⁸“Tipija enkerai ai; aikincho Olaitoriani le keper o enkop enchipai. Tipija, Entito ai.”