Read Maasai Bible – Biblia Sinyati Yudit 11 Bible Online

Yudit 11 - Maasai Bible – Biblia Sinyati bible

Yudit 11

¹Nejoki Holoferne Yudit, “Mintoki aikata; miata enkuretisho. Eitu akata apik ilbaa oltung'ana oyou nesiyai Nebukadnesa, olaiguanani le enkop pooki.

²Otenakata, tenemee iltung'ana linono laa tamoro anata eitu aiteru olarabal. Aate eyakita ena nyamali.

³Kake tolikioki, ainyoo pitunguwayie ninche nilotu enikitii? Meti enyamali ene. Emiureshoyu! Kitapalikitia inkishui ino taata, nemeti batisho too inkolong'i edukuya.

⁴Meetai oltung'ani liki taas intorrok; ikiramat pooki aitobiraki anaa sinkan kulikai lo kitok lai Nebukadnesa.”

⁵Nejoki Yudit Holoferne, “Inchoki maairorie, olaitoriani lai, naa toningu aatasayi, nena pooki najoki, kaliki esipata ake.

⁶Ore tinig nisuj enkikoo ai, kitaas Enkai entoki sapuk, nemelaikino Olaitoriani lai too enkitobirat enyena.

⁷Amu aimanya te enkishui o engolon e Nebukadnesa olaiguanani le enkop pooki, likiriwa peyaki olkilikui lelo pooki le inkitoo enye, ajo me inchere ake inkuna iltung'ana meisayie ninye, kake te nkaraki iyie peyanyit ing'uesi o inkishu o motonyi. Ore Nebukadnesa o enkitoo enye pooki na keponari.

⁸Kitoning'o eng'eno ino o enkarriyiano. Keyiolo enkop pooki ajo ira oltung'ani supat naa arriyia, too lkituaak pooki le kitoo e Asiria.

⁹Eitajeuoki Akior iltung'ana le Betulia, netiaaka iyiook inaatejo larrabal.

¹⁰Aatasayia, olkitok, mimenaa nikitiaaka Akior, kake tangamu nena amu kesipa. Meetai oltung'ani loitaas intorrok aashu emir iltung'ana lang, aashu naa tenetasa eng'oki te dukuya Enkai enye.

¹¹“Kake milaisho iyie, nimilakino e nkimpirta ino. Ore teas Israel enkok, netagor Enkai enye, naa kee ninche.

¹²Eishunye indaiki naa tushumaki, ore enkare neishunye sii, nedung ajo pee aar inkishu enye pooki, nenya endaa namito too inkitanapat Enkai.

¹³Nedung anya enkano natushumaki apa tekikesare edukuya o ematua e tomon e naisho oo sabibu oilata, nasiya naitaanyaki ilapolosak laa ninche oisiyae Enkai te Yerusalem. Kemito te iyiook pooki enkiseyeta endaa sinyati,

¹⁴kake ore amu eidipa aatigil iltung'ana ina kitanapata, erriwaitie iltung'ana leina anasa ang, ilkiliku meshomo ilkioma aomonu peishoruni pekias nejia.

¹⁵Ore ina olong nashoruni, pee enya ina daa, edim eidaikie ninche.

¹⁶Ore ake payolou ina naisik angataa iltung'ana lainei. Airriwua Enkai pekias entoki tenebo oyie naingasiye pooki ng'ai anig te enkop pooki.

¹⁷Lokitok, kara nanu enkitok aseremani; kaserem Enkai e keper dama o kewarie. Katon tene too ilng'oborri linyi, ore kewarie pooki nalo oerata aomon Enkai, naa kaaliki enkolong naas mbaa torrok.

¹⁸Te nayiolou, kaalotu aliki, nilo o enjore ino pooki. Meidim inakata Israel atomitu kewan.

¹⁹Karikoo aimie empolos enkop e Yuda omatabai Yerusalem, teine aitaa iyie olaiguanani te mpolos enkanasa. Indapash iltung'ana le Yerusalem anaa intare nemeeta olchekut. Mikintieu ninye oldia aikurrukuroki iyie. Aaitayiolo Enkai kuna tokiting te dukuya oleng, nairriwa paliki iyie.”

²⁰Neshipakino Holoferne tenebo sinkan lenyena inaatejo Yudit, netil eng'eno nagut enye.

²¹“Ninye enkitok sidai oleng naa ng'en te enkop pooki,” newalikino.

²²Nejoki Holoferne, “Entoki sidai oleng kirriua Enkai ene pee iyaki iyiook enkisulata o endaakinoto too lelo omor olaiguanani Nebukadnesa.

²³Mee ake ira sidai iyiolo sii enkiroroto. Ore tenias anaa enisiligie, keaku Enkai ino Enkai ai. Emany iyie enkaji e nkitoo e Nebukadnesa niaku ning'ot te enkop pooki.”