Read Maasai Bible – Biblia Sinyati Tobit 8 Bible Online

Tobit 8 - Maasai Bible – Biblia Sinyati bible

Tobit 8

¹Ore pee eidip aainosa endaa, nerikoo Tobias aarik olgilata lenye.

²Ore eloito nedamu ilomon le Rafael, neitayu nkuruon naishu o enkorropil nepik emoinyua o ltau loo sinkirri nepuru.

³Naa ore pee etum oloirirua ina song'ouna neisik alo Misiri, neibung olmalaika neen.

⁴Ore pee eiken emilango, neboita pokira oopeny, nedumunye Tobias te ndapash nejoki, “Enkanashe tudumunye pee kiomon Olaitoriani meing'urrie iyiook,”

⁵Neiteru Tobias aomon: “Metaa iyie eisisi, Enkai oo loo papa, nemayiani sii enkarna ino sinyati naitoiresho ntarasi. Inchoo keper o ing'uesi pooki kimayian iyie Enkai.

⁶Iyie oitobirua Adam ninchoo ninye enkitok enye Hawa pee eaku enkaretoni, neaku ninche intoiwuo olosho. Nitejo iyie, ‘meishiaakino teneton olee openy. Kaitobiraki enkaretoni sidai.’

⁷“Ore naa, Olaitoriani, mayaita ena anashe ai te nkaraki enkiborra oo nkonyek kake te sipata. Inchoo naa atum olng'ur nikimoruao tenebo.”

⁸Nejo tenebo “Esaai”

⁹Nepuo pokira aairura kake etudumunye Raguel nelo atur enkurare. Kake nedumunye Raguel nelo atur enkurare,

¹⁰nejo too ndamunot, “Ebaiki naye sii nanu.”

¹¹Nelo Raguel enkaji enye,

¹²nejoki enkitok enye Edna, “Irriwai obo loo sinkan pee ing'uraa tenaa keton eishu; tenetua, nikituroo meyiolo oltung'ani”.

¹³Nelo osinka nebol kutuk aji nejing atua aji, neinepu eirura pokira.

¹⁴Neipang auluo neliki ninche ajo keishu.

¹⁵Nemayian Raguel Enkai ejo, “Metaa iyie eisisi, Enkai, te biotisho pooki o mayianat sinyat. Inchoo kimayian isinyat o intokitin pooki naaishu; Inchoo kimayian ilmalaika o iltungana oogeluno intarasi.”

¹⁶“Metaa iyie eisisi, Enkai amu kintishipa nanu. Eitu easayu te nanu anaa enayieu apa; kake eitaasa iyiook Enkai to lng'ur lenye kuna.”

¹⁷“Metaa iyie eisisi, amu itaa iyie oloata olng'ur te kuna kera nayamate. Ing'urrie ninche Olaitoriani lai; Inchoo enkishui enye o biotisho o enchipai o lng'ur intarasi.”

¹⁸Nejoki sinkan lenyena metushuko inkulupuok.

¹⁹Ore pee eidipa ina, neitobiru osirua le nkiyama loo nkolong'i tomon oong'uan.

²⁰Naa ore eton eitu eishunye inkolong'i osirua, nenya Raguel olmumai ejoki Tobias inchere pee melo eton eitu eishunye inkolong'i tomon oong'uan o sirua le nkiyama,

²¹inchere keya esashata sapuk oo masaa e Raguel, pee eshukoki menye, “ore naa leku neaku ninono tenaye nanu o enkitok ai.”