Read Maasai Bible – Biblia Sinyati Yudit 1 Bible Online

Yudit 1 - Maasai Bible – Biblia Sinyati bible

Yudit 1

¹Ore to lari le tomon aare le nkitoria e Nebukadnesa oitoria Asiria, enkanasa kitok e Ninawi too nkolong'i e Alfasad oitoria Medes te Ekbatana,

²ninye olaiguanani otesheta esuntai e Ekbatana too soito. Ore ina suntai naa intemeta uni te ndapasho naa intemeta ile te nkadori.

³Ore too inchomito neshet iltaleta laa intemeta iip te nkadori naa intemeta intomoni ile te ndapasho to lkitamanyunoto,

⁴neitobir inchomito; naa intemeta intomoni naapishana te nkadori o intemeta artam te ndapasho, peyie eruk enjore enye te leleki, o lturrurri lenye.

⁵Teina rishata apa eiterua olaiguanani Nebukadnesa olarrabal o olaiguanani Alfasad te nkisiashata kitok oo lpolosien le nkanasa e Raga.

⁶Nerubare olaiguanani Alfasad lelo le nkop oo ndoinyo o lelo pooki oomanya embata Frati o Tigris o Hidaspe o enkisiashata ewueji naitore olaiguanani, Ariok le Elamu. Eibung'are iloshon kumok empikas oo Ilkaldayo.

⁷Neirriwaa Nebukadnesa, olaiguanani le Asiria olikilikuai airriwaki Ilperesi o lelo le nkalo o loo ntoluo o lelo apa oo manya Kilikia o Dameski o Lebanon o Antilebanon o lomanaa le naiposha,

⁸o lelo oshon le Karmeli o Gilead o Galilaya e shumata o enkisiashata kitok e Yesreel,

⁹o lelo pooki ootii Samaria o nkang'itie naamanita dukuya e Yordan ometabaiki enkanasa e Yerusalem o Betania o Kelusi o Kadesh o lkeju le Misiri, o Tapanesi o Rama o enkop pooki e Goshen.

¹⁰Ewaki sii ilo kilikuai Tanis o Memfis o lelo oomanya Misiri o ilpolosien le Etiopia.

¹¹Kake ore lelo pooki oomanya ina kop neany olkilikuai le Nebukadnesa olaiguanani le Asiria, neany sii eibung'are enjore enye amu etoduaa ninche aajo meeisul ake teilo arrabal, neshuk ilkiliku too nkaik naarok o to lmena sapuk.

¹²Negorokino Nebukadnesa enkop pooki, nenya olmumai te nkitoo enye o enkitoria enye pooki ajo keitalak elap ina kop e Kilikia o Dameski o Siria, nejo keari ninche to lalem o lelo oomanya enkop e Moab o ltung'ana le Amon o Yuda o pooki tung'ani otii Misiri ometabaiki olomanaa loo naaiposha pokira are.

¹³Ore to lari le tomon oo napishana le nkitoria enye, nerik enjore enye aarare olaiguanani Alfasad, neisulie ninye nemir enjore o laiguanani Alfasad o lelo ookedito mbarrtan o ngarrin oo mbartan.

¹⁴Neya olaguanani Nebukadnesa inkanas pooki, nelotu enkanasa e Ekbatana neibung iltaleta lenye o nkanas enye neibelekeny esidano enye aitaa imutat.

¹⁵Neibung Alfasad too ldoinyo le Raga near te remet metua.

¹⁶Neshuko Nebukadnesa o enjore pooki alo Ninawi eeta imasaa kumok, neyeng'iyeng'a ninye o enjore enye neitayu osirua le nchipai too nkolong'i iip nabo o tikitam.